Esyonyimbo 66 - AMASAKO ABOYTRTRE WA NYAMUHANGA AWAKAHULAWA MO BIBLIA

Olwimbo lwʼeripipa nʼewasĩngya

Busana nʼomwĩmbĩrĩrĩ mukulu. Olwimbo.

¹ Ĩnywe bandu bosĩ, mupipe Nyamuhanga omo mirenge yʼobutseme!

² Mwimbe olukengerwa lwʼerĩna liwe; Mumuhe eripipa lyʼolukengerwa!

³ Mubwire Nyamuhanga muti, Emyatsi eyo ukakola ni yʼeriswekera! Busana nʼobukulu bwʼobukulu bwʼobũtokĩ bwawe, Esyonzĩgũ syawe syasyũnama embere syawe omʼiubaha.

⁴ Obuli mundu omo kihugo akakũramaya; Bakakwimbira eripipa, Bakimbira erĩna lyawe eripipa.

⁵ Mwase mũlebaye ebyo Nyamuhanga abirikola; Mwase, mũlebaye emĩbĩrĩ yiwe yʼeriswekera omo katĩkatĩ kʼabandu.

⁶ Mwahindula engetsi mo kitaka kyũmĩre; Aboso-kulu wetu mobasoka olũsĩ omo bisando byabo. Motwatsema eyo busana nʼebyo akola.

⁷ Akatabala kera na kera omo maka wuwe, Ameso wuwe akasamalira ebihanda; Sihabye abakahona nʼabakamubambira!

⁸ Ebihanda byosĩ bipipe Nyamuhanga wetu; Erimupipa lyenyũ lyogũbawe.

⁹ Abirireka itwabyaho, Sialitaleka tũkayĩhĩnda.

¹⁰ Uwe Nyamuhanga, wabiritulengako; Wabiritulengako ngʼebĩtsĩpa ko bikalenga wa omo muliro.

¹¹ Mowaleka itwatogera omo kitego, Nʼerĩhĩra emiheke ĩrĩtohĩre oko migongo yetu.

¹² Mowaleka esyonzĩgũ syetu isyatulya tangako; Motwalaba omo muliro nʼerigunga lyʼamagetsi, Nĩkwa lino wabirituleta ahali Obuholo.

¹³ Nasyaleta amahere wʼerĩokererya omo nyũmba yawe; Nasyakuherera ebyo nakulaga;

¹⁴ Nasyakuha ebyo nabũga indi nasyakola, Omugulu nabya omo bũlĩge.

¹⁵ Nasyahera esyombũlĩ nʼerĩokereryasyo oko kiherero; Hasyabya ekikumbo kyowene kyʼesyombene esĩkahĩsĩbawa; Nasyahonga esyonume nʼesyombene.

¹⁶ Mwase, muhulikirire, ĩnywe bosĩ abakasĩkaya Nyamuhanga, Ngandĩbakanĩrya ebyo abirinyikolera.

¹⁷ Monamulakira erĩnyĩwatĩkya; Nabya nyĩsĩkĩre erimupipa omo syonyimbo.

¹⁸ Namaganĩrya ebibi omo mutima wage, Omukama sĩanganyowa.

¹⁹ Nĩkwa Nyamuhanga abĩrĩnyowa kwenene; Abirihulikirira erisaba lyage.

²⁰ Ngapipa Nyamuhanga, Kusangwa mwatagana erisaba lyage, Kutse erinyiganira olwanzo luwe olutyusa.