Esyonyimbo 45 - AMASAKO ABOYTRTRE WA NYAMUHANGA AWAKAHULAWA MO BIBLIA

Olwimbo lwʼerĩherũkya lwʼOmwami

Oko mwĩmbĩrĩrĩ mukulu ngʼemitanga-lyuba. Erĩkangĩrĩrya lyʼabagala ba Kora. Olwimbo lwʼolwanzo.

¹ Ebĩnywa bibuya bikabya omo mutima wage; Ngayĩsũnza Olwimbo olũ busana nʼomwami; Olulimi lwage luli ngʼakalamu kʼoyukasaka ndeke;

² Uli mubuya kwilaba abalume bosĩ, Emĩnywa yawe ĩkabũga ebĩnywa byʼamenge; Nyamuhanga abirikutsumula ebiro byosĩ.

³ Ubohe omũyalĩ wawe oko ndungu yawe, uwe mwami, embangĩ; Uli wʼobũtokĩ nʼowʼerikengwa!

⁴ Ulabe omo bukengwa, ũkĩnde; Busana nʼerihanganira omwatsi wʼekwenene, nʼerĩbanza litunganene. Amaka wawe asyakũkĩndĩsya kutsibu!

⁵ Emisoha yawe ĩtwĩre, Ebihanda bikawa oko bisando byawe, Emisoha yawe ikatsimita emitima yʼesyonzĩgũ syʼOmwami.

⁶ Ekĩtũmbĩ kyʼobwami ekyo Nyamuhanga abirikuha, kyasyakota! Ukatabala oko bwami bwawe omwʼibanza litunganene.

⁷ Wanzĩre eritunganene, kandi ũkakwa ebibi byʼobusu, Kikaleka Nyamuhanga, ye Nyamuhanga wawe, akayisoga we, Kandi abĩrĩkũtũlĩra kwʼobutseme kwilaba obo akaha abandi.

⁸ Erikumba ndeke lyʼamane-mane, Nʼeũũdĩ, nʼomũdalasanĩ, biri omo syongimba syawe; Abʼesyonanga bakakuwatira esyonyimbo erĩkũtsemesya omo bikali byʼameno wʼesyonzogũ.

⁹ Abali bʼabami bahangene embere syawe, haguma nʼabakalĩ abasĩkĩbwe, Omugole wawe omwami-kalĩ imene oko byala byawe byʼamali, iniambite esyamagetsi syʼeOfĩrĩ.

¹⁰ Uwe mũherũkĩ wʼOmwami, uhulikirire ebyo ngabũga; Wibirirawe ekihanda kyawe, nʼekĩtũnga kyawe.

¹¹ Obubuya bwawe bwasyaleka omwami iniakwanza; Kusangwa iye ni mukama wawe, umukenge.

¹² Abandu bʼeTĩro basyakuletera esyonzũnzo; Abandu bʼebindu basyasonda eriganyira lyawe.

¹³ Omwali wʼOmwami ali omo kikali, kandi ni mubuya ndeke! Esyongimba siwe sĩlũkĩre omo ngohe yʼesyamagetsi.

¹⁴ Asyatwalwa oko mwami iniambite olukimba lũkangĩre, Abambesa balĩkyabo bamũkwamĩre, Basyaletwa oko mwami.

¹⁵ Bakahĩka omo butseme, nʼeritsanga, Basyingira omo kikali kyʼOmwami.

¹⁶ Uwe mwami, wasyabya nʼabana abakabya omo mwanya wʼaboso-kulu wawe, Kandi wasyayirabo mo batabalĩ omo kihugo kyosĩ.

¹⁷ Nasyakanganĩa engulu yawe iwibukwa kera na kera, Nʼabandu bosĩ basyakupipa ebiro byosĩ.