Eryibuka Ebihano 34 - AMASAKO ABOYTRTRE WA NYAMUHANGA AWAKAHULAWA MO BIBLIA

Oluholo lwa Musa

¹ Neryo Musa mwalũa omo bwerere bwʼeMoabũ mwahetukira oko kitwa kyʼeNebo, omo singi yʼePĩsĩga, ekiri eyisirya wʼeYerĩko. Neryo Omwami Mukulu mwamũkangya ekihugo kyosĩ kyʼeGĩleadĩ, erĩhĩka oko Danĩ,

² nʼekihugo kyosĩ kya Nafũtalĩ, nʼekihugo kya Efũraĩmũ na Manase, nʼekihugo kyosĩ kya Yũda, erĩhĩka oko Ngetsi yʼeYĩkwa,

³ nʼekihugo kyʼelutambi lwʼeyĩkwa, nʼobwerere bʼomo musya wʼeYerĩko omũyĩ wʼamabondo, erĩhĩka eZoarĩ.

⁴ Neryo Omwami Mukulu mwabũga naye ati, Ekĩ kye kihugo nalahĩrĩraya Abrahamũ, na Ĩsaka, na Yakobo, nyiti, ngandisyahakyo oko bana bawe. Namaleka iwalangirakyo omo meso wawe, nĩkwa siwendisyasokerayo.

⁵ Litya, Musa omugombe wʼOmwami Mukulu mwaholerayo omo kihugo kyʼeMoabũ ngʼekĩnywa kyʼOmwami Mukulu.

⁶ Naye mwamuta omo musya omo kihugo kyʼeMoabũ eyisirya wʼeBetĩ-peorĩ; nĩkwa sihali mundu wasĩ eyisinda yiwe erĩhĩka hatya.

⁷ Kandi Musa abya wʼemyaka erĩgana nʼamakũmĩ abiri omugulu ahola; erĩso liwe molitalola ebĩrorĩ-rorĩ, kutse amaka wuwe wʼomubiri mwatakeha.

⁸ Nʼabana ba Ĩsraelĩ mobalirira Musa yʼomo bwerere bwʼeMoabũ ebiro makũmĩ asatu; neryo ebiro byʼeririra nʼerĩsũsũmana busana na Musa mobyahwa.

⁹ Neryo Yosũa mugala wa Nũnĩ abya oswĩre nʼekĩrĩmũ kyʼamenge; kusangwa Musa ĩnĩabĩrĩmũhĩra kwʼebyala; nʼabana ba Ĩsraelĩ mobamuhulikirira, mobakola ngoko Mwami Mukulu ahana Musa.

¹⁰ Kandi mohataswahangana omũmĩnyererĩ nga Musa omo Ĩsraelĩ erĩhĩka na lino, oyo Mwami Mukulu alolako obũsũ nʼobũsũ.

¹¹ Kandi oyo Mwami Mukulu atuma erikola ebitiko-tiko nʼebiminyikalo byosĩ omo kihugo kyʼeMĩsĩrĩ, uku Farao, nʼoko bagombe buwe bosĩ, nʼoko kihugo kiwe kyosĩ,

¹² na busana nʼobũtokĩ bwʼamaka na busana nʼerĩũbahya lĩnene ryosĩ, eryo Musa akola omo meso wʼAbaĩsraelĩ bosĩ.