Eryibuka Ebihano 30 - AMASAKO ABOYTRTRE WA NYAMUHANGA AWAKAHULAWA MO BIBLIA

Erisuba uku Nyamuhanga

¹ Neryo omugulu emyatsi eyĩ yosĩ ikababyako, omũyĩsa nʼeritakira, ebyo nabĩrĩhĩra embere syawe, mukayibukirabyo omo katĩkatĩ kʼebihanda eyo Mwami Mukulu Nyamuhanga wenyũ abiribahigira,

² neryo mukasuba oko Mwami Mukulu Nyamuhanga wenyũ, mukakenga omulenge wuwe nʼomutima wenyũ gosĩ, nʼekĩrĩmũ kyenyũ kyosĩ, ngʼebyosĩ ngabahana mũnabwĩre, ĩnywe nʼabana benyũ;

³ neryo Omwami Mukulu Nyamuhanga wenyũ asyabasũbya erĩbalũsya oko bunyegwa, nʼeribaganyira, nʼerĩbahĩndanĩa kandi erĩbalũsya omo bihanda byosĩ eyo Mwami Mukulu Nyamuhanga wenyũ abapanza-panzira.

⁴ Abahigawa benyũ bamabya omo bihande byʼendũlĩ byʼekihugo, Omwami Mukulu Nyamuhanga wenyũ asyabakuma-kuma, neryo asyabendayo nʼerĩbasũbya eno.

⁵ Kandi Omwami Mukulu Nyamuhanga wenyũ asyabaleta omo kihugo ekyo abotata-kulu wenyũ basĩgalaya, nenyũ mwasyasĩgalyakyo; naye asyabaha omũyĩsa, nʼerĩbakanyĩrĩrya kwilaba abotata-kulu wenyũ.

⁶ Kandi Omwami Mukulu Nyamuhanga wenyũ asyabanĩa emitima yenyũ, nʼemitima yʼabana benyũ erianza Omwami Mukulu Nyamuhanga wenyũ nʼomutima wenyũ gosĩ, nʼekĩrĩmũ kyenyũ kyosĩ, imwatoka eribyaho.

⁷ Omwami Mukulu Nyamuhanga wenyũ asyahĩra amatakire aya gosĩ oko syonzĩgũ syenyũ, nʼoko bakabakwa obusu, ababendereraya.

⁸ Nenyũ mwasyowa kandi omulenge wʼOmwami Mukulu, nʼerikola ebihano biwe byosĩ ebyo ngabahana mũnabwĩre.

⁹ Neryo Omwami Mukulu Nyamuhanga wenyũ asyabaha omũyĩsa ndeke omo mũbĩrĩ gosĩ wʼebyala byenyũ, nʼabana bʼomubiri wenyũ, nʼolubuto lwʼesyonde syenyũ, nʼembuto yʼekitaka kyenyũ, kusangwa Omwami Mukulu asyaswabatsemera omo mũyĩsa, ngoko atsemera abotata-kulu wenyũ;

¹⁰ mwamowa omulenge wʼOmwami Mukulu Nyamuhanga wenyũ, erĩteya ebihano biwe nʼemigambo yiwe ebĩsakĩre omo kitabu ekĩ kyʼemigambo; mwamabindukira Omwami Mukulu Nyamuhanga wenyũ nʼomutima wenyũ gosĩ, nʼekĩrĩmũ kyenyũ kyosĩ.

¹¹ Kusangwa ekihano ekĩ ekyo ngabahana mũnabwĩre, sĩkĩbalemĩre, kutse sikiri hali.

¹² Sikiri elubula, muti mwangabũga muti, Nindi wasyatuhetukira elubula, nʼeritwenderakyo, nʼerĩtowĩsyakyo, itwatoka erikolakyo kwehĩ?

¹³ Kutse sikiri eyisirya oko ngetsi muti mwangabũga muti, Nindi wasyatusokera engetsi, nʼeritwenderakyo, nʼerĩtowĩsyakyo kwehĩ? itwatoka erikolakyo.

¹⁴ Nĩkwa ekĩnywa ekyo kiri hakũhĩ nawe, kiri omo buno bwawe, nʼomo mutima wawe, imwatoka erikolakyo.

¹⁵ Lebaya, nabĩrĩhĩra embere syenyũ mũnabwĩre engebe nʼomũyĩsa, nʼoluholo nʼekibi;

¹⁶ litya nyiti ngabahana mũnabwĩre erianza Omwami Mukulu Nyamuhanga wenyũ, erigendera omo syonzira siwe, nʼerĩteya ebihano biwe nʼemigambo yiwe nʼeritswera liwe, imwatoka eribyaho nʼerikanyirira, kandi Omwami Mukulu Nyamuhanga wenyũ atoke eribaha omũyĩsa omo kihugo ekyo mukayamo erĩsĩgalyakyo.

¹⁷ Nĩkwa omutima wawe amabũnũkala, ĩsĩmũlĩowa, nĩkwa ukakurwa nʼerĩramya esindi nyamuhanga, nʼerikolerasyo;

¹⁸ ngabatũlĩrago mũnabwĩre, ko mwasyahera kwenene. Simwendisyakanyĩrĩrya ebiro byenyũ omo kihugo, eyo mukasokera eYorodanĩ eriingiramo nʼerĩsĩgalyakyo.

¹⁹ Ngabirikira olubula nʼekihugo eribya balangĩrĩ benyũ mũnabwĩre, ngoko nabĩrĩhĩra embere syenyũ engebe nʼoluholo, eritsumula nʼeritakira. Neryo muyisoge engebe, imwatoka eribyaho, ĩnywe nʼabana benyũ;

²⁰ erianza Omwami Mukulu Nyamuhanga wenyũ, erĩowa omulenge wuwe, nʼerimumakirira; kusangwa eyĩ ni ngebe yenyũ, nʼobungi bwʼebiro byenyũ; imwatoka erĩĩkala omo kihugo ekyo Mwami Mukulu alahĩrĩraya abotata-kulu wenyũ, uku Abrahamũ, nʼuku Ĩsaka, nʼuku Yakobo, eriha kyobo.