Eryibuka Ebihano 15 - AMASAKO ABOYTRTRE WA NYAMUHANGA AWAKAHULAWA MO BIBLIA

Omwaka wʼeribuga omwĩnda

¹ Oko ndũlĩ yʼobuli myaka irinda muyire erĩrekeranĩa emĩnda.

² Nʼoyũ go mũsĩndo wʼerĩrekeranĩa: obuli mũbwekĩ asyalekeranĩa ebyo abiribweka mũlĩkyabo; ĩsyesyalĩhĩsaya mũlĩkyabo na mugala wabo; kusangwa erĩrekeranĩa lyʼOmwami Mukulu lyabĩrĩtũlaganĩbwa.

³ Mwanganatũhyago oko wʼehandi; nĩkwa ebyenyũ byosĩ ebiwitweko na mugala wenyũ ebyala byawe byasyamũlekeranĩa.

⁴ Nĩkwa, sihendisyabya mwera omo katĩkatĩ kenyũ (kusangwa Omwami Mukulu asyabatsumula kwenene omo kihugo ekyo akabaha eribya mwandu, ogo mũkasĩgalaya),

⁵ ekiguma, mwamahulikirira nʼomũhwa omulenge wʼOmwami Mukulu Nyamuhanga wenyũ, erikenga erihana lyosĩ erĩ, eryo ngabahana mũnabwĩre.

⁶ Kusangwa Omwami Mukulu Nyamuhanga wenyũ asyabaha omũyĩsa, ngoko abalaga; nenyũ mwasyabweka ebihanda bingi, nĩkwa Ĩnywe simusyeyibweka; kandi mwasyatabala oko bihanda binene, nĩkwa ibo sibendisyabatabalako.

Eribweka omwera

⁷ Hamabya mundu mwera haguma nenyũ, omuguma wʼoko bagala benyũ, omo mĩyĩ yenyũ omo kihugo kyenyũ ekyo Mwami Mukulu Nyamuhanga wenyũ akabaha, sĩmũsyekalaya omutima wenyũ, kutse sĩmũkũmbe ebyala byenyũ uku mugala wenyũ mwera;

⁸ nĩkwa mũmũkũmbũlĩre ebyala byenyũ kwenene, kandi kwenene mwasyamubweka ebĩhĩkĩre oko bwaga buwe oko ekyo akasonda.

⁹ Mũyĩtegaye Sihabye oblengekanĩa bubi omo mutima wenyũ, muti, Omwaka wʼakalinda Omwaka wʼerĩrekeranĩa ali hakũhĩ; nʼerĩso lyenyũ iryabya libi oko mugala wenyũ mwera, nʼeritindamuha kindu; neryo akalakira Omwami Mukulu busana nenyũ, nʼekyo ikyabya kibi ũkwʼĩnywe.

¹⁰ Kwenene mwasyamuha, nʼomutima wenyũ sĩendĩsyayĩsĩngolerya omugulu mukamuha; kusangwa busana nʼomwatsi oyo, Omwami Mukulu asyabatsumula omo mũbĩrĩ wenyũ gosĩ, nʼomo byosĩ ebyala byenyũ bikalenga erikola.

¹¹ Kusangwa abera sibendisyahwa omo kihugo; kikaleka inabahana, nyiti, Kwenene mwasyakũmbũlira ebyala uku mugala wenyũ, nʼoko bʼobwaga, nʼoko bera benyũ, omo kihugo kyenyũ.

Erĩrekeranĩa abakobe oko mwaka wʼakalinda

¹² Bamabagũlya omugala wenyũ, Omuebrania mulume, kutse Omuebrania mũkalĩ, asyakukolera emyaka ndatu; neryo oko mwaka wʼakalinda wasyamuleka bwĩranda.

¹³ Nʼomugulu mukamuleka bwĩranda, simusyemuleka akagenda byala bisa.

¹⁴ Mwasyamuha butsira buhemu oko mbũlĩ syenyũ, nʼoko kĩhũmbĩro kyenyũ, nʼoko kĩrĩnga kyenyũ kyʼebĩnyũ; ngoko Mwami Mukulu Nyamuhanga wenyũ abiribatsumula ko mwasyamuha mutya.

¹⁵ Kandi mwasyibuka ngoko mwabya bakobe omo kihugo kyʼeMĩsĩrĩ, neryo Omwami Mukulu mwabatongolya; kikaleka inabahana omwatsi oyũ go mũnabwĩre.

¹⁶ Neryo amababwira ati, Sĩnyanzĩre erĩkũlũako; kusangwa akwanzĩre nʼekĩtũnga kyawe, kusangwa akabana obutseme ukʼuwe.

¹⁷ Neryo wasyĩmya omugera, wasyatobolera okũtũ kuwe kʼoko lũyĩ, naye asyabya mukobe wawe kera na kera. Nʼoko mukobe wenyũ wʼobũkalĩ mwasyakola mutya nibya.

¹⁸ Sĩkĩsyebĩta obũlĩge, omugulu mũkamũlwĩka erigenda bwĩranda; kusangwa amakukolera myaka ndatu omo bũhĩngĩ bwʼengendo ĩbĩrĩ bwʼomũhĩngĩ; kandi Omwami Mukulu Nyamuhanga wenyũ asyabatsumula oko byosĩ mukakola.

Ehimbere hisololawe

¹⁹ Ehimbere hyosĩ hyʼobulume ehikabutawa oko bihangulo byenyũ nʼoko bĩhyo byenyũ hyasyahigulwa oko Mwami Mukulu Nyamuhanga wenyũ; simusyekola omũbĩrĩ nʼakambere kʼekihangulo kyawe, kutse erĩtwa obweya bwʼakambere kʼekĩhyo kyenyũ.

²⁰ Mwasyalyako embere syʼOmwami Mukulu Nyamuhanga wawe oko buli mwaka aho Mwami Mukulu asyayisoga, uwe nʼekĩtũnga kyawe.

²¹ Kandi kamabya ini kalema kʼerĩsũmbayira kutse akʼerĩsongo, kutse bulema bwahi simusyehongerako oko Mwami Mukulu Nyamuhanga wenyũ.

²² Mwasyalirako omo butala bwawe; abatsandĩrya nʼaberĩre bangalyako siringene nʼesaswĩ kandi nʼenombĩ.

²³ Nĩkwa Simusyerya omusasi wasyo; mwasyũtago oko kitaka ngʼamagetsi.