Esĩterĩ 6 - AMASAKO ABOYTRTRE WA NYAMUHANGA AWAKAHULAWA MO BIBLIA

Omwami akasĩkaya Mordekayĩ

¹ Oko kiro ekyo omwami mwatabana otũgotserĩ; neryo mwahana ati bamuletere ekitabu kyʼamasako wʼemyatsi, nabo mobasomerakyo embere syʼOmwami.

² Neryo mokyabanika Ĩkĩsakĩre ngoko Mordekayĩ atũla omwatsi wa Bĩgĩtanĩ na Teresĩ, ababiri bʼoko bateya bʼenyũmba yʼOmwami, oko bategaya olũkyo, abasonda erihamba omwami Ahasuero.

³ Neryo omwami mwabũga ati, Mordekayĩ mwahabwa erĩsĩkya lyahi nʼobukulu bwahi busana nʼekĩ kwehĩ? Neryo abagombe bʼomwami abamukolera mobabũga bati Mordekayĩ mwatakolerwa kindu.

⁴ Neryo omwami mwabũga ati, Nindi yuli omo kibuga kwehĩ? Neryo Hamanĩ ĩnĩabĩrĩhĩka omo kibuga kyʼeyĩhya kyʼenyũmba yʼOmwami, eribwira omwami erihanika Mordekayĩ oko muti ogo akokotaya.

⁵ Nʼabagombe bʼomwami mobabwira omwami bati, Lebaya, Hamanĩ imene omo kibuga. Neryo omwami mwabũga ati, Ingire.

⁶ Neryo Hamanĩ mwingira. Nʼomwami mwamubwira ati, Nĩkĩ kyangakolerwa omundu oyo mwami akatsemera erĩmũsĩkya kwehĩ? Neryo Hamanĩ mwabũga omo mutima wuwe ati, Nindi oyo mwami angatsemera erĩmũsĩkya kwilaba kwĩngye kwehĩ?

⁷ Neryo Hamanĩ mwabwira omwami ati, Busana nʼomundu oyo mwami akatsemera erĩmũsĩkya,

⁸ esyongimba syʼobwami siretawe esyo mwami akanambala, nʼesabayĩrĩ eyo mwami akagendako, nʼembĩta yʼobwami eyĩkahĩrawa oko mutwe wuwe.

⁹ Nʼesyongimba esyo nʼesabayĩrĩ eyo bĩhĩrawe omo byala byʼomuguma wʼabanya-mwami omukulu wʼerĩsĩkĩbwa kwʼilaba, neryo batoke erĩambalya omundu oyo mwami akatsemera erĩmũsĩkya, amũgendaye oko sabayĩrĩ omo syonzira syʼomũyĩ, nʼerĩtũlago embere siwe, ati, Ko bikandikolerwa bitya omundu oyo mwami akatsemera erĩmũsĩkya.

¹⁰ Neryo omwami mwabwira Hamanĩ, ati, Wanguhe wĩmaye esyongimba nʼesabayĩrĩ, ngoko wabĩrĩbũga, ukolere Mordekayĩ Omũyũda yʼutya, oyo wĩkere omo lũkyo lwʼOmwami; sũsĩganaye nʼekiguma oko byosĩ ũlĩabũga.

¹¹ Neryo Hamanĩ mwĩmya esyongimba nʼesabayĩrĩ, mwambalya Mordekayĩ, nʼerĩmũgendya oko sabayĩrĩ omo nzira yʼomũyĩ, nʼerĩtũlago embere siwe ati, Ko bikandikolerwa bitya omundu oyo mwami akatsemera erĩmũsĩkya.

¹² Neryo Mordekayĩ mwasuba oko lũkyo lʼOmwami. Nĩkwa Hamanĩ mwagenda lũba oko nyũmba yiwe, inianemulira nʼomutwe wuwe ĩnĩaswĩkĩre.

¹³ Neryo Hamanĩ mwakanĩrya mũkalĩwe Zeresĩ nʼabĩra buwe bosĩ ebyosĩ ebyamũhĩkako. Neryo abandu buwe abʼamenge na mũkalĩwe Zeresĩ mobamubwira bati, Mordekayĩ oyo wabĩrĩtsũka eriwa embere siwe, amabya ini wʼekihanda kyʼAbayũda, sĩwendĩsyamũsĩnga, nĩkwa kwenene wasyawa embere siwe.

¹⁴ Neryo babere bakakama naye, abateya bʼenyũmba yʼOmwami mobahĩka, mobanguha erireta Hamanĩ okwʼirya ĩnene eryo Esĩterĩ akokotaya.