Esyonyimbo 10 - AMASAKO ABOYTRTRE WA NYAMUHANGA AWAKAHULAWA MO BIBLIA

Erisaba busana nʼerĩkĩnda ababi

¹ Uwe Mwami Mukulu, busana nakĩ ukahangana hali kwehĩ? Busana nakĩ ũkayĩbĩsa omo mugulu wʼobũlĩge kwehĩ?

² Ababi bakayiheka, kandi bakendereraya abera. Bahambawe omo luhota olo bategekanaya.

³ Kusangwa omundu mubi akayihalamba omwʼisonda lyʼomutima wuwe, Nʼomundu wʼomururu akatsuma nʼeripona Omwami Mukulu.

⁴ Omundu mubi omwʼiyiheka liwe aka bũga ati, Nyamuhanga siendĩsyanyĩtũhya! Amalengekanĩa gosĩ gʼomundu mubi ati, Sihali Nyamuhanga.

⁵ Esyonzira siwe sikagasa omo migulu yosĩ, Sialiminya eritswera lya Nyamuhanga, Akakũta-kũtaya esyonzĩgũ siwe syosĩ.

⁶ Akayibwira omo mutima ati, Sĩndĩe-ndĩsyasega-seganĩbwa, Na kera sindiendisyalola oko bũlĩge.

⁷ Erĩbũga liwe Ĩyoswĩre mwʼeritakira, nʼeriteba, nʼerihaya, Olulimi luwe lũkabũga ebyʼepono nʼebibi.

⁸ Akayĩbĩsa omo mĩyĩ, Akĩtĩra abandu bate ko musango, ahabĩsamĩre Ali ngʼoyutawite mundu wʼerĩmũwatĩkya.

⁹ Akabĩsama ngʼendale omo kisaka kya­yo. Akalamba omundu mwera. Akahamba owʼobũlĩge omo kitego kiwe nʼerimukura.

¹⁰ Nʼomundu oyutawite erĩwatĩkĩbwa akakwa Omo maka.

¹¹ Omundu mubi akayibwira omo mutima wuwe ati, Nyamuhanga, abiribirirwa, Nyamuhanga abĩrĩrĩba ameso wuwe, siendisyanyilangira.

¹² Uwe Mwami Mukulu uhangane, uwe Nyamuhanga, Usumbe ebyala byawe erĩnyĩlamya. Siwibirirawe abakanũbĩbawa!

¹³ Omundu mubi akapona Nyamuhanga ati kwehĩ? Akayibwira omo mutima wuwe ati, Siendisyanyisuyira, ati kwehĩ?

¹⁴ Nĩkwa ukanalangira; Kusangwa ukaminya obũlĩge nʼeriagalwa kandi ũsĩkĩre erĩwatĩkya. Omuhanya akayiketera we; Kandi uli mũwatĩkya wʼengũbĩ.

¹⁵ Ũheraye amaka wʼababi, nʼabandu batya-batya; Kandi usuyirebo busana nʼebibi byabo byosĩ, erĩhĩka aho byasyabulira.

¹⁶ Omwami Mukulu ni mwami kera na kera, Nʼebihanda bĩtasĩ Nyamuhanga bĩkandĩsyalũa omo kihugo kiwe.

¹⁷ Uwe Mwami Mukulu, ũkowa erilaka lyʼabandu bolo, Kandi wasyasĩkya emitima yabo. Wasyatega amatwĩ wawe erĩowabo.

¹⁸ Wasyowa erilaka lyʼesyongũbĩ, nʼabakanũbĩbawa, Neryo abandu abakahola Sibabye bakũbahya kandi.