Esyonyimbo 40 - AMASAKO ABOYTRTRE WA NYAMUHANGA AWAKAHULAWA MO BIBLIA

Olwimbo lwʼeripipa

Busana nʼomwĩmbĩrĩrĩ mukulu. Olwimbo lwa Dawĩdĩ.

¹ Monalinda erĩwatĩkya lyʼOmwami Mukulu omugulu muli; Neryo mwanyitegera okũtũ, kandi mowa erilaka lyage.

² Mwanyisumba omo buhya bũkalĩre, nʼerĩnyĩlũsya omo byondo byabo; Kandi mwanyĩhĩra oko lĩbwe omo buholo, nʼerĩnyĩsĩkya.

³ Mwahĩra Olwimbo luhya-luhya omo buno bwage, Eripipa Nyamuhanga wetu; Abangi basyalangirakyo nʼeriubaha; Basyayiketera Omwami Mukulu.

⁴ Obutseme buli oko mundu oyukayiketera Omwami Mukulu. Oyutebindukira esyosanamu, Kutse erikwama abakaramaya esyonyamuhanga syʼamabehĩ.

⁵ Wabiritukolera emĩbĩrĩ mingi yʼeriswekera, uwe Mwami Mukulu, Nyamuhanga wage. Wabĩrĩtũtegekanĩrya emyatsi mingi. Sihali mundu oyuli nga we! Kumbe namalenga eriahulayo, Sinangatoka eriganzayo.

⁶ Sulitsemera amahere nʼamatolere; Sũlĩbũlaya amahere wʼerĩokererya kutse amahere busana nʼerĩlũsya ebibi, Nĩkwa wabirinyiha amatwĩ wʼerĩkowa.

⁷ Neryo monasũbĩrya nyiti, Ĩngye yono, namasa; Erihana lyawe busana nage liri omo kitabu kyʼEmigambo.

⁸ Nyanzĩre erikola erisonda lyawe, uwe Nyamuhanga wage! Ega, Emigambo yawe iri omo mutima wage.

⁹ Nabĩrĩtũla Engulu Yowene yʼeritunganene omo ndeko nene. Lebaya, sĩndĩendĩsyũmbya erĩtũlayo, Nawe ũnasĩ utya Omwami Mukulu.

¹⁰ Sĩndĩtabĩsa engulu yʼeritunganene ryawe omo mutima wage; Nabĩrĩkanĩa eritindalegula lyawe nʼerĩlamya lyawe. Sĩndĩtabĩsa olwanzo lwawe olutyusa, nʼekwenene yawe omo ndeko nene.

¹¹ Mwami Mukulu, nyĩnasĩ sĩwendĩsyũmbya erinyiganyira! Olwanzo lwawe lutyusa, nʼekwenene yawe byasyanyibika emigulu yosĩ.

Erisaba busana nʼerĩwatĩkĩbwa

¹² Amalĩge awateganzika akanyĩtĩmbako! Ebibi byage byabĩrĩnyĩhĩkako, sinditoka erilangira ndeke; Bĩlabĩre esyonzwiri syʼoko mutwe wage; Kandi omutima wage abĩrĩlũa omo nda.

¹³ Lĩkũtsemesaye, uwe Mwami Mukulu, erĩnyĩlamya! Wanguhe, uwe Mwami Mukulu, ũnyĩwatĩkaye!

¹⁴ Abakasonda erĩnyĩta, Balole okwʼĩsonĩ nʼerihemulwa! Abakatsemera amalĩge wage, Basũbĩbawe enyũma, bahemulawe.

¹⁵ Kandi abakanyĩsekereraya, Basweke omwʼĩkĩndwa lyabo.

¹⁶ Abosĩ abakakusonda-sonda, bakutsemere, nʼerĩyĩsyandira ukʼuwe. Abosĩ abanzĩre erĩlamya lyawe babũge emigulu yosĩ bati, Omwami Mukulu ahamĩbawe!

¹⁷ Nĩkwa ĩngye indi mwera nʼowʼobwaga, Uwe Mukama unyibuke. Uli mũwatĩkya wage, Omũlamya wage, Uwe Nyamuhanga wage, sulindirire!