Esyonyimbo 19 - AMASAKO ABOYTRTRE WA NYAMUHANGA AWAKAHULAWA MO BIBLIA

Emĩbĩrĩ nʼekĩnywa bya Nyamuhanga

Busana nʼomwĩmbĩrĩrĩ mukulu. Olwimbo lwa Dawĩdĩ.

¹ Olubula lũkakanaya olukengerwa lwa Nyamuhanga, Nʼekyanya kĩkabĩsũla ndeke ebyo abirikola.

² Obuli musibo akabwira ogundi musibo, Nʼobuli kiro kĩkakangaya ekindi kiro amenge.

³ Sihali ebĩnywa kutse omũbũge, Omulenge wabyo sĩalĩogũbawa;

⁴ Nĩkwa omulenge wabyo akatsungana omo kihugo kyosĩ, Nʼebĩnywa byabo bĩkahĩka oko ndũlĩ syʼekihugo. Nyamuhanga abiribamba ehema omo kyanya busana nʼeryuba.

⁵ Eryuba liri ngʼĩba wʼomũherũkĩ oyũkalũa omo nyũmba yiwe, Kandi rikatsema ngʼomundu wʼamaka oyukatibita omo matangwa.

⁶ Lĩkatsũka oko ndũlĩ nguma yʼekyanya, Neryo lĩkatĩmba oko yindi ndũlĩ yakyo; Isihali kindu ekĩkabĩsama ekĩhũhanĩ kyalyo.

Emigambo ya Nyamuhanga

⁷ Emigambo yʼOmwami Mukulu ĩhĩkene, ĩkasũbaya omutima; Erĩtũlago lyʼOmwami Mukulu ni kwenene, Likaha amenge oko yukabulago.

⁸ Erihamula lyʼOmwami Mukulu litu­nganene, Lĩkatsemesaya omutima; Ebihano byʼOmwami Mukulu ni bibuya bĩkakoleraya ameso.

⁹ Eriubaha Omwami Mukulu ni ribuya, likakota. Ebĩnywa byʼeritswera lyʼOmwami Mukulu ni byʼekwenene, Kandi bitunganene kutsibu.

¹⁰ Ni byʼerianzwa kwilaba esyamagetsi, Ega, Bĩlabĩre esyamagetsi esĩtũkwĩre, Kandi bĩsĩhĩre kwilaba obuki, Nʼomusonge wʼobuki owakatogonga omo bisese.

¹¹ Ebĩ bikahana omugombe wawe, Nʼoyukakwamabyo akabana oluhembo lunene.

¹² Nindi akatoka eriminya erĩhabya liwe kwehĩ? Ũnyĩlamaye oko bibi ebĩbĩsamĩre.

¹³ Ũkakĩraye omugombe wawe oko bibi byʼeriyiheka, Suleke bikanyitabalako! Neryo nasyabya nyĩhĩkene, Kandi nasyabya isindi ko musango wʼamalolo mabi.

¹⁴ Ebĩnywa byage nʼamalengekanĩa wʼomutima wage, Bĩrĩgawe omo meso wawe, Uwe Mwami Mukulu, Omũhanganĩrĩ nʼomũtongolya wage!