Esĩterĩ 2 - AMASAKO ABOYTRTRE WA NYAMUHANGA AWAKAHULAWA MO BIBLIA

Erisombola Omugole busana nʼomwami

¹ Nʼenyũma wʼemyatsi eyĩ, omugulu erihitana lyʼOmwami Ahasuero lyabondera, omwami mwibuka ye Vasĩtĩ, nʼekyo akola, nʼekyahamulawa busana naye.

² Neryo abagombe bʼomwami, abamukolera, mobamubwira bati, Abambesa balere babuya basondĩbawe busana nʼomwami.

³ Nʼomwami ahĩre abalangĩrĩ bʼomo bihugo byosĩ byʼobwami buwe, bahĩndanaye abambesa balere babuya bosĩ eSũsa omũyĩ mukulu omo nyũmba yʼabakalĩ, omo byala bya Hegaĩ, Omũhanganĩrĩ wʼOmwami, omũteya wʼabakalĩ; kandi bahabawe ebindu byabo byʼerĩyowanĩa.

⁴ Nʼomwana-muto oyũkatsemesaya omwami abye mugole wʼOmwami omo mwanya wa Vasĩtĩ. Neryo omwatsi oyo mwatsemesya omwami; naye mwakola atya.

⁵ Neryo habya Omũyũda muguma eSũsa omo nyũmba yʼOmwami, erĩna liwe lyabya Mordekayĩ, mugala wa Yaĩrĩ, mugala wa Semeĩ, mugala wa Kĩsĩ, Omũbenyamĩna.

⁶ Naye ahũngawa eYerũsalema haguma nʼabanyegawa, abahũngawa haguma na Yekonĩa omwami wʼeYũda, abo Nebũkadeneza omwami wʼeBabelĩ ahũnga.

⁷ Naye mwakũlya Hadasa, ye Esĩterĩ, mwali wa tata-mulere wuwe; kusangwa siabya na tata kutse nyĩnya, nʼomwana-muto oyo abya mubuya ĩnĩabũyahĩre; nʼomugulu tata wuwe na nyĩnya wuwe bahola, Mordekayĩ mwamwĩmya eribya mwali wuwe.

⁸ Neryo omugulu ekihano kyʼOmwami nʼerihamula liwe byogũbawa, nʼomugulu abana-bato bangi bakuma-kumawa eSũsa omo nyũmba yʼOmwami, omo byala bya Hegaĩ, Esĩterĩ mwatwalwa omo nyũmba yʼOmwami, omo byala bya Hegaĩ, omũteya wʼabakalĩ.

⁹ Neryo omwana-muto oyo mwamũtsemesya, nʼerĩsĩmwa. Neryo Hegaĩ mwaha Esĩterĩ ebindu byʼerĩyowanĩamo, nʼerĩgabo lyʼakalyo, haguma nʼabana-bato balinda abahabawa eribya naye bakalũa omo kikali kyʼOmwami; kandi mwamũhũmya nʼabana-bato abo, erĩmũhĩra omo nyũmba nyibuya kwilaba awandi manyũmba wʼabakalĩ.

¹⁰ Esĩterĩ abya ĩsĩalĩtamĩnyĩkalya ekihanda kiwe, kutse abʼewabo; kusangwa Mordekayĩ abya iniabirimuhana sĩamĩnyĩkalayebo.

¹¹ Na Mordekayĩ mwalendera obuli kiro embere syʼekibuga kyʼenyũmba yʼabakalĩ, aminye Esĩterĩ ngoko ali, nʼekyangamũhĩkako.

¹² Neryo omugulu endambĩ yʼobuli mwana-muto yahĩka eriya eyiri omwami Ahasuero, omugulu amabikolerwa ngʼebihano busana nʼabakalĩ emikera ĩkũmĩ nʼeyibĩrĩ, kusangwa ebiro byʼerĩyowanĩa byabo byabererera bitya, ye mikera ndatu omo magũta wʼamane-mane, nʼemikera ndatu oko bikakumba ndeke nʼoko bindu byʼerĩowanĩa byʼabakalĩ.

¹³ Neryo omo mũsĩndo oyo obuli mumbesa mwasa atya ahali omwami. Kandi mwahabwa ebyosĩ ebyo abya anzĩre erigenda nabyo akalũa omo nyũmba yʼabakalĩ, nʼeriya omo nyũmba yʼOmwami.

¹⁴ Omwana-muto oyo iniakayayo omwʼĩgolo-golo, nʼomo ngyakya iniasuba omo nyũmba yʼakabiri yʼabakalĩ, ateyĩbawe na Sasagazĩ, omũteya wʼenyũmba yʼOmwami, oyũkategaya abakalĩ; kandi ĩsĩalĩhĩka ahali omwami, omwami amatindamutsemera, kutse erimubirikira omo lĩna liwe.

¹⁵ Neryo omugulu endambĩ ya Esĩterĩ yahĩka, mwali wa Abĩhaĩlĩ tata mulere wa Mordekayĩ, oyo wamwĩmaya eribya mwali wuwe, eriya ahali omwami, mwatayĩtsũtsa ekindu bye nʼebyo Hegaĩ Omũhanganĩrĩ wʼOmwami, omũteya wʼabakalĩ ahamula. Neryo Esĩterĩ mwasĩmwa omo meso wʼabosĩ abamulolako.

Ahasuero akasĩma Esĩterĩ

¹⁶ Esĩterĩ kwʼatwalawa atya ahali omwami Ahasuero omo nyũmba yiwe yʼobwami oko mukera wʼerĩkũmĩ, go mukera wa Tebetĩ, oko mwaka wʼakalinda wʼeritabala liwe.

¹⁷ Neryo omwami mwanza Esĩterĩ kwilaba abakalĩ bosĩ, kandi mwabana erĩsĩmwa nʼerikolwa ndeke omo meso wʼOmwami kwilaba bana-bato bosĩ. Busana nʼekyo, omwami mwahĩra embĩta yʼobwami oko mutwe wa Esĩterĩ mwamuyira mo mugole wuwe omo mwanya wa Vasĩtĩ.

¹⁸ Neryo omwami mwakokotya erirya ĩnene busana nʼabakulu buwe bosĩ nʼabagombe buwe, erirya busana na Esĩterĩ; kandi mwahĩra eriluhuka busana nʼebihugo, mwaha nʼebihembo ngʼebitolere obwami.

Mordekayĩ akamĩnyĩsaya embĩta yʼerĩĩta omwami

¹⁹ Nʼomugulu abana-bato bakumirawa haguma engendo yʼakabiri, neryo Mordekayĩ abya ĩkere omo lũkyo lwʼOmwami.

²⁰ Nĩkwa Esĩterĩ abya ĩsĩalĩakanganĩa abandu buwe kutse ekihanda kiwe, ngoko Mordekayĩ amuhana; kusangwa Esĩterĩ mwakola ebyo Mordekayĩ amubwira, ngʼomugulu akũlĩbawa haguma naye.

²¹ Oko biro ebyo, omugulu Mordekayĩ abya ĩkere oko lũkyo lʼOmwami, ababiri bʼoko bateya bʼenyũmba yʼOmwami, ye Bĩgĩtanĩ na Teresĩ, abʼoko bategaya olũkyo, mobahitana, mobasonda erihamba omwami Ahasuero.

²² Nĩkwa embĩta eyo moyaminyikala uku Mordekayĩ, oyo wakangayago Esĩterĩ, omugole wʼOmwami. Na Esĩterĩ mwatũlago oko mwami omo lĩna lya Mordekayĩ.

²³ Nʼomugulu omwatsi oyo asondĩbawa, mwaminyikala kwʼali wʼekwenene, neryo abandu babiri abo mobahanikwa oko muti; nʼomwatsi oyo mwasakwa omo kitabu kyʼemyatsi embere syʼOmwami.