Eryibuka Ebihano 31 - AMASAKO ABOYTRTRE WA NYAMUHANGA AWAKAHULAWA MO BIBLIA

Musa akahana Yosũa nʼabahererĩ

¹ Neryo Musa mwayakanĩrya ebĩ nywa ebĩ byʼoko Baĩsraelĩ bosĩ,

² Neryo mwabũga nabo ati, Ĩngye indi wʼemyaka erĩgana nʼamakũmĩ abiri mũnabwĩre; sinditoka eriasa nʼerigenda; kandi Omwami Mukulu abĩrĩbũga nage ati, Siwendisyasoka eYorodanĩ eyĩ.

³ Omwami Mukulu Nyamuhanga wenyũ yo wasyasoka embere syenyũ; asyaherya ebihanda ebiri embere syenũ, ĩnywe mwasyasingulabyo. Yosũa yo mundu oyo wasyasoka embere syenyũ, ngoko Mwami Mukulu abĩrĩbũga.

⁴ Kandi Omwami Mukulu asyakolabo ngoko akola Sĩhonĩ, na Ogĩ, abami bʼAbaamorĩ nʼebihugo byabo; omugulu aherayabo.

⁵ Kandi Omwami Mukulu asyahĩrabo embere syenyũ, nenyũ mwasyakolabo ngʼebihano byosĩ ebyo nabiribahana.

⁶ Mubye nʼamaka mũsĩkaye emitima, simubahebo, kutse erititimana busana nabo, kusangwa Omwami Mukulu Nyamuhanga wawe, yukagenda nawe; siendisyakuleka, kutse erĩkũsĩganĩa.

⁷ Neryo Musa mwabirikira Yosũa, mwabũga naye omo meso wʼAbaĩsraelĩ bosĩ, ati, Ubye nʼamaka, Ũsĩkaye omutima, kusangwa wasyagenda nʼabandu aba omo kihugo ekyo, ekyo Mwami Mukulu abĩrĩlahĩrĩrya abotata-kulu wabo eriha kyobo; nawe wasyalĩsya kyobo mo mwandu.

⁸ Kandi Omwami Mukulu, yukabatangirirako; asyabya nenyũ, siendisyabahũtatira, kutse erĩbasĩganĩa. Sigubahe, kutse erĩhahũkya omutima.

⁹ Neryo Musa mwasaka emigambo eyĩ, mwahayo oko bahererĩ abagala ba Lawĩ, abaheka erĩsandũko lyʼendagano yʼOmwami Mukulu, nʼoko bakulu bosĩ ba Ĩsraelĩ.

¹⁰ Neryo Musa mwahanabo ati, Oko ndũlĩ yʼobuli myaka irinda oko mugulu ahĩrawa wʼomwaka wʼerireka emĩnda, oko kiro kikulu kyʼEbitalikirire,

¹¹ omugulu Abaĩsraelĩ bosĩ bakasa erihuluka embere syʼOmwami Mukulu Nyamuhanga wenyũ, aho asyayisoga, wasyasoma emigambo eyĩ embere syʼAbaĩsraelĩ bosĩ ĩbanemowa.

¹² Ũhĩndanaye abandu, abalume nʼabakalĩ nʼabana, nʼowʼehandi oyuli omo muhana wenyũ, batoke erĩowa, nʼeriiga, nʼeriubaha Omwami Mukulu Nyamuhanga wenyũ, batoke erikola ebĩnywa byosĩ byʼemigambo eyĩ;

¹³ kandi abana babo abatabya basĩ, basyowa, nʼeriiga eriubaha Omwami Mukulu Nyamuhanga wenyũ, ebiro byosĩ ebyo mwasyĩkala omo kihugo ekyo mũkayasĩgalaya eyisirya, mwabisoka eYorodanĩ.

Nyamuhanga akahana Musa na Yosũa

¹⁴ Neryo Omwami Mukulu mwabũga na Musa ati, Lebaya, ebiro byawe biri hakũhĩ ebyʼerihola; birikira Yosũa, mũyĩkanganaye omo Hema yʼerĩhĩndanamo, inatoka erimulaga. Neryo Musa na Yosũa mobagenda mobayĩkanganĩa omo Hema yʼerĩhĩndanamo.

¹⁵ Neryo Omwami Mukulu mwabutukira omo Hema omo ndũyĩ yʼekĩtũ, nʼendũyĩ yʼekĩtũ moyahangana omo lũkyo lwʼeHema.

¹⁶ Neryo Omwami Mukulu mwabũga na Musa ati, Lebaya, wasyeya abotata-kulu bawe; nʼabandu aba basyahangana, basyayira oburagane nʼesyonyamuhanga esĩtasĩbwe syʼekihugo eyo bakaya, basyanyĩsĩganĩa, nʼerĩtwa endagano yage eyo nabirilagana nabo.

¹⁷ Neryo erihitana lyage lyasyaka kubo oko kiro ekyo, nage nasyasĩgabo, nasyabĩsabo obũsũ bwage, nabo basyahwa, nʼebibi bingi nʼamalĩge asyahĩka kubo; kyasyaleka ĩbabũga oko kiro ekyo bati, Ebibi ebĩ sibyatatũhĩkako kusangwa Nyamuhanga wetu siali haguma netu kwehĩ?

¹⁸ Nĩkwa kwenene nasyabĩsa bʼobũsũ bwage oko kiro ekyo busana nʼebibi byosĩ ebyo bakandisyakola, kusangwa basyakebera esindi nyamuhanga.

¹⁹ Neryo lino musake Olwimbo olũ busana nenyũ, ũkangĩrĩrayelo abana ba Ĩsraelĩ; ũhĩrelo omo buno bwabo, Olwimbo olũ lutoke eribya kĩmĩnyĩsyo busana nage oko bana ba Ĩsraelĩ.

²⁰ Kusangwa omugulu nasyaletabo omo kihugo ekyo nalahĩrĩraya abotata-kulu wabo, ekyoswĩre mwʼamasabũ nʼobuki, ibamabirya nʼerĩũgũta, nʼerineneha; neryo basyabindukira esindi nyamuhanga, nʼerikolerasyo, nʼerinyiserebula, nʼerĩtwa endagano yage.

²¹ Neryo kyasyabya omugulu ebibi bingi nʼamalĩge byasyahĩka kubo, neryo Olwimbo olũ lwasyatũlago embere syabo nga mũlangĩrĩ; kusangwa silwendisyibiriranwa omo mĩnywa yʼabana babo; kusangwa nyĩnasĩ amalengekanĩa wabo ago bakaganĩraya mũnabwĩre, isindinaletabo omo kihugo ekyo nalahĩrĩrayabo.

²² Litya Musa mwasaka Olwimbo olũ ekiro ekyo kisakisa, mwakangĩrĩryalo abana ba Ĩsraelĩ.

²³ Kandi mwalaga Yosũa mugala wa Nũnĩ, ati, Ubye nʼamaka, Ũsĩkaye omutima; kusangwa wasyaleta abana ba Ĩsraelĩ omo kihugo ekyo nalahĩrĩrayabo; kandi nasyabya haguma nawe.

Musa akahĩra ekitabu kyʼemigambo oko mũsĩke wʼerĩsandũkũ lyʼendagano

²⁴ Neryo Musa abere abibuga erisaka ebĩnywa byʼemigambo eyĩ byʼomo kitabu ĩbyamabĩhĩkana ebyosĩ,

²⁵ Musa mwahana Abalawĩ, abaheka erĩsandũkũ lyʼendagano yʼOmwami Mukulu, ati,

²⁶ Mwĩmaye ekitabu ekĩ kyʼemigambo, mũhĩrekyo oko mũsĩke wʼerĩsandũkũ lyʼendagano yʼOmwami Mukulu Nyamuhanga wenyũ ikyabyaho mo mũlangĩrĩrĩ ũkwʼĩnywe.

²⁷ Kusangwa nyĩnasĩ epono yenyũ, nʼebĩkya byenyũ bitegonda; lebaya, omugulu nyikineho haguma nenyũ mũnabwĩre, mwabiriyisamambula oko Mwami Mukulu; na kwilaba aho si kutsibu enyũma wʼerihola lyage kwehĩ?

²⁸ Mũnyĩhĩndanĩraye abakulu bosĩ bʼebihanda byenyũ, nʼabasondolĩ benyũ, inatoka erĩbũga ebĩnywa ebĩ ĩmũnemwowa, kandi mubirikire olubula nʼekihugo eribya balangĩrĩ babyo.

²⁹ Kusangwa nyĩnasĩ enyũma wʼoluholo lwage mwasyayĩtsandya, nʼerĩbũnũkala oko nzira eyo nabiribahana; nʼebibi byasyabahĩkako oko biro byʼenyũma; kusangwa mwanzĩre erikola ebibi omo meso wʼOmwami Mukulu, erĩmũhĩtanĩa busana nʼemĩbĩrĩ yʼebyala byenyũ.

³⁰ Neryo Musa mwabũga ebĩnywa byʼolwimbo olũ omo matwĩ wʼendeko yosĩ ya Ĩsraelĩ, erĩhĩka okwʼihwa lyalo.