Esyonyimbo 6 - AMASAKO ABOYTRTRE WA NYAMUHANGA AWAKAHULAWA MO BIBLIAErisaba lyʼomugulu wʼobũlĩge Busana nʼomwĩmbĩ mukulu, oko syonanga. Olwimbo lwa Dawĩdĩ. 1 Uwe Mwami Mukulu, sunyikunge omwʼihitana lyawe! Kandi sunyisuyire omwʼigalirwa lyawe! 2 Uwe Mwami Mukulu, unyiganyire kusangwa namuma, Uwe Mwami Mukulu, ũnyĩlamaye, kusangwa ngahwa. 3 Ekĩrĩmũ kyage kyamalũa omo nda, Uwe Mwami Mukulu, Wasyatwĩryahi kwehĩ? 4 Uwe Mwami Mukulu, Usubule ũnyĩlamaye, Kusangwa ũnyanzĩre, ũnyĩlamaye omo luholo. 5 Kusangwa omo luholo sihali erikwibuka. Nindi akakuha ewasĩngya omo Kũlĩmũ kwehĩ? 6 Namaluha omwʼĩsĩmba lyage; Obuli kiro ngatsapaya engyingo yage omo mĩsonĩa, Ngatsapaya aho ngagotsera busana nʼeririra. 7 Erĩso lyage likabonda busana nʼobũlĩge. Erĩso lyage likakula busana nʼesyonzĩgũ syage syosĩ. 8 Ĩnywe bakolĩ bʼebibi, mũnyĩlũeko, Kusangwa Omwami Mukulu akowa eririra lyage. 9 Omwami Mukulu abĩrĩowa erilaka lyage; Omwami Mukulu akalĩga erisaba lyage. 10 Esyonzĩgũ syage syosĩ syasyahemuka, nʼerilola oko bũlĩge, Syasyasuba enyũma, syasyĩtwa esĩsonĩ lũba. |
Bible in Kinandi © Bible Society of the Democratic Republic of Congo, and Bible Society of Uganda, 1980.
Bible Society of the Democratic Republic of Congo