Esyonyimbo 18 - AMASAKO ABOYTRTRE WA NYAMUHANGA AWAKAHULAWA MO BIBLIA

Olwimbo lwa Dawĩdĩ busana nʼerĩsĩngana

Oko mwĩmbĩrĩrĩ mukulu. Olwimbo lwa Dawĩdĩ omugombe wʼOmwami Mukulu, oyo wimba ebĩnywa byʼolwimbo olũ oko Mwami Mukulu, ekiro Omwami Mukulu amũlamaya omo byala bya Saũlo nʼomo byala byʼesyonzĩgũ siwe syosĩ.

¹ Uwe Mwami Mukulu, amaka wage, nyĩkwanzĩre!

² Omwami Mukulu nĩ mũhanganĩrĩ wage, nʼahabambĩre hage, nʼomũlamya wage; Ni Nyamuhanga wage, nʼomũhanga nĩrĩ wage aho ngasagira; Iye ni ngabo yage, nʼoyukanyilwira, nʼobusayiro bwage.

³ Ngandilakira Omwami Mukulu, oyu­tolere eripipwa; Akanyĩlamaya oko syonzĩgũ syage.

⁴ Oluholo molwahĩra emikoba yalo erĩnyĩtĩmbako, Kandi ebisunda byʼerihera mobyanyĩta obuba.

⁵ Ekũlĩmũ moyahĩra emikoba yayo erĩnyĩtĩmbako, Ebitego byʼoluholo mobyanyitega.

⁶ Omo bũlĩge bwage, monalakira Omwami Mukulu; Monalakira Nyamuhanga wage erĩnyĩwatĩkya, Omo Hekalũ yiwe mowa omulenge wage; Nʼerilaka lyage molyahĩka omo matwĩ wuwe.

⁷ Ekihugo mokyatsinga-tsinga nʼerĩsũkana, Ebibanza byʼebitwa mobyatitimana, Mobyatenga-tengana kusangwa Nyamuhanga mwahitana!

⁸ Omũkĩ mwahuluka omo mihuli yiwe, Kandi omuliro mwalũa omo buno buwe owakahĩsaya; Amakala mwaka busana nago.

⁹ Mvyahĩgũkalya omwanya, neryo mwa­ndagala, Omwĩrĩmya wʼenyahĩnda mwabya omwisi wʼebisando biwe.

¹⁰ Kandi mwaguluka oko makerũbĩ, Ega, mwalendera lũba oko bĩpũpa byʼerihunga.

¹¹ Mwayiswika omo mwĩrĩmya; Ebĩtũ binene, ebyoswĩre mwʼamagetsi mobyamũtĩmbako.

¹² Amatwa nʼamakala awakaka mobyalũa mwʼerĩpalya embere siwe, Nʼebĩtũ bĩkalĩre mobyalaba.

¹³ Omwami Mukulu mwalũmĩra omo lubula; NʼOwendata Kutsibu mwasumba omũlenge, Amatwa nʼamakala awakaka,

¹⁴ Mwalasa emisoha yiwe, nʼeripanzapanza esyonzĩgũ siwe; Kandi mwagusa emĩrabyo, kandi mwapanza-panzayo.

¹⁵ Neryo emirindi yʼesyongetsi moyabĩsũlwa, Nʼebibanza byʼekihugo mobyabĩsũlwa, Busana nʼerikunga lyawe, uwe Mwami Mukulu, Busana nʼerĩhũha lyʼerihitana lyawe.

¹⁶ Omwami Mukulu mwakangamira erĩlũa endata nʼerinyitsimba, Mwanyisabula omo magetsi mangi.

¹⁷ Kandi mwanyĩlamya oko nzĩgũ yage yʼamaka, Mwanyĩlamya oko bandu abanyĩkwa ekĩnĩga; Kusangwa babya banyĩrengĩrye kagala.

¹⁸ Omugulu nabya omo bũlĩge mobanyibambira, Nĩkwa Omwami Mukulu mwanyihanganira.

¹⁹ Mwanyĩwatĩkya omo bwĩko bwage, Mwanyĩlamya kusangwa mwanyitsemera.

²⁰ Omwami Mukulu akanyihemba ngʼe­ritunganene lyage, Kandi akanyitsumula kusangwa Sindi ko lubanza.

²¹ Nabĩrĩtolya esyonzira syʼOmwami Mukulu, Kandi sĩndĩtayĩhanĩa uku Nyamuhanga wage.

²² Nabirikwama Emigambo yiwe yosĩ. Kandi Sinditaketa erihana liwe.

²³ Omo meso wuwe nabya butsira lubanza, Monayĩteya oko bibi.

²⁴ Neryo Omwami Mukulu akanyihemba kusangwa nyitunganene, Kandi akanyitsumula kusangwa Sindi ko lubanza.

²⁵ Suliregula oko bandu abateregula, Kandi ũhĩkene oko bandu abahĩkene.

²⁶ Werĩre oko bandu berĩre, Ũkalĩre oko bandu abakayihandika.

²⁷ Ũkalamaya abakayĩkehaya Kandi ũkakehaya abakayiheka,

²⁸ Omwami Mukulu uli kyakakala kyage, Omwami Mukulu Nyamuhanga wage akakoleraya omo mwĩrĩmya wage,

²⁹ Akamba akagala kʼerĩkĩnda omulondo wʼesyonzĩgũ, Nyamuhanga wage akaleka ĩnasĩngana.

³⁰ Nĩkwa Nyamuhanga, enzira yiwe yĩhĩkene. Ekĩnywa kyʼOmwami Mukulu ni kyʼeriyiketerwa; Ali ngʼengabo busana nʼabosĩ abakamusagirako.

³¹ Kusangwa Nyamuhanga nindi ate yo Mwami Mukulu kwehĩ? Nyamuhanga ĩyowene akatwimira.

³² Iye ni Nyamuhanga oyukamba amaka, Iye akahĩkanaya enzira yage.

³³ Akasĩkaya ebisando byage omo nzira, Kandi akaleka ĩndatwĩkala oko bitwa.

³⁴ Akanyĩgĩsaya erilwa omo byala byage, Inatoka erikura obuta bwʼomulinga.

³⁵ Wabirimba engabo yʼerilamya lyawe, Nʼebyala byawe byʼamali bikanyihambirira, Nʼerirembera lyawe lĩkanyĩhamaya.

³⁶ Wabirirembera enzira yage, Kandi sinditatoga.

³⁷ Ngahiga esyonzĩgũ syage nʼerihambasyo, Kandi sindiendisyasuba eka sitesyakĩndwa.

³⁸ Ngandĩswĩryasyo ahisi isyataluka eriswahangana; Syasyatoga nʼerĩkĩndwa oko bisando byage.

³⁹ Ukamba maka wʼerilwa, Wabĩrĩkĩnda esyonzĩgũ syage.

⁴⁰ Wabirireka esyonzĩgũ isyatibita; Ngaheraya abakanyĩkwa obusu.

⁴¹ Mobalaka, nĩkwa isihali owʼerĩlamyabo, Bakalakira Omwami Mukulu, nĩkwa iye mwatasũbĩryabo.

⁴² Ngatũndũlabo ngʼolũtũtũ olukahekawa nʼerihunga, Ngagusabo ngʼolondo lwʼenzira.

⁴³ Ũkanyĩlamaya oko bandu abakanyipona, Ũkanyĩhĩra mo mũtabalĩ wʼebihanda. Kandi abandu abo ndasĩ bakanyikolera.

⁴⁴ Omugulu bakanyowa basyanyikenga; Nʼabandu bʼehali basyũnama embere syage.

⁴⁵ Abʼehali sibendĩsĩkya emitima yabo yʼomo nda, Basyasa ibakatitimana bakalũa aho bakabĩsama.

⁴⁶ Omwami Mukulu aneho! Mupipe oyukanyimira! Nyamuhanga nĩ Mũlamya wage! Ahamĩbawe!

⁴⁷ Nyamuhanga ahamĩbawe oyũkanyĩkĩsaya, Akakĩnda bandu busana nage.

⁴⁸ Akanyĩlamaya oko syonzĩgũ syage; Akanyĩkĩndĩsaya esyonzĩgũ syage; Ukanyihanganira busana nʼabandu bʼomwaga.

⁴⁹ Uwe Mwami Mukulu nasyakuha ewasĩngya omo katĩkatĩ kʼebihanda, Nasyimba ebikapipa erĩna lyawe.

⁵⁰ Nyamuhanga akaha omwami wuwe erilama lĩnene; Akakangaya oyo ayisoga obubuya buwe bwʼolwanzo, Nʼuku Dawĩdĩ nʼabana buwe nʼabitsikulu buwe kera na kera.