Eryibuka Ebihano 17 - AMASAKO ABOYTRTRE WA NYAMUHANGA AWAKAHULAWA MO BIBLIA

Eritswera abakasaba esindi nyamuhanga

¹ Simusyehongera Omwami Mukulu Nyamuhanga wenyũ yʼende kutse embũlĩ eyiri kʼobulema, kutse ekindu kibi; kusangwa ekyo ni nye oko Mwami Mukulu Nyamuhanga wenyũ.

² Hamabanika omo katĩkatĩ kenyũ, omo mĩyĩ yenyũ yosĩ eyo Mwami Mukulu Nyamuhanga wenyũ akabaha, omulume kutse omũkalĩ, oyukakola ebibi omo meso wʼOmwami Mukulu Nyamuhanga wenyũ, akatwa endagano yiwe,

³ iniabiriyakolera esindi nyamuhanga nʼerĩramyasyo, kutse erĩramya eryuba, kutse omukera, kutse ekindu kyahi kyʼesyondeko syʼebihugo byʼomo kyanya, ebyo ndabahana,

⁴ nenyũ mwamabwirwa, kandi ĩmwabĩrĩowa engulu yabyo; neryo mwasyabũlya ndeke-ndeke. Neryo byamabya ini kwenene, nʼomwatsi oyo isialitika-tikawa ngoko mwatsi mubi owakolirwe omo Baĩsraelĩ,

⁵ neryo mwasyahũlũkya omulume oyo kutse omũkalĩ oyo wabirikola ekindu kibi ekĩ, oko syongyo syenyũ, amabya mulume kutse mũkalĩ, neryo mwasyĩtabo omo mabwe.

⁶ Omo buno bwʼabalangĩrĩ babiri kutse abalangĩrĩ basatu oyũkandĩkwa asyĩtwa; omo buno bwʼomũlangĩrĩ muguma siendĩsyĩtwa.

⁷ Ebyala byʼabalangĩrĩ byasyatsũka erĩmwĩta, nʼenyũma wʼaho ebyala byʼabandu bosĩ. Neryo mwasyalũsya ebibi omo katĩkatĩ kenyũ.

Eritswera emyatsi eyĩkalĩre

⁸ Omwatsi amahuluka akabalema okwʼitswera, omo katĩkatĩ kʼomwatsi wʼomusasi, kutse, omo katĩkatĩ kʼeritonda olubanza, nʼomo katĩkatĩ kʼerĩswĩrya omundu, omo myatsi eyikalwirawa omo mĩyĩ yenyũ; mwasyahangana, imwaya aho Mwami Mukulu Nyamuhanga wenyũ akayisoga.

⁹ Neryo mwasyahĩka eyiri abahererĩ Abalawĩ, nʼoko mũtswerĩ oyo wasyabyaho omo biro ebyo, neryo mwasyabũlyabo; nabo basyabakangya enzwere yʼolubanza olo.

¹⁰ Neryo mwasyakola ngʼomũsĩndo wʼenzwere eyo basyabakangya aho Mwami Mukulu akayisoga; nenyũ mwasyakwamirira erikola ngʼebyosĩ ebyo basyabĩgĩsya.

¹¹ Ngʼomũsĩndo wʼemigambo eyo basyabĩgĩsya, kandi ngʼeritswera eryo basyababwira, mwasyakola mutya; sĩmũsyebũnũkala oko nzwere eyo basyabakangya, oko byala byʼamali kutse ebyʼamalembe.

¹² Nʼomundu oyukakola nʼepono, eritindahulikirira omũhererĩ oyukimanaho erikoleraho embere syʼOmwami Mukulu Nyamuhanga wenyũ, kutse omũtswerĩ, omundu oyo asyahola. Litya mwasyalũsya ebibi omo katĩkatĩ ka Ĩsraelĩ.

¹³ Nʼabandu bosĩ basyowa, basyubaha, ibataswakola nʼepono.

Erĩbũlya busana nʼomwami

¹⁴ Mwasyabya mwabĩhĩka omo kihugo ekyo Mwami Mukulu Nyamuhanga wenyũ akabaha kandi ĩmwamabĩsĩgalyakyo, nʼerĩĩkala mukyo, kandi mũkabũga muti, Twasyayĩsĩngĩrya omwami, ngʼebindi bihanda ebĩtũtĩmbĩreko;

¹⁵ kwenene mwasyayĩsĩngĩrya omwami oyo Mwami Mukulu Nyamuhanga wenyũ asyayisoga; omundu oyũkalũa omo katĩkatĩ kʼabagala benyũ yo mwasyasĩngya mo mwami wenyũ, sĩmũsyesĩngaya owʼehandi, oyute mugala wenyũ.

¹⁶ Kandi siasyeyĩkanyĩrĩraya esyosabayĩrĩ, kutse akasyasũbya abandu bʼeMĩsĩrĩ, busana nʼerĩyĩkanyĩrĩrya esyosabayĩrĩ; kusangwa Omwami Mukulu abiribabwira ati, Simusyesuba omo nzira eyo kandi na kera.

¹⁷ Kutse siasyeyĩkanyĩraya abakalĩ, omutima wuwe akasyahinduka; kutse siasyeyĩkanyĩraya ebĩtsĩpa nʼesyamagetsi byo kutsibu.

¹⁸ Neryo omugulu ĩkere oko kĩtũmbĩ kyʼobwami buwe, asyayisakira emigambo eyĩ omo kitabu embere syʼabahererĩ Abalawĩ.

¹⁹ Nakyo kyasyabya haguma naye, kandi asyasoma mukyo ebiro byosĩ byʼeribyaho liwe; iniatoka eriiga eriubaha Omwami Mukulu Nyamuhanga wuwe, nʼeribika ebĩnywa byosĩ byʼekihano ekĩ, nʼemigambo eyĩ ndeke-ndeke erikolabyo;

²⁰ omutima wuwe ĩnĩatayĩhamya oko bagala babo, kandi iniatakita oko bihano, oko byala byʼamali, kutse oko byʼamalembe, iniatoka erĩkanyĩa ebiro biwe omo bwami buwe, iye nʼabagala buwe, omo katĩkatĩ ka Ĩsraelĩ.