Eryibuka Ebihano 25 - AMASAKO ABOYTRTRE WA NYAMUHANGA AWAKAHULAWA MO BIBLIA

Erĩswĩrya ogʼolubanza

¹ Hamabya obuhaka omo katĩkatĩ kʼabandu, bakahĩka okwʼisoha bakasohabo, neryo bamasĩnganĩsya abatunganene, nʼerĩwĩsyalo ababi.

² Neryo omundu mubi amabya atolere erĩswĩrĩbwa, omũtswerĩ asyamulambika ahisi, aswĩrĩbawe esyofĩmbo embere syʼameso wuwe, ngʼeriganza lyʼebibi biwe ko biri.

³ Anganamuhwitsya esyofĩmbo makũmĩ ani, syasyelaba ukwʼesyo; akasyamũswĩrya esyofĩmbo nyingi kwʼaho, neryo omugala wenyũ akasyabya mubi ukʼuwe.

⁴ Simusyeboha obuno bwʼenume yʼende omugulu ikalyatanga engano.

⁵ Abasubeneko bamĩkala haguma, nʼomuguma wa kubo akahola, isiawite mugala, omũkalĩ wʼomũholĩ syasyehĩkĩbawa nʼowʼehandi; mugala wabo ĩba wuwe asyamwĩmya, nʼerĩmũhĩkya mo mũkalĩwe, nʼerimukolera ngoko ĩba wuwe angamukolere.

⁶ Neryo akambere ako asyabuta kasyabya omo mwanya wa mugala wabo oyo wahola nʼomo lĩna liwe, erĩna liwe sĩrĩrĩmĩbawe omo Ĩsraelĩ.

⁷ Kandi omundu amatindanza erĩsĩgalya muka mugala wabo, neryo omũkalĩ wa mugala wabo oyo asyaya oko lũkyo lwʼomũyĩ oko bakulu ĩnĩabũga ati, Mugala wabo ĩbage akagana erĩmanĩa erĩna lya mugala wabo lyʼomo Baĩsraelĩ; sĩanzĩre erinyikolera omũbĩrĩ wa mugala wabo ĩbage.

⁸ Neryo abakulu bʼomũyĩ wuwe basyamubirikira, nʼerĩkanĩa naye; neryo amahangana, akabũga ati, Sĩnyanzĩre erĩmwĩmya;

⁹ neryo omũkalĩ wa mugala wabo asyasegera embere syʼabakulu, kandi asyalũsya engendero yiwe oko kisando kiwe, kandi asyamũtwira kwʼamatande omo bũsũ; neryo asyasũbĩrya ati, Ko kyasyakolwa kitya oko mundu oyũtehĩmbĩra mugala wabo enyũmba yiwe.

¹⁰ Nʼerĩna liwe omo Baĩsraelĩ lyasyahulwa mo Nyũmba yʼoyo walũsĩbawa kwʼengendero.

¹¹ Neryo omugulu abalume babiri bakalwa, omundu na mũlĩkyabo, nʼomũkalĩ wʼomuguma akasegera hakũhĩ erĩlamya ĩba wuwe omo byala byʼoyũkamũswĩraya, akahĩra ebyala biwe akamuhamba omo bulume;

¹² neryo mwasyatwa ebyala biwe, erĩso lyawe sirisyeganyira.

¹³ Simusyebya nʼebĩrengĩ emihandamihanda yʼekĩlo omwʼĩsaho yawe, ekinene, nʼekike.

¹⁴ Simusyebya nʼebĩrengĩ emihanda-mihanda ekinene nʼekike omo nyũmba yenyũ.

¹⁵ Mwasyabya nʼekĩlo ekĩhĩkene nʼekitunganene; mwasyabya nʼekĩrengĩ kihikene nʼekitunganene; ebiro byawe bitoke erikanya omo kihugo ekyo Mwami Mukulu Nyamuhanga wenyũ akabaha.

¹⁶ Kusangwa abosĩ abakakola emyatsi eyiri ngʼeyĩ, abakakola ebitatunganene, ni nye oko Mwami Mukulu Nyamuhanga wenyũ.

¹⁷ Mwibuke ekyo Amalekĩ abakolera omo nzira mwabyamo mũkalũa eMĩsĩrĩ;

¹⁸ ngoko ahĩndana nenyũ omo nzira, kandi mwaswĩrya abandu benyũ ababya enyũma oko bandi, abosĩ ababya bolo enyũma kwĩnywe, omugulu mwabya mukalembera nʼeriluha; kandi mwatubaha Nyamuhanga.

¹⁹ Neryo omugulu Omwami Mukulu Nyamuhanga wenyũ abiribaha erihumula oko syonzĩgũ syenyũ syosĩ oko mbande syosĩ, omo kihugo ekyo Mwami Mukulu Nyamuhanga wenyũ akabaha mo mwandu erĩsĩgalyakyo, mwasyalĩmya ekĩbũkyo kya Amalekĩ eyĩkwa oko bũtũkũ; susyibiriawa.