Eryibuka Ebihano 2 - AMASAKO ABOYTRTRE WA NYAMUHANGA AWAKAHULAWA MO BIBLIA

Olugendo erĩlũa eKadesĩ

¹ Neryo motwabũnũkala motwahongoka eriya omo mbwarara omo nzira yʼEngetsi yʼEngula, ngoko Mwami Mukulu ambwira; neryo motwatĩmba-tĩmba oko kitwa kyʼeSeĩrĩ ebiro bingi.

² Kandi Omwami Mukulu mwabũga nage, ati,

³ Mwamatatĩmba-tĩmba oko kitwa ekĩ ko bingaho; mũbũnũkale mulole elutambi lwʼendata,

⁴ uhane abandu, uti, Mukayalaba oko mutano wʼabagala benyũ abana ba Esaũ, abĩkere eSeĩrĩ; nabo basyabubaha. Neryo muyibombeke ndeke;

⁵ simulwe nabo; kusangwa sindiendisyabaha oko kihugo kyabo, iyihi, kutse ahʼerĩhĩra obulyatiro bwʼekisando; kusangwa nabiriha Esaũ yʼekitwa kyʼeSeĩrĩ eribya enzĩgalya yiwe.

⁶ Mwasyagula kubo kwʼakalyo omo bĩtsĩpa, imomwalya; kandi mwasyagula kubo kwʼamagetsi omo bĩtsĩpa, ĩmomwapũlya.

⁷ Kusangwa Omwami Mukulu Nyamuhanga wenyũ abiribatsumula omo byosĩ mwabirikola. Abiriminya olugendo lwenyũ omo mbwarara nene eyĩ. Emyaka makũmĩ ani eyĩ Omwami Mukulu Nyamuhanga wenyũ mwabya nenyũ; simulitabula kindu.

⁸ Neryo motwatwangana oko bagala betu, abana ba Esaũ, abĩkere eSeĩrĩ hali oko nzira yʼeAraba nʼehali oko Elatĩ, nʼehali oko eEzĩonĩ-Geberĩ. Kandi motwabũnũkala motwalaba omo nzira yʼembwarara yʼeMoabũ.

⁹ Kandi Omwami Mukulu mwambwira ati, Sũtsenga-tsengaye Moabũ, kutse sigulwe nabo; kusangwa sindiendisyakuha ekihugo kiwe mo nzĩgalya; kusangwa nabiriha abana ba Lotĩ eArĩ mo nzĩgalya.

¹⁰ (Abaemĩmũ mobĩkalayo erĩmbere, abandu bakulu, nʼabangi, nʼabali-bali, ngʼAbaanakĩ.

¹¹ Aba nabo bakaganzawa mo Rafaĩmũ, nga Anakĩ; nĩkwa Abamoabũ mobahulabo mo Emĩmũ.

¹² NʼAbahorĩ mobĩkala eSeĩrĩ erĩmbere, nĩkwa abana ba Esaũ mobasuba omo mwanya wabo; mobaheryabo, mobĩkala omo mwanya wabo; ngoko Ĩsraelĩ akola oko kihugo kyʼenzĩgalya yiwe, eyo Mwami Mukulu ahabo.)

¹³ Lino muhangane, musoke olũsĩ lwʼeZeredĩ. Neryo motwasoka olũsĩ lwʼeZeredĩ.

¹⁴ Neryo omugulu twabya tũkalũa eKadesĩ-Barnea, erĩhĩka aho twasokera olũsĩ lwʼeZeredĩ yabya emyaka makũmĩ asatu nʼomunani; erĩhĩka aho lulengo lwʼabandu bʼamalwa baholera omo katĩkatĩ kʼekilaliriro, ngoko Mwami Mukulu alahĩrayabo.

¹⁵ Kandi ebyala byʼOmwami Mukulu mobyalwa nabo, erĩheryabo omo kilaliriro, erĩhĩka aho abosĩ bamabiholera.

¹⁶ Neryo abandu bosĩ bʼamalwa babere babihola omo katĩkatĩ kʼabandu,

¹⁷ Omwami Mukulu mwambwira ati,

¹⁸ Mũnabwĩre ukandisokera eArĩ, Omutano wʼeMoabũ.

¹⁹ Kandi omugulu ũkandĩhĩka eyisirya oko bana ba Amonĩ, sũtsenga-tsengayebo, kutse erĩhĩtanĩabo; kusangwa sindiendisyakuha ekihugo kyʼabana ba Amonĩ mo nzĩgalya; kusangwa nabirihakyo oko bana ba Lotĩ mo nzĩgalya.

²⁰ [Nʼekihugo ekyo nibya kikahulawa mo kya Refaĩmũ; Refaĩmũ babya bĩkereho kera; nĩkwa Abaamonĩ mobahulabo mo Bazamũzũmĩ,

²¹ ni bandu bakulu, ni bangi, nʼabali-bali, ngʼAbaanakĩ; nĩkwa Omwami Mukulu mwaheryabo; mobasingulabo, kandi mobĩkala omo mwanya wabo;

²² ngoko akolera abana ba Esaũ, abĩkere eSeĩrĩ, omugulu aheraya Abahorĩ embere syabo; mobasingulabo, mobĩkala omo myanya yabo erĩhĩka mũnabwĩre.

²³ Neryo Abaawĩ, abĩkala omo mĩyĩ erĩhĩka eGaza, neryo Abakafũtorĩ abalũa eKafũtorĩ, mobaheryabo mobĩkala omo mwanya wabo.]

²⁴ Muhangane, muhongoke omo lugendo lwenyũ musoke omusya wa Amonĩ. Lebaya! Nabiriha Sĩhonĩ, Mũamorĩ, omwami wʼeHesĩbonĩ, nʼekihugo kiwe omo byala byenyũ; mũtsũke erĩsĩgalyakyo, mulwe naye.

²⁵ Mũnabwĩre ngandĩtsũka erĩhĩra olubahwa ũkwʼĩnywe, nʼobuba busana nenyũ oko bandu abali ehosĩ eyĩkwa oko bũtũkũ, nabo omugulu bakandĩsyowa engulu yenyũ, basyatitimana, ibabya nʼerisegetulwa busana nenyũ.

²⁶ Nage monatuma abakwenda erĩlũa omo mbwarara yʼeKedemotĩ eriya uku Sĩhonĩ omwami wʼeHesĩbonĩ nʼebĩnywa byʼobuholo, nyiti,

²⁷ Uleke nyilabe omo kihugo kyawe; ngandisyalaba omo nzira nene, sindiendisyakebera oko byala byʼamali kutse ebyʼamalembe.

²⁸ Wasyanyĩgũlya akalyo oko franka, nyirye; umbe nʼamagetsi oko franka, nyĩpũlaye; Uleke nyilabe risa omo bisando byage;

²⁹ ngoko bana ba Esaũ banyikolera abĩkere eSeĩrĩ, nʼAbamoabũ abĩkere eArĩ; erĩhĩka aho nasyasokera eYorodanĩ omo kihugo ekyo Mwami Mukulu Nyamũhanga wetu akatuha.

³⁰ Nĩkwa Sĩhonĩ omwami wʼeHesĩbonĩ mwatalĩga tukalaba omo kihugo kiwe; kusangwa Omwami Mukulu Nyamuhanga wawe mwakalya ekĩrĩmũ kiwe, mwayira omutima wuwe mo mutsibu, iniatoka erimuhotera omo byala byenyũ, ngoko kiri mũnabwĩre.

³¹ Kandi Omwami Mukulu mwambwira, ati, Lebaya, nabĩrĩtsũka erihotera Sĩhonĩ nʼekihugo kiwe embere syawe; Ũtsũke erĩĩmyakyo, iwatoka erĩsĩgalya ekihugo kiwe.

³² Neryo Sĩhonĩ mwahuluka eritubambira, iye nʼabandu buwe bosĩ, omo malwa eYahasa.

³³ Neryo Omwami Mukulu Nyamuhanga wetu mwamũhĩra embere syetu; netu motwamũkĩnda, nʼabagala buwe, nʼabandu buwe bosĩ.

³⁴ Oko mugulu oyo motwĩmya emĩyĩ yiwe yosĩ motwatĩnda ndeke abalume, nʼabakalĩ nʼabana balere, bʼobuli mũyĩ. Motũtasĩganĩa nʼomuguma.

³⁵ Sye nʼesyonde twĩmaya mo minyego busana netu, haguma nʼebindu ebyo byʼemĩyĩ eyo twanyega.

³⁶ Erĩtsũka eAroerĩ owali oko mũsĩke wʼomusya wʼeArnonĩ, nʼoko mũyĩ owali omo musya, erĩhĩka eGĩleadĩ, sihabya mũyĩ muli owatulema. Omwami Mukulu Nyamuhanga wetu mwatuha eyosĩ.

³⁷ Nĩkwa momutagenda hakũhĩ nʼekihugo kyʼabana ba Amonĩ, oko mukyingyi gosĩ wʼolũsĩ Yaboko, nʼemĩyĩ yʼekihugo kyʼebitwa, nʼehosĩ eyo Mwami Mukulu Nyamuhanga wetu atukaga.