Eryibuka Ebihano 6 - AMASAKO ABOYTRTRE WA NYAMUHANGA AWAKAHULAWA MO BIBLIA

Mowe ĩnywe Baĩsraelĩ

¹ Neryo ekĩ kyo kihano, nʼemigambo nʼeritswera ebyo Mwami Mukulu Nyamuhanga wenyũ anyihana ati mũkangĩrĩrĩbawebyo, imwatoka erikolabyo omo kihugo ekyʼeyo mukasokera erĩsĩgalyakyo;

² neryo uwe, nʼomugala wawe, nʼomwitsikulu wawe imwatoka eriubaha Omwami Mukulu Nyamuhanga wawe, erĩteya emigambo yiwe yosĩ nʼebihano biwe, ebyo ngabahana ebiro byosĩ byʼengebe yawe; kandi ebiro byawe bibane eritomekerwa.

³ Neryo uwe Ĩsraelĩ, wowe, Ũtegaye erikolabyo; iwatoka erĩũwana, kandi iwabana erikanyirira kutsibu, ngoko Mwami Mukulu, Nyamuhanga wʼaboso-kulu wawe, abirikulaga, omo kihugo ekyoswĩre mwʼamasabũ nʼobuki.

⁴ Uwe Ĩsraelĩ, gowe! Omwami Mukulu ni Nyamuhanga wetu, Omwami Mukulu ni muguma musa!

⁵ Kandi wasyanza Omwami Mukulu Nyamuhanga wawe nʼomutima wawe gosĩ, nʼekĩrĩmũ kyawe kyosĩ, kandi nʼakagala kawe kosĩ.

⁶ Nʼebĩnywa ebyo ngakuhana mũnabwĩre, byasyabya omo mutima wawe;

⁷ kandi wasyakangĩrĩryabyo abana bawe nʼomũhwa, kandi wasyakanĩryabyo omugulu wĩkere omo nyũmba yawe, nʼomugulu ukalendera omo nzira, nʼoko mugulu ukagotsera, nʼomugulu ukabuka.

⁸ Kandi wasyakũndĩkabyo oko byala byawe, mo kĩmĩnyĩsyo, kandi byasyabya ngʼebitambara oko bũsũ bwawe.

⁹ Kandi wasyasakabyo oko nzeguliro syʼenyũmba yawe, nʼoko syongyo syawe.

¹⁰ Neryo Omwami Mukulu Nyamuhanga wawe asyabya abibaleta omo kihugo ekyo alahĩraya oko botata-kulu wawe, uku Abrahamũ, nʼuku Ĩsaka, nʼuku Yakobo eribaha emĩyĩ minene-minene mibuya, eyo mũtahĩmba,

¹¹ nʼamanyũmba agoswĩre mwʼebindu byowene, ebyo mũtũsũlayamo, nʼebĩrĩba ebĩtakwĩre, ebyo mutatakula, nʼamalima wʼebĩnyũ nʼemiti yʼemĩzeĩtũnĩ, eyo mutahera, neryo mwasyalya nʼerĩũgũta;

¹² neryo mũyĩtegaye mukasyibirirwa Omwami Mukulu, oyo wakũlũsaya omo kihugo kyʼeMĩsĩrĩ, erĩlũa omo nyũmba yʼobukobe.

¹³ Mwasyubaha Omwami Mukulu Nyamuhanga wenyũ; neryo mwasyamukolera, kandi mwasyalahĩrya omo lĩna liwe.

¹⁴ Simusyekwamirira esindi nyamuhanga, esyonyamuhanga syʼebihanda ebĩbatĩmbĩreko;

¹⁵ kusangwa Omwami Mukulu Nyamuhanga wawe omo katĩkatĩ kawe, ni Nyamuhanga wʼobũha; erihitana lyʼOmwami Mukulu Nyamuhanga wawe likasyabagulumirako, naye akasyabaherya erĩlũa omo kihugo.

¹⁶ Simusyerenga oko Mwami Mukulu Nyamuhanga wenyũ, ngoko mwamulengako eMasa.

¹⁷ Mwasyateya ebihano byʼOmwami Mukulu Nyamuhanga wenyũ, nʼerĩtũlago liwe, nʼemigambo yiwe, ebyo abiribahana.

¹⁸ Kandi mwasyakola ebikatunganana nʼebibuya omo meso wʼOmwami Mukulu; imwatoka erĩũwana, kandi imwabana eriingira nʼerĩsĩgalya ekihugo kyowene ekyo Mwami Mukulu alahĩrĩraya eriha abotata wenyũ,

¹⁹ erihiga esyonzĩgũ syenyũ syosĩ embere syenyũ, ngoko Mwami Mukulu abĩrĩbũga.

Eribwira abana ebitiko-tiko byʼeMĩsĩrĩ

²⁰ Omugulu mugala wawe asyakũbũlya oko mugulu akandisyasa, ati, Enzumwa yʼerĩtũlago eryo, nʼemigambo, nʼeritswera ebyo Mwami Mukulu abahana ko ni yahi kwehĩ?

²¹ Neryo wasyabwira omugala wawe uti, Twabya bakobe ba Farao eMĩsĩrĩ; neryo Omwami Mukulu mwatũlũsya eMĩsĩrĩ omo byala byʼamaka.

²² Kandi Omwami Mukulu mwakangya ebiminyikalo binene nʼebĩkala-kalĩre nʼebyʼeriswekera omo meso wetu nʼamalwa uku Farao nʼeMĩsĩrĩ nʼoko kĩtũnga kiwe kyosĩ.

²³ Kandi mwatũlũsyayo, iniatoka erituleta eno, nʼerituha ekihugo ekyo alahĩrĩraya aboso-kulu wetu.

²⁴ Neryo Omwami Mukulu mwatuhana erikola emigambo yosĩ eyĩ tubahe Omwami Mukulu Nyamuhanga wetu, busana nʼerĩũwana lyetu ebiro byosĩ, na busana nʼerilama lyetu, ngoko kiri mũnabwĩre.

²⁵ Neryo byasyabya bitunganene busana netu twamateya erikola ekihano kyosĩ ekĩ embere syʼOmwami Mukulu Nyamuhanga wetu, ngoko atuhana.