Esyonyimbo 44 - AMASAKO ABOYTRTRE WA NYAMUHANGA AWAKAHULAWA MO BIBLIA

Erisaba busana nʼerĩlamĩbwa

Oko mwĩmbĩrĩrĩ mukulu. Olwimbo lwʼabagala ba Kora.

¹ Uwe Nyamuhanga, twabĩrĩyowĩra omo matwĩ wetu, Abotata wetu babiritubwira, Emĩbĩrĩ minene eyo wakola omo mugulu wabo, Omo biro bya kera.

² Mowahiga ebihanda abatĩkĩrĩrye; Mowahĩra abandu bawe omo kihugo kyabo. Mowasuyira ebindi bihanda. Nĩkwa mowaleka abandu bawe ibagasa.

³ Abandu bawe mobatakĩnda ekihugo omo mĩyalĩ yabo; Mobatatokakyo omo maka wabo, Nĩkwa ebyala byawe byʼamali nʼokuboko kwawe, Nʼekyakakala kyʼobũsũ bwawe, byo byatoka, Kusangwa wabya wanzĩrebo.

⁴ Uwe Nyamuhanga, uli Mwami wage; Ukaha abandu bawe erĩkĩnda!

⁵ Omo bũtokĩ bwawe twasyakĩnda esyonzĩgũ syetu, Omo lĩna lyawe tukandisyalyatira ahisi abakalwa netu.

⁶ Sindiendisyayiketera obuta bwage, Kutse omũyalĩ wage siendĩsyanyĩlamya;

⁷ Nĩkwa ni we watũlamaya oko syonzĩgũ syetu, Wabĩrĩkĩnda abosĩ abatũkwa obusu.

⁸ Twasyapipa Nyamuhanga emigulu yosĩ, Kandi twasyamuha ewasĩngya kera na kera.

⁹ Nĩkwa lino, Nyamuhanga wabirigana, nʼerireka ĩtwakĩndwa, Kandi isulitaswagenda nʼemilondo yetu oko malwa.

¹⁰ Walekĩre itwasaga esyonzĩgũ syetu, Kandi abatũkwa obusu bakatũhũnga kwʼebindu byetu.

¹¹ Wabirireka itwakerwa ngʼesyombũlĩ; Wabiritupanza-panzira omo bihugo byʼehali.

¹² Wagũlaya abandu bawe busana nʼobũgũlĩ buke, Isulitagasakĩ omo bũgũlĩ obo.

¹³ Wabirituyira mo maseko embere syʼabalĩkyetu; Bakatũsekereraya, nʼeritutenyerako oko bali hakũhĩ netu.

¹⁴ Wabirituyira mo mũsyo wʼerisekwa omo bihanda; Abandu bakatũtsĩngĩraya emitwe yabo erituseka.

¹⁵ Esĩsonĩ syage siri haguma nage omugulu gosĩ, Kandi ngũta ameso wʼahisi,

¹⁶ Busana nʼerĩowa erĩnenegũlya nʼebĩtsũmi, Busana nʼesyonzĩgũ nʼabakĩsya.

¹⁷ Ebyosĩ ebĩ byabĩrĩtũhĩkako, nĩkwa sitwetakwibirirwa, Kutse sĩtwetatũa endagane yawe haguma netu.

¹⁸ Sitwetakupona, kandi sitwetaketa ebihano byawe.

¹⁹ Nĩkwa wabĩrĩtũsĩganĩa omo katĩkatĩ kʼesyonyama syʼomolĩ, Wabirituswika omo kyũtsũtsũ kyʼoluholo.

²⁰ Twamabya twabirireka erĩramya Nyamuhanga wetu, Kutse erilakira nyamuhanga wʼehandi;

²¹ Kumbe Nyamuhanga abirikwesa omwatsi oyũ, Kusangwa anasĩ erĩkũmbo lyʼomutima.

²² Nĩkwa ni busana nawe, Nyamuhanga, tũkĩtawa omo musibo gosĩ. Tukaganzawa ngʼesyombũlĩ esyʼerikerwa.

²³ Ubuke, Mukama, busana nakĩ ukagotsera kwehĩ? Uhangane sutugane kera na kera.

²⁴ Busana nakĩ ũkabĩsa obũsũ bwawe kwehĩ? Busana nakĩ ukibirirawa amalĩge wetu, nʼerĩnũbĩbwa lyetu kwehĩ?

²⁵ Tukatogera ahisi omo lũtũtũ, Tukagotsera ahisi oko kitaka nʼerĩkĩndwa.

²⁶ Uhangane, ũtũwatĩkaye! Ũtũtongolaye, busana nʼolwanzo lwawe olutyusa!