Eryibuka Ebihano 28 - AMASAKO ABOYTRTRE WA NYAMUHANGA AWAKAHULAWA MO BIBLIA

Omũyĩsa wʼoyũkowa

¹ Neryo mwamahulikirira ndeke omulenge wʼOmwami Mukulu Nyamuhanga wenyũ, erikwamirira erikola ebihano biwe byosĩ ebyo ngabahana mũnabwĩre, Omwami Mukulu Nyamuhanga wenyũ asyabahĩra endata oko bihanda byosĩ byʼekihugo.

² Kandi emĩyĩsa yosĩ eyĩ yasyabahĩkako, nʼerĩbeya, mwamahulikirira omulenge wʼOmwami Mukulu Nyamuhanga wenyũ.

³ Mwasyabya nʼomũyĩsa eka, kandi mwasyabya nʼomũyĩsa okolĩ.

⁴ Mwasyabya nʼomũyĩsa omo bana bʼomubiri wenyũ, nʼembuto yʼekitaka kyenyũ, nʼolubuto lwʼesyonyama syenyũ, nʼerikanya lyʼesyonde syenyũ, nʼehyana hyʼesyombũlĩ syenyũ.

⁵ Ebitiri byenyũ byasyabya nʼomũyĩsa nʼebindu byʼeritsumbiramo byenyũ.

⁶ Mwasyabya nʼomũyĩsa omugulu mukingira, kandi mwasyabya nʼomũyĩsa omugulu mukahuluka.

⁷ Omwami Mukulu asyaleka esyonzĩgũ syenyũ ĩsyakĩndwa embere syenyũ omugulu bakababambira; kirako omo nzira nguma, kandi syasyabasaga omo nzira sirinda.

⁸ Omwami Mukulu asyahana omũyĩsa omo bigona byenyũ nʼomo byosĩ mũkahĩra kwʼebyala byenyũ; kandi asyabatsumula omo kihugo ekyo Mwami Mukulu Nyamuhanga wenyũ akabaha.

⁹ Omwami Mukulu asyabayira eribya kihanda kĩbũyĩrĩre busana naye, ngoko abĩrĩbalahĩrĩrya; mwamateya ebihano byʼOmwami Mukulu Nyamuhanga wenyũ, nʼerirendera omo nzira siwe.

¹⁰ Nʼebihanda byosĩ byʼekihugo byasyalangira ko mwamahulwa omo lĩna lyʼOmwami Mukulu; kandi basyabubaha.

¹¹ Kandi Omwami Mukulu asyabakanyĩrya ebibuya, omo bana bʼemibiri yenyũ, nʼomo lubuto lwʼebihangulo byenyũ, nʼomo mbuto yʼekitaka kyenyũ, omo kihugo ekyo Mwami Mukulu alahĩrĩraya abotata-kulu wenyũ eribahakyo.

¹² Omwami Mukulu asyabakingulira olubula obubiko buwe bowene, eribaha embũla yʼekihugo kyawe omo kirimo kyayo, nʼeritsumula omũbĩrĩ gosĩ wʼebyala byenyũ; kandi mwasyabweka ebihanda bingi, nĩkwa ĩnywe simusyeyibweka.

¹³ Kandi Omwami Mukulu asyabayira mo mutwe butsira mukira; kandi mwasyabya endata hasa, simwendisyabya eyĩkwa, mwamahulikirira ebihano byʼOmwami Mukulu wenyũ, ebyo ngabahana mũnabwĩre, erikwamirira nʼerikolabyo,

¹⁴ simwendisyakitira ehandi erĩlũa oko bĩnywa byosĩ ebyo ngabahana mũnabwĩre, eriya oko byala byʼamali, kutse ebyʼamalembe, eriyakwamirira esindi nyamuhanga erikolerasyo.

Eritakira

¹⁵ Nĩkwa mwamatindahulikirira omulenge wʼOmwami Mukulu Nyamuhanga wenyũ, erikwamirira erikola ebihano biwe byosĩ nʼemigambo yiwe eyo ngababwira mũnabwĩre, neryo amatakire gosĩ aya asyabahĩkako, nʼeribatanga.

¹⁶ Mwasyabya batakirwa eka, kandi mwasyabya batakirwa okolĩ.

¹⁷ Ekitiri kyawe kyasyatakirwa nʼekĩbĩnĩryo kyenyũ.

¹⁸ Abana bʼomubiri wenyũ basyatakirwa, nʼesyombuto syʼekitaka kyenyũ, erikanya lyʼesyonde syenyũ, nʼehyana hyʼesyombũlĩ syenyũ.

¹⁹ Mwasyabya batakirwa omugulu mukingira, kandi mwasyabya batakirwa omugulu mukahuluka.

²⁰ Omwami Mukulu asyabatumira obutakire, erĩsĩngwa nʼerikungwa, omo byosĩ mũkahĩra kwʼebyala byenyũ erikola, erĩhĩka aho mwasyahererĩbwa, nʼerĩhĩka aho mwasyaherera lũba; busana nʼebibi byʼemikolere yenyũ, eyaleka ĩmwanyĩsĩga.

²¹ Omwami Mukulu asyabamakĩrĩrya kwʼobũkonĩ bwʼakasũsũ, erĩhĩka aho asyababugirira omo kihugo, ekyo mukingiramo erĩsĩgalyakyo.

²² Omwami Mukulu asyabaswĩrya omo ndwala yʼekĩkũba ekĩkalĩre, nʼekĩhũhanĩ, nʼekĩhĩmbo, nʼerĩhũhana lyʼerigulumira, nʼomo mũyalĩ, nʼomo mwisi munene, nʼekĩtebeya; byasyakukwama erĩhĩka aho wasyaherera.

²³ Nʼobũtũkũ obuli endata oko mutwe wenyũ bwasyabya mulinga, nʼekitaka ekiri yĩkwa kuwe kyasyabya kyuma.

²⁴ Omwami Mukulu asyayira embũla yʼekitaka kyenyũ mo yĩsyano nʼolũtũtũ; byasyabawako bĩkalũa elubula, erĩhĩka aho mwasyahererĩbwa.

²⁵ Omwami Mukulu asyabaswĩrĩrya embere wʼesyonzĩgũ syenyũ; mwasyahuluka omo nzira nguma, nʼerisagira omo syonzira sirinda; kandi mwasyagusangwa eyĩ nʼeyĩ omo katĩkatĩ kʼamami gosĩ wʼekihugo.

²⁶ Nʼebĩnda byenyũ byasyabya kalyo busana nʼesyonyonyũ syosĩ syʼomo kyanya, na busana nʼesyonyama syosĩ syʼekihugo; sihendisyabya oyũkũbahĩsayasyo sĩkalũaho.

²⁷ Omwami Mukulu asyabaswĩrya nʼebihute byʼeMĩsĩrĩ, nʼomo bĩhĩmbo, nʼebinyora, nʼobuhere obutebala.

²⁸ Omwami Mukulu asyabaswĩrya erĩsĩre, nʼendĩmatĩme, nʼerisweka lyʼomutima;

²⁹ neryo mwasyamata-mata omwʼitungi, ngʼendĩmatĩme kwʼikamata-mata omo mwĩrĩmya, simwendisyabana omũyĩsa omo syonzira syenyũ; mwasyanũbĩbwa nʼerĩhũngwa ebiro byosĩ, ihatabya oyũkabalamaya.

³⁰ Mwasyasĩmolya omũkalĩ, nʼogundi mundu asyamũtsandya; ĩmwahĩmba enyũmba, ĩmũtĩkala mũyo; mwasyahera eririma lyʼebĩnyũ, imutatunda omo bĩgũma byalyo.

³¹ Esyonde syenyũ syʼobulume syasyĩtĩrwa omo meso wenyũ, isimwendirya kusyo; epunda yawe yasyanyegwa omo meso wawe, ĩgũtasũbũlĩrĩbwayo; embũlĩ yawe yasyahabwa esyonzĩgũ syawe, isiwendisyabana owʼerĩkũlamya.

³² Abagala bawe nʼabali bawe basyahabwa oko kindi kihanda; nʼameso wenyũ asyasamalirabo, nʼerĩkwa bʼolukando nĩkwa sihali mwatsi mwasyatoka erikola.

³³ Embuto yʼekitaka kyenyũ, nʼemĩbĩrĩ yenyũ yosĩ, byasyalibwa nʼekihanda ekyo mũtasĩ; nenyũ mwasyanũbĩbwa nʼerĩtũndũlwa ebiro byosĩ.

³⁴ Mwasyayirwa mo basĩre busana nʼebyo ameso wenyũasyalangira.

³⁵ Omwami Mukulu asyabaswĩrya oko marwĩ nʼoko mihimbi omo bihute bĩkalĩre, ebyo mutetoka erĩlamya, erĩtsũka oko bulyatiro bwʼebisando byenyũ erĩhĩka oko kahũlĩ-hũlĩ kʼomutwe wenyũ.

³⁶ Omwami Mukulu asyabatwala, uwe, nʼomwami oyo mwasyayĩsĩngĩrya, oko kihanda mutabya mwasĩ kutse abotata-kulu wenyũ; nʼero mwasyakolera esindi nyamuhanga, esyʼemiti nʼamabwe.

³⁷ Nenyũ mwasyabya nye, nʼomũsyo, nʼomũsĩnĩngũlĩ, omo katĩkatĩ kʼebihanda byosĩ ebyo Mwami Mukulu asyabasondolera.

³⁸ Mwasyahekera esyombuto nyingi omwʼirima, kandi mwasyahulula hike; kusangwa esyongĩke syasyabugasyo.

³⁹ Mwasyahera amalima wʼebĩnyũ nʼeririmirayo, nĩkwa sĩmwendĩsyapũlya oko bĩnyũ kutse erioha ebĩgũma; kusangwa enzokombĩ yasyalyabyo.

⁴⁰ Mwasyabya nʼemiti yʼemĩzeĩtũnĩ omo mitano yenyũ yosĩ, nĩkwa sĩmwendĩsyayĩhakabya oko magũta wayo; kusangwa emĩzeĩtũnĩ yenyũ yasyalagala.

⁴¹ Mwasyabuta abagala nʼabali, nĩkwa sibendisyabya benyũ; kusangwa basyaya omo bukobe.

⁴² Engĩke yasyalya emiti yenyũ yosĩ nʼembuto yʼekitaka kyenyũ.

⁴³ Owʼehandi oyuli omo katĩkatĩ kenyũ asyayĩhamya endata kwilaba nywe; nĩkwa ĩnywe mwasyabera erisuba eyĩkwa nʼakandi eyĩkwa.

⁴⁴ Asyababweka, nenyũ simwendisyamubweka; iye asyabya mutwe nenyũ mwasyabya mukira.

⁴⁵ Nʼamatakiro gosĩ aya asyabahĩkako, nʼeribakwama, nʼerĩbahĩkako erĩhĩka aho mwasyahererĩbwa; kusangwa momutahulikirira erĩowa Omwami Mukulu Nyamuhanga wenyũ, erĩteya ebihano nʼemigambo yiwe, ebyo abahana.

⁴⁶ Nabyo byasyabya kwĩnywe ekiminyikalo nʼebyʼeriswekera, nʼoko bana benyũ kera na kera.

⁴⁷ Kusangwa momutakolera Omwami Mukulu Nyamuhanga wenyũ nʼobutseme nʼeritsanga lyʼomutima, busana nʼobungi bwʼebindu byosĩ;

⁴⁸ busana nʼekyo mwasyakolera esyonzĩgũ syenyũ esyo Mwami Mukulu asyatuma eribagotera, omo nzala, nʼenyota, nʼomo ndũmbũ, nʼeribula ebindu byosĩ; kandi asyahĩra engomo yʼekyuma oko bĩkya byenyũ erĩhĩka aho asyabahererya.

⁴⁹ Omwami Mukulu asyaleta ekihanda kyʼehali erilwa nenyũ, ekĩkalũa oko ndũlĩ yʼekihugo, ngʼerĩsamba likaguluka; ekihanda ekyo mutendisyaminya omũbũge wakyo;

⁵⁰ ekihanda kyʼameso awakalĩre ekitendisyakenga abasyakulu, kutse eriganyira abalere,

⁵¹ kandi kyasyalya enhyana hyʼebihangulo byenyũ nʼembuto yʼekitaka kyenyũ erĩhĩka aho mwasyahererĩbwa; kandi sĩkyendĩsyabasĩgĩra emyaka yʼengano, nʼebĩnyũ bihya-bihya, kutse amagũta, nʼebikakanyirira byʼesyonde syenyũ, kutse ehirere hyʼesyombũlĩ syenyũ, erĩhĩka aho basyabahererya.

⁵² Kandi basyabagotera omo mĩyĩ yenyũ yosĩ, erĩhĩka aho amahĩmbo wenyũ awagotere amali-mali, ago mukayiketera, asyakumbagalira, omo kihugo kyenyũ kyosĩ, ekyo Mwami Mukulu Nyamuhanga wenyũ abiribaha.

⁵³ Kandi mwasyalya ehyana hyʼomubiri wenyũ, esĩswĩ syʼabagala benyũ nʼabali benyũ, abo Mwami Mukulu Nyamuhanga wenyũ abiribaha, omwʼigotera nʼomo bũlĩge obo esyonzĩgũ syenyũ syasyabagalyamo.

⁵⁴ Omulume oyuli molo-molo omo katĩkatĩ kenyũ, nʼoyuhehere kutsibu, erĩso liwe lyasyabya libi uku mugala wabo, nʼoko mũkalĩ oyo anzĩre, nʼoko bakasĩgalira oko bana buwe abamũsĩgalĩreko;

⁵⁵ kikaleka iniataha esĩswĩ syʼabana buwe abo asyalya oko muguma wa kubo, kusangwa siawite ekyo asĩgere nakyo, omwʼigoterwa nʼomo bũlĩge obo enzĩgũ yenyũ yasyabagalyamo omo mĩyĩ yenyũ yosĩ.

⁵⁶ Omũkalĩ omo katĩkatĩ kenyũ omolo nʼoyuhehere, oyute wangalenga erĩhĩra obulyatiro bwʼekisando kiwe oko kitaka busana nʼerihehera nʼobolo buwe, erĩso liwe lyasyabya ibi okwʼĩba oyo anzĩre, nʼoko mugala wuwe nʼuku mwali wuwe,

⁵⁷ nʼoko bĩkalũa omo nda omwana amabibutwa, nʼoko bana buwe abo asyabuta; kusangwa asyalyabo bũbĩso-bĩso busana nʼeribula ebindi bindu byosĩ, omwʼigoterwa nʼomo bũlĩge obo enzĩgũ yenyũ yasyabagalyamo omo mĩyĩ yenyũ.

⁵⁸ Mwamatindianza erikwamirira erikola ebĩnywa byosĩ byʼemigambo eyĩ ebĩsakĩre omo kitabu ekĩ, erikenga erĩna erĩ ryʼolukengerwa nʼeryʼerĩũbahya, Omwami Mukulu Nyamuhanga wenyũ,

⁵⁹ neryo Omwami Mukulu asyaleta ebĩhũnzo ũkwʼĩnywe, ebyʼeriswekera, nʼoko bana benyũ, bye bĩhũnzo ebĩkalĩre nʼebyʼomugulu muli, nʼesyondwala sĩkalĩre, nʼesyomugulu muli.

⁶⁰ Kandi asyabaletako esyondwala syosĩ syʼeMĩsĩrĩ esyakwĩta obuba; nasyo syasyabamakirirako.

⁶¹ Kandi obuli ndwala, nʼobuli kĩhũnzo, ebĩtasakĩre omo kitabu kyʼekihano ekĩ, Omwami Mukulu asyakuleterasyo, erĩhĩka aho mwasyahererĩbwa.

⁶² Nenyũ mwasyasĩgalira mo bake okwʼiganza, nomo mwanabya bangi ngʼesyongũnũnũ syʼomo kyanya; kusangwa momutahulikirira omulenge wʼOmwami Mukulu Nyamuhanga wenyũ.

⁶³ Neryo ngoko Mwami Mukulu abatsemera eribakola ebibuya, nʼerĩkũkanyĩa, litya Omwami Mukulu asyabatsemera erĩbaherya, nʼeribabugaho; nenyũ mwasyabakulwa omo kihugo ekyo mukingiramo erĩsĩgalyakyo.

⁶⁴ Kandi Omwami Mukulu asyabapanzapanza omo katĩkatĩ kʼebihanda byosĩ erĩtsũka oko ndũlĩ nguma yʼekihugo erĩhĩka oko yindi ndũlĩ yʼekihugo; nʼeyo mwasyakolera esindi nyamuhanga, esyo mutabya mwasĩ, uwe kutse abotata-kulu wawe, esyʼemiti nʼamabwe.

⁶⁵ Nʼomo katĩkatĩ kʼebihanda ebĩ simwendisyabana erihumula, nʼeyo siyendisyabya obuluhukiro busana nʼobulyatiro bwʼebisando byenyũ; nĩkwa eyo Mwami Mukulu asyabaha omutima wʼerititimana, nʼameso awakatĩma-tĩma, nʼomutima owakalũa omo nda.

⁶⁶ Nʼengebe yenyũ yasyatika-tika embere syenyũ; kandi mwasyũbaha omo kiro nʼomwʼitungi, kandi mwasyatika-tikira engebe yenyũ.

⁶⁷ Omo ngyakyangyakya mwasyabũga muti, Kumbe nĩ ʼgolo-golo! Nʼomwʼĩgolo-golo mwasyabũga muti, Kumbe ni ngyakya-ngyakya! busana nʼeriubaha lyʼomutima wenyũ eryo mukubaha, busana nʼeriyilangirira eryo ameso wenyũ asyalangira.

⁶⁸ Kandi Omwami Mukulu asyabasũbya eMĩsĩrĩ omo mato, omo nzira eyo nakubwira nyiti, Simwendisyalola kuyo kandi. Nʼeyo mwasyayĩgũlya oko syonzĩgũ syenyũ mo bakobe bʼobulume nʼabakobe bʼobũkalĩ, kandi sihali mundu oyo wasyabagula.