Esyonyimbo 59 - AMASAKO ABOYTRTRE WA NYAMUHANGA AWAKAHULAWA MO BIBLIAErisaba busana nʼerĩlamĩbwa Busana nʼomwĩmbĩrĩrĩ mukulu. Olwimbo lwa Dawĩdĩ lwʼerĩkangĩrĩrya omugulu Saũlo atuma abandu erĩrĩmbya Dawĩdĩ omo nyũmba yiwe busana nʼerĩmwĩta. 1 Uwe Nyamuhanga wage, ũnyĩlamaye oko syonzĩgũ syage; Unyihanganire oko bandu abakanyibambira! 2 Ũnyĩlamaye oko bandu babi abo; Unyisabule oko bĩtĩ abo! 3 Mũlebaye! Bakanyĩrĩmbaya erinyibambira; Abandu bakalĩre bakahĩndana erinyibambira, Uwe Mwami Mukulu, si busana nʼebibi kutse amalolo wage, 4 Si busana nʼebibi byage, bakatibita aho wabo. Ubuke, ũnyĩwatĩkaye, Ũlebaye! 5 Uhangane, uwe Mwami Mukulu Nyamuhanga Wʼemilondo, Nyamuhanga wa Ĩsraelĩ! Ubuke nʼerisuyira ebihanda byosĩ Suganyire abatebya babi abo! 6 Bakasubula omwʼĩgolo-golo, bakasemba ngʼesyombwa, Bakatĩmba-tĩmba oko mũyĩ. 7 Hulikirira ebyo bakabũga! Esyondimi syabo siri ngʼemĩyalĩ omo buno bwabo, Nĩkwa bakabũlaya bati, Nindi wasyatowa kwehĩ? 8 Nĩkwa uwe Mwami Mukulu, ukasekabo; Ũkasekereraya ebihanda byosĩ! 9 Uwe ukanyilwira, ukanyihanganira; Uwe Nyamuhanga, uli busayiro bwage. 10 Nyamuhanga wage, oyũnyanzĩre, asyambĩkako; Asyaleka inalangira esyonzĩgũ syage sĩkakĩndwa. 11 Uwe Nyamuhanga, sĩwĩtebo, abandu bage bakasyibirirwa. Upanza-panzebo omo maka wawe, ũherayebo, Uwe Mukama, Omũhanganĩrĩ wetu! 12 Ebibi biri omo mĩnywa yabo, ebĩnywa byabo ni bibi; Bahambawe omwʼiyiheka lyabo! Bahambawe kusangwa bakatakira nʼeribiha. 13 Ũherayebo omwʼihitana lyabo, ũherayebo kutsibu. Neryo abandu bosĩ basyaminya ko Nyamuhanga akatabala omo Ĩsraelĩ Basyaminya kwʼobutabale buwe bũkahĩka omo kihugo kyosĩ! 14 Esyonzĩgũ sikasubula omwʼĩgolo-golo, bakasemba ngʼesyombwa, Bakatĩmba-tĩmba omo mũyĩ. 15 Bakamaga-maga erĩsondya ebyʼerirya, Ibakahaya bamatĩndĩũgũta. 16 Nĩkwa ĩngye nasyimbira amaka wawe; Ega, omo ngyakya-ngyakya nasyimba omo mulenge busana nʼolwanzo lwawe olutyusa. Wabiribya obusayiro busana nage, Wabiribya ekirindiriro omo kiro kyʼengitsi. 17 Nasyakupipa, uwe mũhanganĩrĩ wage; Obusayiro bwage ni Nyamuhanga, Nyamuhanga oyũnyanzĩre. |
Bible in Kinandi © Bible Society of the Democratic Republic of Congo, and Bible Society of Uganda, 1980.
Bible Society of the Democratic Republic of Congo