Eryibuka Ebihano 7 - AMASAKO ABOYTRTRE WA NYAMUHANGA AWAKAHULAWA MO BIBLIA

Eriyisolola oko bihanda

¹ Omugulu Omwami Mukulu Nyamuhanga wenyũ asyabaleta omo kihugo eyo mũkayasĩgalyakyo, asyahiga ebihanda bingi erĩlũa embere syenyũ, Abahĩtĩ, nʼAbagĩrgasĩ, nʼAbaamorĩ, nʼAbanya Kanana, nʼAbanya Perĩsĩ nʼAbahĩvĩ nʼAbayebũsĩ, ebihanda birinda binene nʼebyʼamaka kwilaba we;

² nʼomugulu Omwami Mukulu Nyamuhanga wenyũ asyahĩrabo embere syenyũ, mwasyatĩndabo; oko mugulu oyo mwasyatogotyabo ndeke; simusyeyira endagano haguma nabo, kutse eriganyirabo;

³ kutse sĩmũsyesĩmolanaya nabo; na mwali wawe Susyemuha mugala wuwe, kutse mwali wuwe sũmũherũkĩraye mugala wawe.

⁴ Kusangwa asyabindula mugala wawe iniatanyikwama, ibakolera esindi nyamuhanga; neryo erihitana lyʼOmwami Mukulu iryabagulumirako, kandi ĩnĩabatogotya lũba.

⁵ Nĩkwa ko mwasyayirabo mutya: mwasyatulanga ebiherero byabo, nʼerisambula esyondũyĩ syabo syʼerĩramya mo bihande-bihande, nʼerikondera ahisi esyosanamu sya Asera syabo, nʼerĩhĩsya esyosanamu syabo esĩbatsĩre, syʼomo muliro.

⁶ Kusangwa uli kihanda kĩbũyĩrĩre oko Mwami Mukulu Nyamuhanga wawe; Omwami Mukulu Nyamuhanga wawe abiriyisoga we eribya kihanda kiwe-kiwe kwilaba ebihanda byosĩ ebiri omo kihugo.

⁷ Omwami Mukulu mwatabanza, kutse eriyisoga nywe kusangwa mwabya bangi omo miganzo oko bindi bihanda; kusangwa mwabya bake oko bihanda byosĩ.

⁸ Nĩkwa kusangwa Omwami Mukulu mwabanza, kandi kusangwa asonda erĩberererya eriyisema liwe eryo alahĩrĩraya abotata-kulu benyũ, ekyo kyo kyaleka Omwami Mukulu ĩnĩabalũsyayo omo byala bĩkala-kalĩre, nʼerĩbatongolya omo nyũmba yʼobukobe, omo byala bya Farao omwami wʼeMĩsĩrĩ.

⁹ Neryo Uminye ko Mwami Mukulu Nyamuhanga wawe, iye ni Nyamuhanga, Nyamuhanga wʼeritendiregula, oyũkaberereraya endagano nʼobwenge oko bamwanzĩre nʼabakabika ebihano biwe erĩhĩka oko syondengo elfu.

¹⁰ Kandi akalĩhĩsaya abakamũkwa obusu omo meso wabo, erĩheryabo; siendisyasuka oyũkamũkwa obusu, asyamuliha omo meso wuwe.

¹¹ Nenyũ mwasyateya ebihano, nʼemigambo, nʼeritswera ebyo ngabahana mũnabwĩre, erikolabyo.

¹² Neryo kusangwa mukahulikirira eritswera erĩ, nʼerĩteyalyo nʼerikolalyo, Omwami Mukulu Nyamuhanga wawe asyaberererya ũkwʼĩnywe endagano bubuya bʼolwanzo ebyo alahĩrĩraya abotata-kulu bawe.

¹³ Kandi asyabanza, kandi asyabatsumula, nʼerĩbakanyĩrĩrya; kandi asyatsumula eributa lyenyũ nibya, nʼebyalya byʼekitaka kyenyũ, engano yenyũ, nʼebĩnyũ byenyũ bihya-bihya, nʼamagũta wenyũ, nʼerĩkanyĩa esyonde syenyũ nʼehyana hyʼebihangulo byenyũ, omo kihugo ekyo alahĩrĩraya abotata-kulu wenyũ eribahakyo.

¹⁴ Mwasyabya batsumulwa kwilaba ebihanda byosĩ; sihendisyabya omugumba, omulume kutse mũkalĩ, kutse omo syonde syenyũ.

¹⁵ Kandi Omwami Mukulu asyabalũsya kwʼendwala yosĩ; kandi sĩendĩsyabahĩrako esyondwala nyibi syʼeMĩsĩrĩ nʼenguma, nĩkwa asyahĩrasyo oko bakabakwa obusu.

¹⁶ Nenyũ mwasyatinda ebihanda byosĩ ebyo Mwami Mukulu Nyamuhanga wawe asyabaha; erĩso lyawe siryesyaganyirabo; kutse susyekolera esyonyamuhanga syabo; kusangwa ekyo kyangabya kitego busana nawe.

¹⁷ Mwamabũga omo mitima yenyũ muti, Ebihanda ebĩ ni binene kwĩngye; ko nasyalũsyabo nyiti omo lubibi lwabo kwehĩ?

¹⁸ Simusyubahabo; mwasyibuka ndeke ebyo Mwami Mukulu Nyamuhanga wenyũ akola uku Farao, nʼoko Bamĩsĩrĩ bosĩ;

¹⁹ erirengwako lĩnene eryo ameso wenyũ ayilangirira, nʼebĩmĩnyĩsyo, nʼebyʼeriswekera, nʼebyala byʼamaka, nʼokuboko kũyĩsũmbĩre, ebyo Mwami Mukulu Nyamuhanga wenyũ abalũsayamo. Omwami Mukulu Nyamuhanga wenyũ kwʼasyayira atya ebihanda byosĩ ebyo mukubaha.

²⁰ Kandi Omwami Mukulu Nyamuhanga wawe asyatuma esyondwa omo katĩkatĩ kabo, erĩhĩka aho abakasĩgalira, abakababĩsama, basyaherera.

²¹ Simusyubahabo; kusangwa Omwami Mukulu Nyamuhanga wenyũ ali omo katĩkatĩ kenyũ, Nyamuhanga munene nʼoyũkaswekaya.

²² Kandi Omwami Mukulu Nyamuhanga wawe asyahiga ebihanda ebyo embere syenyũ hake-hake; ĩsĩmwendĩtĩndabo lũba, esyonyama syʼomolĩ sikasyabakanyako.

²³ Nĩkwa Omwami Mukulu Nyamuhanga wenyũ asyahoterabo embere syenyũ, kandi asyalĩba-lĩbanĩabo, erĩhĩka okwʼĩherĩbwa.

²⁴ Kandi asyahotera abami babo omo byala byenyũ, kandi mwasyaleka erĩna lyabo iryabulirana eyĩkwa oko bũtũkũ; sihali mundu oyo wasyatoka erihangana embere syenyũ, erĩhĩka aho mwasyatĩndĩrabo.

²⁵ Mwasyahĩsya esyosanamu esĩbatsĩrwe syʼesyonyamuhanga syabo omo muliro; sĩmũsyeyĩtsũtsa ebĩtsĩpa kutse esyamagetsi ebiri kusyo, kutse erĩyĩmĩryabyo, mukasyategwa mubyo; kusangwa ni byʼesyonye oko Mwami Mukulu Nyamuhanga wenyũ.

²⁶ Kandi simusyereta ebyʼesyonye omo nyũmba yenyũ, mukabya kindu kĩganĩrwe nga kyo; mwasyakigana ndeke, kandi mwasyakĩkwa obusu nʼerikigana kutsibu; kusangwa ni kindu kĩganĩrwe.