Esyonyimbo 46 - AMASAKO ABOYTRTRE WA NYAMUHANGA AWAKAHULAWA MO BIBLIA

Nyamuhanga ali haguma netu

Oko mwĩmbĩrĩrĩ mukulu. Olwimbo oko bagala ba Kora. Olwimbo omo nanga.

¹ Nyamuhanga ni busayiro bwetu nʼamaka wetu, Nyamuhanga asĩkĩre erĩtũwatĩkya omo mugulu wʼobũlĩge.

² Neryo sitwendiubaha, nomo ekihugo kyangatenga-tenganĩbwa. Nʼebitwa nomo byangatogongera omo mirindi yʼengetsi.

³ Kandi nomo amagetsi wayo angahuha nʼerigunga. Nʼebitwa byangatitimana omo butsibu bwayo.

⁴ Hali olũsĩ olukaleta obutseme oko mũyĩ wa Nyamuhanga. Nʼoko nyũmba ĩbũyĩrĩre yʼOwendata Kutsibu.

⁵ Nyamuhanga ĩkere omo mũyĩ oyo, nago sĩendĩsyaherĩbwa na kera; Nyamuhanga asyawatĩkyago omugulu bukakya.

⁶ Ebihanda bĩkalũsĩbawaho, amami akatera; Nyamuhanga akasumba omulenge, nʼekihugo kikanokokala.

⁷ Omwami Mukulu, Omũtokĩ Wʼebyosĩ ali haguma netu; Nyamuhanga wa Yakobo ni busayiro bwetu!

⁸ Mwase, mũlebaye emĩbĩrĩ eyo Mwami Mukulu abirikola! Mũlebaye emyatsi yʼeriswekera abirikola omo kihugo!

⁹ Akakũbaya amalwa omo kihugo kyosĩ; Akabũnanga amata, nʼerĩtsũtsanga amatũmo, Kandi akahĩsaya esyogalĩ omo muliro!

¹⁰ Akabũga ati, Mũmbaye oko malwa, muminye ko ndi Nyamuhanga, Nasyahamĩbwa omo bihanda, nasyahamĩbwa omo kihugo!

¹¹ Omwami Mukulu, Omũtokĩ Wʼebyosĩ ali haguma netu; Nyamuhanga wa Yakobo ni busayiro bwetu!