Esyonyimbo 37 - AMASAKO ABOYTRTRE WA NYAMUHANGA AWAKAHULAWA MO BIBLIA

Endũlĩ yʼababi, nʼendũlĩ yʼababuya

Olwimbo lwa Dawĩdĩ.

¹ Sũyĩhahũkaye omutima busana nʼababi; Kandi sutsure abakakola ebitatunganene.

² Basyabulirayo ngʼebiti ebikuma, Kandi basyakangalagatana ngʼemyaka eyikuma.

³ Uyiketere Omwami Mukulu, Ukole bibuya, Wĩkale omo kihugo, ubye buholo.

⁴ Utsemere Omwami Mukulu; Naye akandisyakuha ebyo mutima wawe anzĩre.

⁵ Uyihe oko Mwami Mukulu, Uyiketerereye, naye asyakũwatĩkya.

⁶ Asyaleka eritunganene ryawe ĩryakangabasanĩa ngʼekyakakala, Kandi asyaleka eritunganene lyawe ĩryakolerya ngʼeritungi.

⁷ Uyibombeke embere syʼOmwami Mukulu, umulinde nʼerĩsĩkya-sĩkya omutima, Sũhahũkaye omutima busana nʼabakabana omugaso, Kutse busana nʼabakagasa omo syombĩta nyibi syabo.

⁸ Uleke erihitana; uleke eriagalirwa! Sũhahũkaye omutima, likaleta erikola ebibi risa.

⁹ Kusangwa abakola-nabi basyahigwa; Nĩkwa abakayiketera Omwami Mukulu basyĩkala buholo omo kihugo.

¹⁰ Omo kandi katambĩ, ababi basyabulirana, Ega, wasyasondya omwanya wabo, isibendisyabyaho.

¹¹ Nĩkwa abakayĩkehaya basyĩkala ndeke omo kihugo, Basyayitsemera omo buholo bunene.

¹² Omundu mubi akaya embĩta busana nʼomundu mubuya, Akamukeregetera ameno wuwe.

¹³ Omwami Mukulu akaseka omundu mubi, Kusangwa anasĩ omundu mubi kwʼasyaherĩbwa lũba.

¹⁴ Ababi bakakula emĩyalĩ yabo, bakakangika amata wabo, Busana nʼerĩĩta abera bʼobwaga, Nʼerĩholya abatunganene.

¹⁵ Emĩyalĩ yabo, yasyatsimita emitima yabo, Nʼamata wabo asyatulangwa.

¹⁶ Ebike byʼomundu utunganene, Bĩrengĩre obũsokĩ bunene bwʼabakolanabi.

¹⁷ Kusangwa Omwami Mukulu akalũsaya amaka wʼabakola-nabi, Nĩkwa asyahanganira ababuya.

¹⁸ Omwami Mukulu akalembera engebe yʼabandu abahĩkene, Nʼekitaka kyasyabya kyabo kera na kera.

¹⁹ Sĩbendĩsyakwa obũlĩge omugulu ebiro bikakala; Kandi basyũgũta omo biro byʼenzala.

²⁰ Nĩkwa ababi basyahola, Esyonzĩgũ syʼOmwami Mukulu syasyabulirana ngʼobũsoyo bwʼomolĩ, Syasyalenga ngʼomũkĩ.

²¹ Ababi bakayibweka, ĩbataswatũha, Nĩkwa omundu oyutunganene akahĩtaya, kandi ni mwenge.

²² Kusangwa abali nʼomũyĩsa wa Nyamuhanga basyasiba buholo omo kihugo. Nĩkwa abakatakira basyahigwa.

²³ Omwami Mukulu, akasondola omundu omo nzira angayamo, Kandi akatsemera emigendere yiwe.

²⁴ Nomo angatoga, sĩendĩsyasĩgalaho, Kusangwa Omwami Mukulu akamuhamba omo byala biwe.

²⁵ Indi mukulu lino, sinyikiri mulere, Nĩkwa sinditalangira Omukama akasĩganĩa omundu utunganene, Kandi sinditalangira abana buwe bakasaba-saba akalyo.

²⁶ Oko migulu yosĩ akahĩtaya nʼeribweka abandi, Nʼabana buwe bakatsumulawa.

²⁷ Ũbũnũkale oko bibi, Ukole ebibuya, Neryo wasyakotera omo kihugo.

²⁸ Kusangwa Omwami Mukulu anzĩre erĩbanza, Kandi sĩalĩsĩganaya abandu buwe abateregula. Akahanganirabo kera na kera, Nĩkwa abana bʼabandu babi basyaherĩbwa.

²⁹ Abatunganene basyĩkala omo kihugo mo buholo, Nʼerĩsĩgalyakyo kera na kera.

³⁰ Omundu utunganene akabũga ebĩ­nywa byʼamenge, Kandi akabũga ebyʼerĩbanza lyʼekwenene.

³¹ Akategaya Emigambo ya Nyamuhanga wuwe omo mutima wuwe, Ĩsĩendĩsyalũa kuyo.

³² Omundu mubi akalebaya oyutungane­ne, Iniakasonda erĩmwĩta.

³³ Nikwa Omwami Mukulu siendĩsyamũsĩganĩa omo bũtokĩ buwe, Kandi siendisyaleka ĩnĩasĩngwa omugulu akatswerawa.

³⁴ Ũhĩre amaha wawe oko Mwami Mukulu, kandi wowe ebihano biwe, Asyakuha amaka wʼerĩsĩgalya ekitaka, Kandi wasyalangira erihigwa lyʼababi.

³⁵ Nabirilangira omundu mubi oyo wabya akalĩre; Abya akanũbya abandu bosĩ ngʼekĩlagũ kyʼeLebanonĩ;

³⁶ Nĩkwa enyũma wʼaho monalabaho, isialiho; Inga, monamũsondya, nĩkwa mwatabanika.

³⁷ Nĩkwa Ũlebaye omundu oyũhĩkene, kandi usamalire oyutunganene, Omundu wʼobuholo awite abana.

³⁸ Nĩkwa abakola-nabi basyaherĩbwa, Kandi abana babo basyatogotĩbwa.

³⁹ Nĩkwa Omwami Mukulu akalamaya bandu abatunganene, Akahanganirabo omo mugulu wʼobũlĩge.

⁴⁰ Omwami Mukulu akawatĩkayabo nʼerĩlamyabo, Akalamayabo oko bandu babi, nʼerĩtongolyabo, Kusangwa babirimusayirako.