Esyonyimbo 42 - AMASAKO ABOYTRTRE WA NYAMUHANGA AWAKAHULAWA MO BIBLIA

EKITABU KYʼAKABIRI (ESYONYIMBO 42—72) Erilaka lyʼomundu oyo wahiga-hĩganĩbawa

Busana nʼomwĩmbĩrĩrĩ mukulu. Olwimbo lwʼabagala ba Kora.

¹ Ngoko engabi ĩkakwa enyota busana nʼehyũsĩ byʼamagetsi, Litya ngakũkwa olukando, uwe Nyamuhanga.

² Ngakwa Nyamuhanga yʼolukando, ye Nyamuhanga oyuliho; Ko mugulu wahi nasyahangana embere sya Nyamuhanga kwehĩ?

³ Ngalaka omo musibo nʼomo kiro, nʼemĩsonĩa ni kalyo kage; Esyonzĩgũ syage sĩkanyĩbũlaya emigulu yosĩ siti, Nyamuhanga wawe ali hahi?

⁴ Omutima wage akabũnĩka omugulu ngibuka emyatsi yʼerĩmbere. Omugulu nabya ngagenda nʼesyondeko oko nyũmba ya Nyamuhanga, Ngasondolabo bakayayo, endeko eyĩtsemĩre, eyikimba, nʼeripipa Nyamuhanga.

⁵ Nyĩkwĩre obũlĩge busana nakĩ kwehĩ? Busana nakĩ ngaganga-ganga kwehĩ? Ngandĩhĩra uku Nyamuhanga kwʼamaha, kandi ngandimupipa, Iye Omũlamya wage na Nyamuhanga wage.

⁶ Uwe Nyamuhanga wage, omutima wage akalũa omo nda, Kikaleka inakwibuka omo kihugo kyʼeYorodanĩ, Kandi ngakwibuka hakũhĩ nʼekitwa kyʼeHermonĩ, nʼekitwa kyʼeMĩsĩrĩ.

⁷ Emirindi yʼengetsi ikabirikirana, Omo lukanda lwʼemisalala ya Nyamuhanga! Iri ngʼebisunda byʼobũlĩge ebyo akahĩra omo mutima wage.

⁸ Omwami Mukulu akangaye olwanzo luwe olutyusa obuli musibo! Nyimwimbire eripipa obuli kiro, Nyisabe Nyamuhanga oyukamba engebe.

⁹ Ngabwira Nyamuhanga, omwĩmĩrĩ wage, nyiti, Busana nakĩ wabirinyibirirwa kwehĩ? Ko busana nakĩ nyĩkĩnasũsũmana busana nʼerĩnũbya lyʼenzĩgũ yage kwehĩ?

¹⁰ Esyonzĩgũ syage sikanyitsuma omo malĩge wage erĩnyĩbũnanga, Sĩkanyĩbũlaya emigulu yosĩ siti, Nyamuhanga wawe ali hahi kwehĩ?

¹¹ Nyĩkwĩre obũlĩge busana nakĩ kwehĩ? Busana nakĩ ngaganga-ganga kwehĩ? Ngandĩhĩra uku Nyamuhanga kwʼamaha, kandi ngandimupipa, Iye Omũlamya wage, na Nyamuhanga wage.