Esyonyimbo 22 - AMASAKO ABOYTRTRE WA NYAMUHANGA AWAKAHULAWA MO BIBLIA

Erilaka lyʼobũlĩge nʼolwimbo lwʼeripipa

Oko mwĩmbĩrĩrĩ mukulu. Olwimbo lwa Dawĩdĩ.

¹ Nyamuhanga wage, Nyamuhanga wage, Busana nakĩ wabĩrĩnyĩsĩganĩa kwehĩ? Busana nakĩ ukabya hali okwʼĩnyĩwatĩkya nʼoko bĩnywa byʼerĩsĩmba lyage kwehĩ?

² Uwe Nyamuhanga wage, ngalaka omo musibo, nĩkwa sũlĩnyĩsũbĩraya; Nʼomo kiro ngalaka, isindiluhuka.

³ Nĩkwa uwe ũbũyĩrĩre, Uwe uli oyo Abaĩsraelĩ bakaramaya nʼerimwimbira.

⁴ Aboso-kulu wetu mobayiketera we, Mobayiketera we, nawe mowalamyabo.

⁵ Mobakulakira, neryo mobalamĩbwa; Mobayiketera we, kandi mobatahemulwa.

⁶ Nĩkwa ĩngye indi kahuka, Sindi mundu, Abandu bakanyĩkwa obusu, kandi abandu bakanyipona!

⁷ Abosĩ bakanyilolako bakanyĩsekereraya; Bakanyĩnyokoleraya nʼerĩnyĩtsĩngĩrya omutwe, bati,

⁸ Wayiketera Omwami Mukulu akũlamaye. Omwami Mukulu amabya akwanzĩre, busana nakĩ sĩalĩkũwatĩkaya kwehĩ?

⁹ Iwe waleka inabutwa ndeke, Kandi omugulu nabya mwana oyukonga monayiketera we.

¹⁰ Nabiriyiketera we erĩtsũka ekiro nabuta wa; Uli Nyamuhanga wage erĩtsũka omugulu koyo anyibuta.

¹¹ Subye hali kwĩngye! Kusangwa obũlĩ­ge buli hakũhĩ; Kandi sihali mundu wʼerĩwatĩkya.

¹² Esyonzĩgũ nyingi sĩkanyĩtĩmbako ngʼesyonume syʼesyonde. Sĩkanyĩtĩmbako, ngʼesyonume syʼesyonde sĩkalĩre syʼeBasanĩ.

¹³ Bakanyitandira amuno wabo, Ngʼendale eyikasunza nʼeriruruma.

¹⁴ Akagala kage kahwere ngʼamagetsi awakũtawa ahisi, Amakũha wage amateruka. Omutima wage ali ngʼebisese, Akanyenyeta omwisi wage.

¹⁵ Akagala kage kakuma ngʼoluyo, Nʼolulimi lwage lukakamata omo buno bwage. Wabĩrĩnyĩhĩra omo lũtũtũ lwʼoluholo.

¹⁶ Endeko yʼabandu babi ĩkanyĩtĩmbako Ngʼobũhyo bwʼesyombwa; Bakatobola ebyala byage nʼebisando byage.

¹⁷ Ngaganza amakũha wage gosĩ. Bakanyitungerera nʼerinyiharangurira ameso.

¹⁸ Bakagabana esyongimba syage omo katĩkatĩ kabo, Bakakanga obukanga busana nʼekanzu yage.

¹⁹ Uwe Mwami Mukulu, subye hali kwĩngye! Uwe erĩwatĩkya lyage, Wanguhe erĩnyĩwatĩkya!

²⁰ Ũnyĩlamaye oko mũyalĩ, Ũlamaye engebe yage oko maka wʼesyombwa.

²¹ Ũnyĩlamaye oko syondale esyo. Ega, singwite owʼerĩnyĩwatĩkya oko syonume syʼesyonde syʼomolĩ.

²² Nasyabwira abandu betu ebyo wabiri­kola, Nasyakupipa omwʼĩhĩndana lyabo.

²³ Ĩnywe mukubaha Omwami Mukulu, mumupipe! Ĩnywe bitsikulu ba Yakobo, mumukenge! Ĩnywe bandu ba Ĩsraelĩ, mũmũramaye!

²⁴ Sialibirirawa kutse eripona amalĩge wʼabakagalawa; Kandi sĩalĩbĩsama kubo, Nĩkwa akowa erilaka lyabo.

²⁵ Omo ndeko yosĩ nasyapipa ebyo wabirikola; Embere syʼabandu abakakukenga nasyahera esyohongo nalaga.

²⁶ Abandu bolo basyalya nʼerĩũgũta, Abandu abakasonda-sonda Omwami Mukulu basyamupipa. Emitima yabo ikote.

²⁷ Abandu bosĩ bʼekihugo basyibuka nʼeribindukira Omwami Mukulu, Nʼebĩtũnga byosĩ byʼebihanda byasyaramya embere syawe.

²⁸ Kusangwa obwami ni bwʼomwami Mukulu, Kandi iye nĩ mũtabalĩ wʼebihanda.

²⁹ Abandu bosĩ abakayiheka basyũnama embere siwe; Abandu bosĩ abakahola basyũnama embere siwe, Nʼabandu abatetoka erĩteya engebe yabo eribyaho, basyũnama embere siwe.

³⁰ Esyondengo esikandisyasa syasyamukolera; Kandi abandu basyakanĩa omwatsi wʼomukama oko lulengo olukasa.

³¹ Abandu abo basyasa nʼerĩkanĩrya eritunganene liwe, Basyakanĩrya abandu abakasyabutawa bati, Omwami Mukulu mwalamya abandu buwe.