Esyonyimbo 17 - AMASAKO ABOYTRTRE WA NYAMUHANGA AWAKAHULAWA MO BIBLIA

Erisaba lya Dawĩdĩ

¹ Uwe Mwami Mukulu, wowe erisaba lyage litunganene, wowe erilaka lyage! Utege okũtũ okwʼisaba lyage, erite nʼeriteba.

² Embere syawe unyitswere, Kusangwa ũnasĩ ekitunganene.

³ Ũnasĩ omutima wage, wabĩrĩnyĩlũngũlĩra omo kiro, Wabirinyirengako sulitanyibana ko mwatsi. Namagana erĩbũga ebibi ngʼabandi.

⁴ Nabĩrĩowa erihana lyawe, Sinditakwama enzira yʼomwaga.

⁵ Nabirirendera omo nzira yawe, Sinditakitira handi.

⁶ Ngakulakira uwe Nyamuhanga, kusangwa ũkanyĩsũbĩraya, Unyitegere okũtũ kwawe, wowe ebĩnywa byage.

⁷ Ũkanganaye obubuya bwʼeriswekera bwawe bʼolwanzo, Uwe Mũlamya, ũkalamaya abakakusagirako omo byala byawe byʼamali, Ũkalamayabo oko syonzĩgũ esikahangana erilwa nabo.

⁸ Unyirembere ngʼameso wawe; Ũnyĩbĩse omo kyũtsũtsũ kyʼebĩpũpa byawe,

⁹ Oko bandu babi abakanyĩnũbaya. Esyonzĩgũ syage esyoswĩre mwʼekĩnĩga sĩkanyĩtĩmbako.

¹⁰ Sisyeganyira mundu, Bakabũga nʼeriyiheka.

¹¹ Lino sĩkanyĩtĩmbako ehosĩ ngaya, Isikalangira aho syanganyigusa ahisi oko kitaka.

¹² Siri ngʼesyondale esikasonda erinyitulanga mo bitswe-bitswe, Siri ngʼemyusuko yʼesyondale esikandinda aho sĩkabĩsama.

¹³ Uwe Mwami Mukulu, uhangane, Ulwe nʼenzĩgũ yage, ũkĩndeyo! Ũnyĩlamaye oko babi omo mũyalĩ wawe.

¹⁴ Uwe Mwami Mukulu, ũnyĩlamaye oko syonzĩgũ esyo, omo bũtoki bwawe, Ũnyĩlamaye omo bũtokĩ bwawe oko bandu bʼekihugo abawite ebyo banzĩre omo ngebe yʼenoka. Usuyirebo omo magalĩ ago wabiribikirabo; Abana babo babane bingi, Kandi bakasĩgĩra abitsikulu babo obuteke bwabo.

¹⁵ Nĩkwa ĩngye, nasyalangira obũsũ bwawe omo litunganene, Kandi omugulu nasyabuka, obũsũ bwawe bwasyaleka inatsema.