Eryibuka Ebihano 13 - AMASAKO ABOYTRTRE WA NYAMUHANGA AWAKAHULAWA MO BIBLIA

Eritindasaba esindi nyamuhanga

¹ Omũmĩnyererĩ amahangana omo katĩkatĩ kenyũ, kutse omũlotĩ wʼesyonzolĩ akabaha ekĩmĩnyĩsyo kutse ekyʼeriswekera,

² nʼekĩmĩnyĩsyo ekyo kutse ekyʼeriswekera bikabererera ebyo abũga nenyũ, ati, Tutayakwama esindi nyamuhanga, esyo mutabya mwasĩ, kandi tukoleresyo;

³ simusyehulikirira ebĩnywa byʼomũmĩnyererĩ oyo, kutse omũlotĩ oyo wʼesyonzolĩ; kusangwa Omwami Mukulu Nyamuhanga wenyũ akabalenga eriminya nga mwanzĩre Omwami Mukulu Nyamuhanga wenyũ nʼomutima wenyũ gosĩ nʼekĩrĩmũ kyenyũ kyosĩ.

⁴ Mwasyakwama Omwami Mukulu Nyamuhanga wenyũ, nʼerimubaha, nʼerĩteya ebihano biwe, nʼerĩowa omulenge wuwe, kandi mwasyamukolera, nʼerimumakirira.

⁵ Nʼomũmĩnyererĩ oyo nʼomũlotĩ oyo wʼesyonzolĩ, asyĩtwa, kusangwa abirihana eripona Omwami Mukulu Nyamuhanga wenyũ, oyo wabalũsaya omo kihugo kyʼeMĩsĩrĩ, nʼerĩbatongolya omo nyũmba yʼobukobe, eribateba omo nzira eyo Mwami Mukulu abahana erigenderamo. Na litya mwasyalũsya ebibi omo katĩkatĩ kenyũ.

⁶ Omugala wenyũ, mugala wa koyo wawe, kutse mugala wawe, kutse mwali wawe, kutse omũkalĩ wʼekĩkũba kyawe, kutse omwĩra wawe, oyuli ngʼekĩrĩmũ kyawe, amabohya bũbĩso-bĩso, ati, Tuyakolere esindi Nyamuhanga (esyo mutabya mwasĩ, uwe, kutse abotata-kulu wawe),

⁷ sye syonyamuhanga syʼebihanda ebĩbatĩmbĩreko, hakũhĩ nawe kutse hali kuwe, erĩtsũka oko ndũlĩ nguma yʼekihugo nʼerĩhĩka oko yindi ndulĩ yʼekihugo;

⁸ sũsyemũlĩgĩra, kutse erimuhulikirira; nʼerĩso lyawe sirisyemuganyira, kandi sũsyemũbalaya kutse syusyemũbisa.

⁹ Nĩkwa ũmwĩte kwenene; ebyala byawe byo byasyatsũka erĩmwĩta, nʼenyũma wʼaho ebyala byʼabandu bosĩ.

¹⁰ Litya mwasyamwĩta omo mabwe, kusangwa abirirenga eribateba erĩlũa oko Mwami Mukulu Nyamuhanga wenyũ, oyo wabalũsaya omo kihugo kyʼeMĩsĩrĩ, omo nyũmba yʼobukobe.

¹¹ NʼAbaĩsraelĩ bosĩ basyowa, nʼeriubaha, isibendisyasubira erikola ebibi ngʼebĩ, ebiri omo katĩkatĩ kenyũ.

¹² Mwamowa bakabũga engulu yʼomũyĩ muguma wʼemĩyĩ yenyũ, eyo Mwami Mukulu Nyamuhanga wenyũ akabaha erĩĩkalaho, bati,

¹³ Hamahuluka omo katĩkatĩ kenyũ abandu balebe batyabatya ibabiriheka esyondũlanĩ syʼomũyĩ wabo omwʼiteba, bati, Tuyakolere eyindi nyamuhanga, eyo mutabya mwasĩ;

¹⁴ neryo mwasyabũlya, nʼerisonda-sonda, nʼerĩbũlya nʼomũhwa; neryo yamabya ini kwenene, nʼomwatsi oyo ĩnĩ kũndũ, ngʼesyonye esyʼomuhanda oyo sikakolwa omo katĩkatĩ kenyũ,

¹⁵ kwenene mwasyaswĩrya esyondũlanĩ syʼomũyĩ omo boya bʼomũyalĩ, erĩheryago ndeke, nʼebyosĩ birimo, nʼebihangulo byako, omo boya bʼomũyalĩ.

¹⁶ Neryo mwasyakuma-kuma ebinyegwa byosĩ byago omo kibuga kyako, neryo mwasyahĩsĩrĩrya omũyĩ oyo omo muliro, nʼobunyegwa bosĩ bwako, ngʼobuhere bwʼerĩokererya oko Mwami Mukulu Nyamuhanga wawe; nago asyabya kilundo kera na kera. Sĩendĩsyahĩmbwa kandi.

¹⁷ Kandi sihendĩsyasĩgalira ekindu nʼekiguma oko byaganawa ebikandimakirira oko byala byawe, Omwami Mukulu atoke eribinduka okwʼihitana liwe rĩkalĩre, nʼerĩbakangya olukogo luwe nʼeribaganyira, nʼerĩbakanyĩa, ngoko abĩrĩlahĩrĩrya abotata-kulu wenyũ;

¹⁸ mwamahulikilira omulenge wʼOmwami Mukulu Nyamuhanga wenyũ, erĩteya ebihano biwe byosĩ ebyo ngabahana mũnabwĩre, erikola ebitunganene omo meso wʼOmwami Mukulu Nyamuhanga wenyũ.