Esyonyimbo 27 - AMASAKO ABOYTRTRE WA NYAMUHANGA AWAKAHULAWA MO BIBLIA

Erisaba lyʼeripipa

Olwimbo lwa Dawĩdĩ.

¹ Omwami Mukulu ni kyakakala kyage, nʼerilama lyage; Nasyubahandi kwehĩ? Omwami Mukulu akahanganira engebe yage; Sindiendisyubaha mundu.

² Omugulu abandu babi bakanyibambira, bati bakanyĩta, Sye syonzĩgũ syage, nʼabakanyagalaya, bakatwĩkala nʼeritoga.

³ Nomo mulondo wʼabandu anganyĩtĩmbako Omutima wage siendisyubaha; Nomo amalwa anganyibambira, Ngandisyayiketera Nyamuhanga.

⁴ Nabirisaba Omwami Mukulu omwatsi muguma, nasyasondago; Nyiti, nyĩkale omo nyũmba yʼOmwami Mukulu ebiro byosĩ byʼengebe yage, Nyilangire obubuya bwʼomwami Mukulu, Nʼerimusaba omo Hekalũ yiwe.

⁵ Kusangwa asyanyĩbĩsa ndeke oko mugulu wʼobũlĩge omo hema yiwe, Asyanyĩbĩsa omo kisenge kyʼeHekalũ yiwe; Asyanyibika ndeke endata oko lĩbwe.

⁶ Neryo nasyakĩnda esyonzĩgũ syage esĩnyĩtĩmbĩreko. Kandi omo butseme nasyaha amahere omo Hekalũ yiwe; Nasyimba, ega, nasyapipa Omwami Mukulu.

⁷ Uwe Mwami Mukulu, wowe omugulu ngakubirikira! Unyiganyire, ũnyĩsũbĩraye!

⁸ Mowambwira uti, Mwase kwĩngye, Omwami Mukulu, nasyasa ukʼuwe:

⁹ Sũbĩsame kwĩngye! Sunyihitaneko; suhige omugombe wawe. Wabiribya erĩwatĩkya lyage; Sũnyĩrekeranaye, sũnyĩsĩganaye, Uwe Nyamuhanga Omũlamya wage!

¹⁰ Tata na koyo bangananyĩrekeranĩa, Nĩkwa Omwami Mukulu asyanyirembera.

¹¹ Uwe Mwami Mukulu ũnyĩkangĩrĩraye enzira yawe; Unyisondole omo nzira yʼobuholo, Kusangwa nyiwite esyonzĩgũ nyingi.

¹² Sũnyĩrekeranaye okwʼisonda lyʼesyonzĩgũ syage; Kusangwa esyonzĩgũ syʼamabehĩ sikanyibambira, Esyonzĩgũ esyo sĩkabũga omwaga.

¹³ Namĩkĩrĩrya ko nasyalangira obubuya bwʼomwami Mukulu Omo kihugo kyʼabaliho.

¹⁴ Uyiketere Omwami Mukulu; Wĩkĩrĩraye, Suleke omutima akalũa omo nda, Uyiketere Omwami Mukulu.