Esyonyimbo 109 - AMASAKO ABOYTRTRE WA NYAMUHANGA AWAKAHULAWA MO BIBLIA

Erilaka lyʼomundu omo bũlĩge

Oko mwĩmbĩrĩrĩ mukulu. Olwimbo lwa Dawĩdĩ.

¹ Ngakupipa uwe Nyamuhanga; subye bũkũtũ!

² Abandu babi nʼababehĩ babirinyibambira, Ĩbakanyĩbũga kwʼamabehĩ.

³ Bakanyĩbũga kwʼemyatsi mibi kutsibu, Ibakanyibambira butsira ebikaleka.

⁴ Bakalwa nage, nomo nyĩnanzĩrebo, Inabirisabirabo.

⁵ Bakanyihemba ebibi busana nʼebibuya. Nʼekĩnĩga busana nʼolwanzo.

⁶ Uyisoge omundu mubi eritswera enzĩgũ yage, Kandi omuguma oko nzĩgũ siwe amuhandikirire.

⁷ Atswerawe kandi abanike kwʼomusango; Nʼerisaba liwe liganzawe mo busindwa!

⁸ Engebe yiwe ihwe lũba; Nʼogundi mundu ahambe omũbĩrĩ wuwe!

⁹ Abana buwe babye ngũbĩ, Nʼomũkalĩ wuwe abye mũkwakalĩ!

¹⁰ Abana buwe babye abakasaba-saba abatawite bwĩkalo; Bahigawe omo mulala bĩkeremo!

¹¹ Abakama buwe baheke ekitaka kiwe kyosĩ, Nʼabʼehali bahũnge ebyosĩ akolera.

¹² Sihabye mundu oyukamukolera ebibuya; Kandi Sihabye mundu oyukalembera esyongũbĩ siwe.

¹³ Abana buwe bosĩ bahole, Nʼerĩna liwe libiriranawe omo lulengo olũkwamĩre olũ.

¹⁴ Omwami Mukulu ibuke ebibi byʼaboso-kulu wuwe, Kandi siabuyire na kera ebibi bya koyo wuwe.

¹⁵ Omwami Mukulu ibuke ebibi byabo ebiro byosĩ, Nĩkwa ibo bibiriranawe kutsibu!

¹⁶ Omundu oyo mwataganĩrya erikola ebibuya; Nĩkwa mwendererya, nʼerĩĩta abera, nʼabʼobwaga, Nʼabatawite erĩwatĩkĩbwa.

¹⁷ Abya anzĩre eritakira, naye atakirawe! Siabya anzĩre eritsumula mundu, Kandi sihabye mundu ukamutsumula!

¹⁸ Abya ambite eritsuma ngʼolukimba; Eritakira liwe lingire omwisi wuwe ngʼamagetsi, Lingire omo makũha wuwe ngʼamagũta!

¹⁹ Limuswike ngʼesyongimba, Limuhange ngʼolukoba.

²⁰ Omwami Mukulu asuyire esyonzĩgũ syage syʼatya, Abakambũga kwʼemyatsi mibi!

²¹ Nĩkwa uwe Mwami Mukulu, Nyamuhanga wage, ũnyĩwatĩkaye ngoko walaga, Ũnyĩlamaye busana nʼobubuya bwʼolwanzo lwawe olutyusa.

²² Kusangwa indi mwera nʼowʼobwaga, Nabirihutala omwisi wʼomutima wage.

²³ Nyĩkĩsĩya inabulirayo ngʼekyũtsũtsũ kyʼerĩgolo-golo; Ngagũlũkĩbawa ngʼakahuka.

²⁴ Amarwĩ wage ni molo busana nʼeribula kalyo; Omubiri wage ni muke-muke, kandi ni molo.

²⁵ Omugulu abandu bakanyilolako, bakanyiseka; Bakanyĩtsĩngĩraya emitwe yabo erĩnyĩsekererya.

²⁶ Uwe Mwami Mukulu, Nyamuhanga wage, ũnyĩwatĩkaye; Ũnyĩlamaye busana nʼolwanzo lwawe olutyusa!

²⁷ Uleke esyonzĩgũ syage siminye Kʼuli ni we Mwami Mukulu oyũkanyĩlamaya.

²⁸ Bangananyitakira, nĩkwa uwe wasyanyitsumula. Abakanyendereraya bakĩndawe, Nĩkwa ĩngye mugombe wawe, nyitseme;

²⁹ Esyonzĩgũ syage siswikawe omwʼihemulwa, Bambale esĩsonĩ syabo ngʼolukimba.

³⁰ Nasyasumba omulenge wage eriha ewasĩngya kutsibu oko Mwami Mukulu; Nasyamupipa omwʼĩhĩndana lyʼabandu,

³¹ Kusangwa akahanganira omundu mwera, Erĩmũlamya oko bakamutswera oluholo.