Esyonyimbo 35 - AMASAKO ABOYTRTRE WA NYAMUHANGA AWAKAHULAWA MO BIBLIA

Erisaba erĩwatĩkya

Olwimbo lwa Dawĩdĩ.

¹ Uwe Mwami Mukulu, ulwe nʼabakalwa nage, Ubambire abakanyibambira.

² Uhambe engabo nʼebindu byʼamalwa. Unyihanganire, nʼerĩnyĩwatĩkya.

³ Usumbe erĩtũmo lyawe nʼembasa yʼamalwa, Ulwe nʼabakanyitibitako. Unyibwire kʼuli Omũlamya wage!

⁴ Uleke abakasonda erĩnyĩta bahemuke, nʼerĩkĩndwa! Kandi abakaya embĩta erilwa nage, babũnũkale, nʼerĩsĩngwa!

⁵ Babye ngʼomusunga wʼerihekwa nʼerihunga, Nʼomũlaĩka wʼOmwami Mukulu ahigebo!

⁶ Enzira yabo ibye mwĩrĩmya nʼamatendere, Nʼomũlaĩka wʼOmwami Mukulu atibite kubo!

⁷ Butsira ekikaleka, mobanyĩbĩsĩra ekitego; Kandi butsira ekikaleka, mobatakula obuhya bwʼerimbamba!

⁸ Nĩkwa erihera erĩtasĩbwe lyasyahambabo, Kandi ekitego ekyo babĩsa kyasyahambabo, Batogere omo buhya obo batakula.

⁹ Neryo nasyatsemera Omwami Mukulu, Nasyatsema kusangwa abĩrĩnyĩlamya.

¹⁰ Nasyabwira Omwami Mukulu nʼomutima wage gosĩ, nyiti, Nindi alingene nawe! Uwe ukahanganira abandu bolo oko bandu bʼamaka, Uwe ũkalamaya abera nʼabali nʼobwaga oko yũkamũhũngako!

¹¹ Abandu babi bakanyihandikirira, Bakanyihandikirira amalolo ndasĩ.

¹² Bakanyĩtũha ebibi busana nʼebibuya, Nʼomutima wage abĩrĩlũa omo nda.

¹³ Nĩkwa omugulu balwala, monambala emisarandwe; Monagalya ekĩrĩmũ kyage omwʼitsira akalyo; Kandi monasaba nʼerĩũnamya omutwe wage,

¹⁴ Monasaba ngʼoyukasabira omwĩra wuwe kutse mũlĩkyabo; Monũnama ngalira ngʼoyukalirira nyĩnya.

¹⁵ Omugulu nabya omo malĩge, abosĩ mobatsema, Nʼerĩhĩndana haguma erinyiseka; Abʼehandi mobanyĩswĩrya; Mobanyĩswĩrya butsira erĩũmbya.

¹⁶ Mobanyagalya, nʼerĩnyĩsekererya, Mobanyikeregetera ameno wabo.

¹⁷ Omwami Mukulu, wasyanyisamalira erĩtwĩryahi kwehĩ? Ũnyĩlamaye okwʼibambira lyabo, Ũlamaye engebe yage oko syondale esĩ!

¹⁸ Neryo nasyakuha ewasĩngya omo ndeko nene, Nasyakupipa omo katĩkatĩ kʼabandu bangi.

¹⁹ Suleke esyonzĩgũ syage, ababehĩ abo, Erinyitsemera omugulu ngakĩndawa! Suleke abakanyĩkwa obusu butsira mwatsi bakanyĩkoherya erĩso lyo nabi!

²⁰ Kusangwa sĩbebũga nʼobuholo; Nĩkwa bakategekanaya amabehĩ oko bandu bʼobuholo.

²¹ Mobanyihandikirira nʼomulenge mu­nene bati, Ha!, ha! Twabirilangira ekyo uligakola!

²² Nĩkwa uwe Mwami Mukulu, wabirilangirakyo, subye bũkũtũ, Subye hali kwĩngye, uwe Mwami Mukulu!

²³ Ubuke, unyihanganire, Mwami Mukulu! Uhangane, Nyamuhanga wage nʼomukama wage, ubye Mbũyĩ yage.

²⁴ Unyitswere, uwe Mwami Mukulu, Nyamuhanga wage, ngʼeritunganene ryawe; Suleke esyonzĩgũ syage sikanyitsemerako.

²⁵ Suleke bakabũga omo mutima wabo bati, Aha, ekyo kyo twabya twanzĩre. Suleke bakabũga bati, twabĩrĩmũkĩnda!

²⁶ Abakatsemera obũlĩge bwage bahemulawe nʼerĩsĩngwa haguma. Abakayihalamba busana nʼerinyipona bambalĩbawe esĩsonĩ nʼerihemulwa.

²⁷ Bayĩsyandire omo butseme, abakatsemera eritunganene ryage, Ega, babũge emigulu yosĩ bati, Omwami Mukulu ahame! Oyukatsemera omũyĩsa wʼomugombe wuwe;

²⁸ Nasyakanĩrya omwatsi wʼeritunganene ryawe, Kandi nasyakupipa omo musibo gosĩ.