Eryibuka Ebihano 5 - AMASAKO ABOYTRTRE WA NYAMUHANGA AWAKAHULAWA MO BIBLIA

Erĩswĩbũkya ebihano

¹ Neryo Musa mwabirikira Abaĩsraelĩ bosĩ, mwabwirabo ati, Ĩnywe Baĩsraelĩ, mowe emigambo nʼebilayiro ebyo ngabũgĩra omo matwĩ wenyũ mũnabwĩre, imwabana eriigabyo, nʼerikolabyo.

² Omwami Mukulu, Nyamuhanga wetu, mwayira endagano netu eHorebũ.

³ Omwami Mukulu mwatayira endagano eyĩ nʼabotata-kulu wetu, nĩkwa haguma netu, ĩtwe, ituli hano ĩtwe bosĩ ituneho mũnabwĩre.

⁴ Omwami Mukulu mwabũga nenyũ bũsũ oko bũsũ oko kitwa omo katĩkatĩ kʼomuliro,

⁵ omugulu nahangana omo katĩkatĩ kʼOmwami Mukulu nenyũ oko mugulu oyo, erĩbakangya ekĩnywa kyʼOmwami Mukulu; kusangwa momubaha busana nʼomuliro, momutahetukira oko kitwa. Iye ati,

⁶ Ĩngye indi Mwami Mukulu Nyamuhanga wawe, oyo wabalũsaya omo kihugo kyʼeMĩsĩrĩ, omo nyũmba yʼobukobe.

⁷ Simusyebya nʼesindi nyamuhanga ate ingye.

⁸ Simusyeyiyirira esyosanamu esĩbatsĩre, kutse ekĩsosekanĩo kyahi kyʼekĩndũkĩ ekiri omo kyanya mwʼendata, kutse ekiri ahisi oko kitaka, kutse omo magetsi eyĩkwa omo kihugo.

⁹ Sĩmũsyeramayabyo, kutse erikolerabyo; kusangwa ĩngye, Mwami Mukulu, Nyamuhanga wenyũ, indi Nyamuhanga wʼobũha, erisuyira ebibi byʼabotata oko bana, nʼoko bitsikulu oko lulengo lwʼakasatu nʼoko lwʼakani oko bakanyĩkwa obusu;

¹⁰ nʼerĩkangya obubuya bwʼolwanzo oko maelfu wʼabakanyanza nʼerĩteya ebihano byage.

¹¹ Simusyehula erĩna lyʼOmwami Mukulu Nyamuhanga wenyũ lyo busa; kusangwa Omwami Mukulu siendisyamuleka bute musango oyukahula erĩna liwe lyo busa.

¹² Mũtegaye ekiro kyʼeSabato, erĩteyakyo mo kĩbũyĩrĩre, ngoko Mwami Mukulu abahana.

¹³ Ebiro ndatu mwasyahinga, nʼerikola omũbĩrĩ wenyũ gosĩ;

¹⁴ nĩkwa ekiro kyʼebirinda ni Sabato oko Mwami Mukulu Nyamuhanga wenyũ; simusyekola mukyo mo mũbĩrĩ wahi, uwe, kutse mugala wawe, kutse mwali wawe, kutse omugombe wʼobulume, kutse omugombe wawe wʼobũkalĩ, kutse ende yawe, kutse epunda yawe, kutse oko bihangulo byawe, kutse owʼehandi wawe oyuli omo butala bwawe; omugombe wawe wʼobulume nʼowʼobũkalĩ babane eriluhuka nga we.

¹⁵ Kandi wasyibuka ko wabya mugombe omo kihugo kyʼeMĩsĩrĩ, kandi Omwami Mukulu mwabalũsyayo omo byala biwe byʼamaka nʼomo kuboko kũyĩsũmbĩre; busana nʼekyo, Omwami Mukulu Nyamuhanga wenyũ mwabahana erĩteya ekiro kyʼeSabato.

¹⁶ Ũsĩkaye tata wawe na koyo wawe, ngoko Mwami Mukulu Nyamuhanga wawe abahana, ebiro byawe bibane erikanya, emyatsi yawe itoke erĩowana omo kihugo ekyo Mwami Mukulu Nyamuhanga akabaha.

¹⁷ Ĩsĩwĩta.

¹⁸ Ĩsĩwasĩngĩra.

¹⁹ Ĩsĩwĩba.

²⁰ Ĩsĩwabehekereraya mũlĩkyenyũ yʼamabehĩ.

²¹ Isiwarumawa oko mũkalĩ wa mũlĩkyenyũ; kutse ĩsĩwayĩtsũta enyũmba ya mũlĩkyenyũ, kutse eririma liwe, kutse omugombe wuwe wʼobulume, kutse omugombe wuwe wʼobũkalĩ, ende yiwe, kutse epunda yiwe, kutse ekĩndũkĩ mũlĩkyenyũ awite.

²² Ebĩnywa ebĩ Omwami Mukulu mwabũgabyo oko ndeko yosĩ nʼomulenge munene omo muliro, nʼomo kĩtũ, nʼomo mwĩrĩmya wʼenyahĩnda; neryo mwatatoleka ko bindi. Kandi mwasakabyo oko bisayi bibiri byʼamabwe, neryo mwambabyo.

²³ Kandi omugulu nowa omulenge akalũa omo mwĩrĩmya, omugulu ekitwa kyaka mʼomuliro, neryo momwasegera hakũhĩ nage, abasondolĩ bosĩ bʼebihanda byenyũ, nʼabakulu benyũ.

²⁴ Neryo momwabũga muti, Talebaya, Omwami Mukulu Nyamuhanga wetu abĩrĩtũkangya olukengerwa luwe nʼobukulu buwe, kandi twabĩrĩowa omulenge wuwe akalũa omo katĩ kʼomuliro; twabirilangira mũnabwĩre ko Nyamuhanga akabũga nʼomundu, nĩkwa iniatahola.

²⁵ Na lino twangakwĩrakĩ kwehĩ? Kusangwa omuliro munene oyũ akanditubuga; twamasyowa omulenge wʼOmwami Mukulu Nyamuhanga wetu, itukandihola.

²⁶ Kusangwa nindi oko mibiri yosĩ, oyo wabĩrĩowa omulenge wa Nyamuhanga oyuliho, akabũgĩra omo muliro, ngoko twabĩrĩowago, iniatahola kwehĩ?

²⁷ Ugende hakũhĩ, uhulikirire ebyosĩ ebyo Mwami Mukulu Nyamuhanga wetu akabũga; kandi utubwire ebyosĩ ebyo Mwami Mukulu Nyamuhanga wetu asyabũga nawe; netu twasyowabyo, nʼerikolabyo.

²⁸ Neryo Omwami Mukulu mowa omulenge wʼebĩnywa byenyũ, omugulu mwabũga nage neryo Omwami Mukulu mwambwira ati, Namowa omulenge wʼebĩnywa byʼabandu aba, ebyo baliakubwira; bamabũga ndeke ebyosĩ ebyo balĩabũga.

²⁹ Kumbe bali nʼomutima owali ngʼoyũ omwisi wabo, ibanyubaha, nʼerĩteya ebihano byage ebiro byosĩ omwatsi iniatoka erĩũwana busana nabo nʼabana babo kera na kera!

³⁰ Ugende ubwirebo uti, Musube omo mahema wenyũ.

³¹ Nĩkwa uwe uhangane hano oko mũsĩke wage, nage inatoka erikubwira ebihano byosĩ, nʼemigambo yosĩ, nʼeritswera lyosĩ, ebyo wasĩgĩsyabo, ibatoka erikolabyo omo kihugo ekyo ngahabo erĩsĩgalyakyo.

³² Neryo litya mwasyateya erikola ngoko Mwami Mukulu Nyamuhanga wenyũ abiribahana; simusyekitira oko byala byʼamali kutse oko malembe.

³³ Mwasyagendera omo nzira yosĩ eyo Mwami Mukulu Nyamuhanga wenyũ abiribahana, imwatoka eribyaho, kandi omwatsi wenyũ iniatoka erĩũwana, kandi nʼebiro byenyũ ibyatoka eribya bingi omo kihugo ekyo mwasyasĩgalya.