Esyonyimbo 104 - AMASAKO ABOYTRTRE WA NYAMUHANGA AWAKAHULAWA MO BIBLIA

Eripipa Omũhangĩkĩ

¹ Uwe mutima wage, upipe Omwami Mukulu! Uwe Mwami Mukulu, Nyamuhanga wage, uli mukulu kutsibu! Wambite erĩsĩkĩbwa nʼolukengerwa lwʼobusinge.

² Ukayiswika ekyakakala. Ukasanza ekyanya ngʼehema.

³ Ũkahĩmba enyũmba yawe oko magetsi endata. Ukayira ebĩtũ mo galĩ yawe, Ukalendera oko bĩpũpa byʼerihunga.

⁴ Ukayira amahunga mo bakwenda bawe, Nʼerĩpalya ũkahĩralyo mo bagombe bawe.

⁵ Mowahanda ekihugo kyo ndeke oko bibanza byakyo, Ikitasyasegerĩbwa na kera.

⁶ Mowaswikakyo omo ngetsi ngʼolukimba, Nʼamagetsi mwaswika ebitwa.

⁷ Nĩkwa omugulu wakunga amagetsi, mwahigukala; Omugulu owa omulenge wʼerihana lyawe, mwahigukala.

⁸ Amagetsi ayo mwakiruka ebitwa nʼeriandagala omo misya, Erĩhĩka aho wahangika busana nago;

⁹ Mowahĩra Omutano siatoke erilaba, Erĩkakĩryago erĩswakũnĩngĩra ekihugo.

¹⁰ Ukaleka esyongũnũnũko isyasenda omo misya, Nʼamagetsi awakasenda omo katĩkatĩ kʼebitwa.

¹¹ Litya amagetsi akabanika busana nʼe­syonyama syʼomolĩ; Esyopunda syʼomolĩ Sikabuga enyota yasyo.

¹² Omo miti eyiri hakũhĩ, Esyonyonyũ sĩkahĩra esyonyutu syasyo, kandi sikimba.

¹³ Ukatuma embũla oko bitwa eyĩkalũa elubula, Nʼekihugo kikabana eritsumula lyawe ndeke.

¹⁴ Ũkalasaya ebiti busana nʼesyonde, Nʼemyaka busana nʼomũbĩrĩ wʼabandu, Iniatoka erĩlasya ebyalya biwe.

¹⁵ Nʼebĩnyũ ebyʼerimũtsemesya, Nʼamagũta wʼerĩhakabya obũsũ buwe, Nʼobundu bwʼerimuha akagala.

¹⁶ Emĩerezĩ yʼeLebanonĩ ikabana embũla nyingi, Emiti yʼOmwami Mukulu, eyo ahera.

¹⁷ Eyo esyonyonyũ sĩkahĩra esyonyutu syasyo; Ebĩrobĩ bĩkahĩra esyonyutu syabyo omo miti yʼekĩlagũ.

¹⁸ Esyombene syʼomolĩ sĩkere omo bitwa biri-biri, Nʼesyowĩbarĩ sĩkabĩsama omo mabwe.

¹⁹ Mowahangika omukera eriyira ebirimo; Nʼeryuba lyasĩ omugulu wʼerirenga.

²⁰ Mowayira ekiro, neryo nĩ mwĩrĩmya Esyonyama syʼomolĩ sikahuluka.

²¹ Omusuko wʼendale akaruruma omugulu akahiga, Iniakasonda ebyalya ebyo Nyamuhanga akahago.

²² Omugulu eryuba likahuluka, sikasubula, Nʼerigotsera omo myangalũ yasyo.

²³ Neryo abandu bakayakola omũbĩrĩ wabo, Ibakakola erĩhĩka omwʼĩgolo-golo.

²⁴ Uwe Mwami Mukulu, wabirihangika myatsi mingi! Wabirihangika ebyosĩ omo menge manene! Ekihugo kyoswĩre mwʼebihangikwa byawe.

²⁵ Hali engetsi nene nʼenyiri, Aho esyonyama sĩkere esiteganzika, Esyonyama nyike-nyike nʼesindi nene-nene.

²⁶ Amato akalaba muyo, Kandi muli Lewĩatanĩ eyo wahangika eritsangiramo.

²⁷ Ebyosĩ tukayiketera we, Erihasyo akalyo omugulu siri nʼobwaga.

²⁸ Ukaha kosyo, nasyo isyalyako; Ukabanirasyo akalyo, neryo sĩkũgũta.

²⁹ Omugulu ukaya ehandi, sikubaha; Omugulu ũkakakĩraya omuka wawe, sikahola, Isyasuba oko lũtũtũ olo syalũamo.

³⁰ Nĩkwa omugulu ukahasyo omuka, sikabyaho; Ukaha ekihugo engebe nyihya-nyihya.

³¹ Olukengerwa lwʼOmwami Mukulu lukote! Omwami Mukulu atsemere ebyo ahangika!

³² Akasamalira ekihugo, ikyatitimana; Akatũla oko bitwa, neryo ĩbyatũmba.

³³ Nasyimbira Omwami Mukulu ebiro byosĩ byage byʼeribyaho; Nasyimbira Nyamuhanga wage eripipa omugulu gosĩ nyiriho.

³⁴ Atsemesĩbawe omo lwimbo lwage, Kusangwa Omwami Mukulu akanyĩtsemesaya.

³⁵ Abakola-nabi batogotĩbawe omo kihugo; Nʼababi sibabyeho kandi! Uwe mutima wage, upipe Omwami Mukulu! Mupipe Omwami Mukulu!