Esĩterĩ 7 - AMASAKO ABOYTRTRE WA NYAMUHANGA AWAKAHULAWA MO BIBLIA

Erirya ĩnene rya Esĩterĩ, omugole wʼOmwami, busana nʼomwami na Hamanĩ

¹ Neryo omwami na Hamanĩ mobasa erirya haguma na Esĩterĩ.

² Nʼomwami mwaswabwira Esĩterĩ oko kiro kyʼakabiri okwʼirya ĩnene ryʼebĩnyũ ati, Esĩterĩ, omugole wʼOmwami, erisaba lyawe ni ryahi kwehĩ? Neryo wasyahabwalyo. Nʼerĩbũlya lyawe nĩkĩ kwehĩ? Nomo kyangabya kihande kyʼobwami kyasyakoleka.

³ Neryo omugole wʼOmwami ye Esĩterĩ mwasũbĩrya mwabũga ati, Uwe mwami, namabya nabiribana erĩsĩmwa omo meso wawe, kandi kyamatsemesya omwami, nyihabawe engebe yage busana nʼerisaba lyage, nʼabandu betu busana nʼerĩbũlya lyage.

⁴ Kusangwa twabĩrĩgũlĩbwa, ĩngye nʼekihanda kyage, tũtĩndawe, nʼerĩĩtwa, nʼerihera. Nĩkwa kumbe twagũlĩbawa eribya bakobe bʼobulume nʼabʼobũkalĩ, nangahũnĩre, nĩkwa obũlĩge bwetu sibwangalingana nʼerĩtalya lyʼOmwami.

⁵ Neryo omwami Ahasuero mwabũlya omugole wʼOmwami ye Esĩterĩ, ati, Ko nindi, kandi ali hahi ati angalenga erĩganĩrya omo mutima wuwe erikola atya kwehĩ?

⁶ Neryo Esĩterĩ mwabũga ati, Omũnũbya nʼenzĩgũ, nina Hamanĩ mubi oyũ! Neryo Hamanĩ mubaha embere syʼOmwami nʼomugole wʼOmwami.

Erĩkwa lya Hamanĩ

⁷ Neryo omwami mwahangana omwʼigalirwa liwe erĩlũa okwʼĩlũmba ebĩnyũ mwaya omwʼirima lyʼenyũmba yʼOmwami. Na Hamanĩ naye mwahangana eriremba-lemba Esĩterĩ omugole wʼOmwami busana nʼengebe yiwe, kusangwa mwalangira omwami kwʼakandimukola nabi kutsibu.

⁸ Neryo omwami mwasubula akalũa omwʼirima lyʼenyũmba yʼobwami eriya aho babya bakapũlĩrya ebĩnyũ; na Hamanĩ iniabiriwa oko ngyingo aho Esĩterĩ abya. Neryo omwami mwabũga ati, Akandiyihambira omugole wʼOmwami nage inyine omo nyũmba kwehĩ? Nʼomugulu ekĩnywa ekyo kyalũa omo buno bʼomwami, mobaswika obũsũ bwa Hamanĩ.

⁹ Neryo Harbona omuguma wʼoko bateya bʼenyũmba yʼOmwami ababya embere syʼOmwami, mwabũga ati, Lebaya, omuti wʼerihanika omundu wʼobuli bwʼemetere makũmĩ abiri nʼĩnĩ, ogo Hamanĩ akokotaya busana na Mordekayĩ, oyo watũlago ndeke busana nʼerimira omwami, ahangene omo nyũmba ya Hamanĩ. Neryo omwami mwabũga ati, Mumuhanike kugo.

¹⁰ Ko bahanika Hamanĩ yo batya oko muti ogo akokotaya busana na Mordekayĩ. Neryo erihitana lyʼOmwami molyabondera.