Esyonyimbo 41 - AMASAKO ABOYTRTRE WA NYAMUHANGA AWAKAHULAWA MO BIBLIA

Erisaba lyʼomũkonĩ

Oko mwĩmbĩrĩrĩ mukulu. Olwimbo lwa Dawĩdĩ.

¹ Obutseme buli oko mundu oyukatsomana Omuhanya; Omwami Mukulu asyamũwatĩkya oko kiro kyʼobũlĩge.

² Omwami Mukulu asyamuhanganira nʼerĩteya engebe yiwe; Asyamutsumula omo kihugo; Sĩendĩsyamũsĩganĩa omo maka wʼesyonzĩgũ siwe.

³ Omwami Mukulu asyamũwatĩkya omugulu alwere, Nʼerĩmũsũbya ndeke.

⁴ Monabũga nyiti, Uwe Mwami Mukulu, unyiganyire; Ũlamaye ekĩrĩmũ kyage; nabĩrĩkũhalyako.

⁵ Esyonzĩgũ syage sĩkabũga ebibi busana nage. Bati, Kwʼasyahola kiro kyahi nʼeribiriranwa kwehĩ?

⁶ Abandu abakahĩka erinyilolako bakabũga mabehĩ; Bakasondaya engulu nyibi busana nage, Neryo bakayapanza-panza engulu eyo.

⁷ Abosĩ abakanyĩkwa obusu bakanyahula omo bihwehwe; Bakaganĩraya ebĩkalĩre busana nage.

⁸ Bakabũga bati, endwala yabirimuhamba erĩmwĩta, Neryo siendisyaswahangana omo ngyingo yiwe.

⁹ Ega, omwĩra wage mubuya, oyo nayiketera, Oyo walya oko kalyo kage, Abĩrĩnyĩlolya kʼomugongo.

¹⁰ Nĩkwa uwe Mwami Mukulu, unyiganyire, ũnyĩhanganaye, Nage nasyatũhabo.

¹¹ Nasyaminya kʼukatsema busana nage, Kusangwa enzĩgũ yage siyendĩsyanyĩsĩnga.

¹² Ũkanyĩwatĩkaya, kusangwa ngakola ebitunganene. Ũkanyĩtegaya embere syawe kera na kera.

¹³ Tupipe Omwami Mukulu, Nyamu­hanga wa Ĩsraelĩ, Tumupipe lino, nʼerĩhĩka kera na kera! Amina! Amina!