Eryibuka Ebihano 27 - AMASAKO ABOYTRTRE WA NYAMUHANGA AWAKAHULAWA MO BIBLIA

Erĩhĩmbĩra Nyamuhanga ekiherero

¹ Kandi Musa nʼabakulu bʼAbaĩsraelĩ mobahana abandu bati, Mũtegaye ebihano byosĩ ebyo ngabahana mũnabwĩre.

² Neryo oko kiro mwasyasoka eYorodanĩ mũkahĩka omo kihugo ekyo Mwami Mukulu Nyamuhanga wenyũ akabaha, mwasyayisingikira amabwe manene-manene, nʼerihoma kwʼembemba.

³ Kandi mwasyasaka kugo ebĩnywa byosĩ byʼemigambo eyĩ, omugulu mwamabisoka; imwatoka eriingira omo kihugo ekyo Mwami Mukulu Nyamuhanga wenyũ akabaha, ekihugo kyoswĩre mwʼamasabũ nʼobuki, ngoko Mwami Mukulu Nyamuhanga wʼabotata-kulu wenyũ abiribalaga.

⁴ Neryo omugulu mwamabisoka eYorodanĩ, mwasyasingika amabwe aya, ngabahana mũnabwĩre, oko kitwa kyʼeEbalĩ, kandi wasyahoma kwʼembemba.

⁵ Nʼaho mwasyahĩmbaho ekiherero oko Mwami Mukulu Nyamuhanga wenyũ, ekiherero kyʼamabwe; simwendĩsyakolesyakyo ko kyuma.

⁶ Mwasyahĩmba ekiherero kyʼOmwami Mukulu Nyamuhanga wenyũ omo mabwe atabatsĩre; kandi mwasyaherera kukyo kwʼamahere wʼerĩokererya oko Mwami Mukulu Nyamuhanga wenyũ.

⁷ Kandi mwasyahonga amahere wʼobuholo, kandi mwasyaliraho; kandi mwasyatsema embere syʼOmwami Mukulu Nyamuhanga wenyũ.

⁸ Neryo mwasyasaka oko mabwe ayo ebĩnywa byosĩ byʼemigambo eyĩ, ibyaminyikala ndeke.

Erihana Abaĩsraelĩ

⁹ Neryo Musa nʼabahererĩ Abalawĩ mobabũga nʼAbaĩsraelĩ bosĩ bati, Uwe Ĩsraelĩ, mubye bũkũtũ, muhulikirire. Mũnabwĩre mwabiribya kihanda kyʼOmwami Mukulu Nyamuhanga wenyũ.

¹⁰ Neryo mwasyakenga omulenge wʼOmwami Mukulu Nyamuhanga wenyũ nʼerikola ebihano biwe, nʼemigambo yiwe ebyo ngabahana mũnabwĩre.

¹¹ Neryo Musa mwahana abandu ekiro ekyo, ati,

¹² Aba basyahangana oko kitwa kyʼeGerĩzĩmũ eritsumula bandu, omugulu mukasoka eYorodanĩ: Sĩmeonĩ, na Lawĩ, na Yũda, na Ĩsakarĩ, na Yosefũ, na Benyamĩna.

¹³ Nʼaba basyahangana oko kitwa kyʼEbalĩ busana nʼeritakira: Rũbenĩ, Gadĩ, na Aserĩ, na Zebũlũnĩ, Danĩ, na Nafũtalĩ.

¹⁴ NʼAbalawĩ basyasũbĩrya, nʼeribwira abalume ba Ĩsraelĩ bosĩ nʼomulenge munene, bati,

Eritakira abakahalaya

¹⁵ Omundu oyũkakokotaya esanamu yʼeribatsa kutse eyʼerĩnũnĩa, atakirawe, ni nye oko Mwami Mukulu, omũbĩrĩ wʼebyala byʼomũgotolĩ, kandi akasingikayo omo bũbĩso-bĩso. Nʼabandu bosĩ basyasũbĩrya bati, Amina.

¹⁶ Oyukapona ĩse wuwe kutse nyĩnya wuwe atakirawe. Nʼabandu bosĩ basyabũga bati, Amina.

¹⁷ Nʼoyukahandula olubibi lwa mũlĩkyabo atakirawe. Nʼabandu bosĩ basyabũga bati, Amina.

¹⁸ Oyũkatalaya endĩmatĩme erĩlũa omo nzira atakirawe. Nʼabandu bosĩ basyabũga bati, Amina.

¹⁹ Oyũkalĩba-lĩbanaya erĩbanza lyʼowʼehandi, nʼengũbĩ, nʼomũkwakalĩ atakirawe. Nʼabandu bosĩ basyabũga bati, Amina.

²⁰ Oyukagotsera nʼomũkalĩ wʼĩse wuwe atakirawe, kusangwa abiriswikula olukimba lwʼĩse wuwe. Nʼabandu bosĩ basyabũga bati, Amina.

²¹ Oyukagotsera nʼomũsĩndokĩ wʼenyama atakirawe. Nʼabandu bosĩ basyabũga bati, Amina.

²² Oyukagotsera na mwali wabo, ye mwali wʼĩse, kutse mwali na nyĩnya wuwe, atakirawe. Nʼabandu bosĩ basyabũga bati, Amina.

²³ Oyukagotsera na nyĩnyĩ-byala atakirawe. Nʼabandu bosĩ basyabũga bati, Amina.

²⁴ Oyũkaswĩraya mũlĩkyabo yʼomo bũbĩso-bĩso atakirawe. Nʼabandu bosĩ basyabũga bati, Amina.

²⁵ Oyũkĩmaya ekyũtũlĩro busana nʼeriha omundu oyute ko musango atakirawe. Nʼabandu bosĩ basyabũga bati, Amina.

²⁶ Oyũteberereraya ebĩnywa byʼemigambo eyĩ erikolabyo atakirawe. Nʼabandu bosĩ basyabũga bati, Amina.