Esĩterĩ 1 - AMASAKO ABOYTRTRE WA NYAMUHANGA AWAKAHULAWA MO BIBLIA

Ahasuero akahĩra Ebiro bikulu

¹ Neryo emyatsi eyĩ moyabya oko biro bya Ahasuero, Ahasuero oyo yo watabala erĩtsũka eBũhĩndĩ erĩhĩka eEtĩopĩa, oko bihugo erĩgana nʼamakũmĩ abiri nʼebirinda (127).

² Nʼoko biro ebyo, omwami Ahasuero mwĩkala oko kĩtũmbĩ kiwe kyʼobwami buwe, ekyabya eSũsa omo nyũmba yʼOmwami.

³ Oko mwaka wʼakasatu wʼeritabala liwe, Ahasuero mwakokotya erirya ĩnene busana nʼabanya-mwami buwe bosĩ nʼabagombe buwe, nʼabakulu bʼemilondo bʼePersĩa nʼeMedĩa, abakulu nʼabanya-mwami bʼebihugo ebyo, ibamabibya embere siwe.

⁴ Neryo mwakanganĩa ebindu byʼobwami buwe bʼolukengerwa nʼerĩsĩkya lyʼobukulu buwe bubuya ebiro bingi, bye biro erĩgana nʼamakũmĩ munani (180).

⁵ Neryo omugulu ebiro ebĩ byahwa omwami Ahasuero mwakokotya erirya ĩnene busana nʼabandu bosĩ abakulu nʼabake-bake ababya eSũsa omo nyũmba yʼOmwami, ebiro birinda, omo kibuga kyʼeririma lyʼenyũmba yʼOmwami.

⁶ Kandi habya esyongimba sĩrerembĩre sĩhenĩrye, esyʼerangĩ yʼebiti bibisi, nʼesyʼerangĩ yʼomũnĩkĩ, esĩbohĩre omo tukoba twʼekĩtanĩ kĩbũyahĩre nʼotwʼomulingande oko syombũka syʼekĩtsĩpa nʼesyondũyĩ syʼamabwe meru-meru; nʼesyongyingo syabya syʼesyamagetsi nʼebĩtsĩpa, oko lubuga-buga lwʼengula, nʼenyeru-nyeru, nʼolwʼerangĩ yʼekisande, nʼamabwe wʼobũgũlĩ bunene.

⁷ Kandi ebĩnyũ byʼerĩpũlya byabyaho omo syondehĩ syʼesyamagetsi, esyondehĩ syabya syʼemĩsĩndo mingi, nʼebĩnyũ byʼOmwami byabyaho bingi ngʼobukama bwʼomwami ko buli.

⁸ Nʼerĩpũlya lyabya ngʼerihana lyʼemigambo; sihali oyo wahatĩkanĩbawa, kusangwa omwami iniabirihamula abakulu bosĩ bʼenyũmba yiwe, ati bakole ebyangatsemesya obuli mundu.

⁹ Na Vasĩtĩ omugole wʼOmwami mwakokotya erirya ĩnene busana nʼabakalĩ nibya omo nyũmba yʼOmwami eyabya ya Ahasuero.

¹⁰ Nʼoko kiro kyʼakalinda, omugulu omutima wʼOmwami abya akatsema omo bĩnyũ, omwami mwahamula Mehũmanĩ, na Bĩzĩta, na Harbona, na Bĩgĩta, na Abagĩta, na Zetarĩ, na Karkasĩ, abahanganĩrĩ balinda abakola embere syʼOmwami Ahasuero,

¹¹ ati balete omugole wʼOmwami, ye Vasĩtĩ embere syʼOmwami inianambite embĩta yʼobwami akangaye abandu nʼabanya-mwami obubuya buwe; kusangwa abya mubuya erilolwako.

¹² Nĩkwa omugole wʼOmwami, ye Vasĩtĩ, mwagana eriasa okwʼihamula eryo mwami alayira abahanganĩrĩ bʼenyũmba; kyo kyaleka omwami iniahitana kutsibu, nʼerihitana liwe molyakala omwisi wuwe.

Erihigwa lyʼomugole wʼOmwami ye Vasĩtĩ

¹³ Neryo omwami mwabũlya abandu bʼamenge, ababya basĩ emigulu kusangwa emitsye yʼOmwami ko yabya itya erĩbũga oko bosĩ abasĩ emigambo nʼerĩbanza,

¹⁴ ababya hakũhĩ naye ye Karsena, na Setarĩ, na Adĩmata, na Tarsĩsĩ, na Meresĩ, na Marsena, na Memũkanĩ, abanya-mwami balinda bʼePersĩa nʼeMedĩa, ababya bakahĩka hakũhĩ nʼomwami, bo babya bakulu omo bwami,

¹⁵ ati, Omo migambo tukolekĩ busana nʼomugole wʼOmwami ye Vasĩtĩ, kwehĩ? Kusangwa sialitakola erihana lyʼOmwami Ahasuero, eryo alayira abahanganĩrĩ bʼenyũmba.

¹⁶ Neryo embere syʼOmwami nʼabanya-mwami, Memũkanĩ mwabũga ati, Omugole wʼOmwami ye Vasĩtĩ sialitakola nabi oko mwami musa, nĩkwa nʼoko banya-mwami bosĩ, nʼoko bandu bosĩ abali omo bihugo byosĩ byʼOmwami Ahasuero.

¹⁷ Kusangwa omwatsi oyũ wʼomugole wʼOmwami akandiminyikala oko bakalĩ bosĩ ehosĩ inialeka abĩbabo ibaponwa omo meso wabo, omugulu kyasyakanĩbwa, kiti, Omwami Ahasuero mwahana omugole Vasĩtĩ aletawe embere siwe, nĩkwa mwatasa.

¹⁸ Na mũnabwĩre abagole bʼabanya-mwami bʼePersĩa nʼeMedĩa ababĩrĩowa omwatsi wʼomugole wʼOmwami basyawira ebiri ngʼebyo oko banya-mwami bosĩ bʼomwami. Neryo hasyahuluka epono nene nʼerihitana.

¹⁹ Kyamatsemesya omwami, ahĩre erĩhano lyʼobwami, nalyo lisakawe omo migambo yʼAbapersĩa nʼAbamedĩa siribye rikabindulwa, liti Vasĩtĩ syasyehĩka kandi embere syʼOmwami Ahasuero; nʼomwami ahe omwanya wuwe wʼobugole oko gundi mubuya kwilaba ye.

²⁰ Nʼomugulu erihamula lyʼOmwami eryo asyahĩra lyasyakanganĩbwa omo bwami buwe bosĩ kusangwa ni bunene, abakalĩ bosĩ basyaha abĩbabo abakulu nʼabake-bake erĩsĩkya.

²¹ Nʼekĩnywa ekĩ mokyatsemesya omwami nʼabanya-mwami; neryo omwami mwakola ngʼekĩnywa kya Memũkanĩ.

²² Neryo omwami mwatuma esyobarua omo bihugo byosĩ byʼOmwami, omo buli kihugo ngʼomũbũge wakyo, nʼoko buli kihanda ngʼomũbũge wakyo, obuli mundu atoke eritabala omo nyũmba yiwe, nʼerĩkanĩa ngʼomũbũge wʼabandu buwe.