Esyonyimbo 116 - AMASAKO ABOYTRTRE WA NYAMUHANGA AWAKAHULAWA MO BIBLIA

Omundu oyũkalamĩbawa oko luholo akapipa Nyamuhanga

¹ Nyanzĩre Omwami Mukulu, kusangwa akanyowa, Akahulikirira erisaba lyage.

² Akanyihulikirira, Obuli mugulu ngamulakira.

³ Oluholo molwanyisenga omo mikoba yalo, Obuyuyu bwʼeyisinda mobwanyĩta; Monakwa obuba nʼeriagalwa.

⁴ Neryo monalakira Omwami Mukulu, nyiti, Ngakulemba-lemba, uwe Mwami Mukulu, ũnyĩlamaye!

⁵ Omwami Mukulu akaganyira, kandi ni mubuya, Nyamuhanga wetu akaganyira.

⁶ Omwami Mukulu akahanganira abagunda; Omugulu nabya omo bwĩko, mwanyĩlamya.

⁷ Uwe mutima wage, sĩwendĩkwakĩ, Kusangwa Omwami Mukulu abirinyikolera ebibuya.

⁸ Omwami Mukulu abĩrĩnyĩlamya oko luholo; Abĩrĩkakĩrya emĩsonĩa yage, Abirireka ĩndakĩndwa.

⁹ Neryo ngalendera embere syʼOmwami Mukulu, Omo kihugo kyʼabandu abaliho.

¹⁰ Monasimbirira erĩkĩrĩrya, omo mugulu nabũga nyiti, Ngahola! Nabĩrĩkwa kutsibu!

¹¹ Omo bũlĩge bwage monabũga nyiti, Sihali mundu oyo wangayiketerwa.

¹² Omwami Mukulu nasyamuhakĩ kwehĩ? Busana nʼebibuya byosĩ ebyo akamba kwehĩ?

¹³ Nasyahamba olũtehĩ lwʼerilama, Nʼeriahula erĩna lyʼOmwami Mukulu.

¹⁴ Omwʼĩhĩndana lyʼabandu buwe bosĩ, Nasyaha Omwami Mukulu ebyo namulaga.

¹⁵ Oluholo lwʼabandu bʼOmwami Mukulu, Ni mwatsi munene omo meso wuwe.

¹⁶ Uwe Mwami Mukulu, indi mugombe wawe; Ngakukolera, nga koyo wage kwʼakukolera. Wabirinyibohola.

¹⁷ Ngandikuha obuhere bwʼewasĩngya, Kandi ngandikuletera erisaba lyage, uwe Mwami Mukulu.

¹⁸ Omwʼĩhĩndana lyʼabandu bawe bosĩ, Ngandikuha ebyo nabirikulaga,

¹⁹ Omo bibuga byʼeHekalũ yʼOmwami Mukulu, Hano eYerũsalema. Mupipe Omwami Mukulu!