Eryibuka Ebihano 10 - AMASAKO ABOYTRTRE WA NYAMUHANGA AWAKAHULAWA MO BIBLIA

Ebisayi bihya-bihya

¹ Oko mugulu oyo Omwami Mukulu mwabũga nage ati, Uyibatsire ehisayi hibiri hyʼamabwe ehiri ngʼehyʼerĩmbere, neryo Uhetuke Ũnyegaye oko kitwa, kandi Uyibatsire erĩsandũko lyʼomuti.

² Neryo nasyasaka oko hisayi ehyo, ebĩnywa ebyo eʼbyabya oko hisayi hyʼerĩmbere ehyo watulanga, kandi Wasyahĩrahyo omo lĩsandũko eryo.

³ Litya monabatsa erĩsandũko omo muti wʼomũshĩta, kandi monabatsa ehisayi hibiri hyʼamabwe ehiri ngʼehyʼerĩmbere, kandi monahetukira oko kitwa ekyo, inyinawite oko hisayi hibiri ehyo omo byala byage.

⁴ Neryo Omwami Mukulu mwasaka oko hisayi, ngʼamasako awʼerĩmbere, Ebihano Ĩkũmĩ, ebyo Mwami Mukulu abũga nenyũ oko kitwa omo katĩkatĩ kʼomuliro oko kiro kyʼerĩhĩndana; neryo Omwami Mukulu mwambahyo.

⁵ Kandi monabũnũkala monakĩma oko kitwa, monahĩra ehisayi omo lĩsandũko eryo nabatsa; kandi hine eyo ngoko Mwami Mukulu anyihana.

⁶ [Nʼabana ba Ĩsraelĩ mobahongoka erĩlũa eBerotĩ-Bene-Yakanĩ eriya e Mosera. Neryo Harũnĩ mwaholerayo, mwatabwayo; na Eleazarĩ mugala wuwe mwakola omũbĩrĩ wʼobũhererĩ omo mwanya wuwe.

⁷ Nʼerĩlũa eyo mobahongoka eriya eGũdĩgoda; nʼerĩlũa eGũdĩgoda mobaya eYotĩbata, ekihugo kyʼotũsĩ twʼamagetsi.

⁸ Oko mugulu oyo Omwami Mukulu mwasolola ekihanda kya Lawĩ eriheka erĩsandũko lyʼendagano yʼOmwami Mukulu, erihangana embere syʼOmwami Mukulu erimukolera, nʼeritsumula omo lĩna liwe, erĩhĩka hatya.

⁹ Kikaleka Lawĩ iniatabya nʼerĩgabo kutse mwandu haguma nʼabagala babo; Omwami Mukulu yo mwandu wuwe, ngoko Mwami Mukulu Nyamuhanga wawe abũgakyo naye.]

¹⁰ Kandi nage monĩkala oko kitwa, ngʼomugulu wʼerĩmbere, emisibo makũmĩ ani nʼebiro makũmĩ ani; nʼOmwami Mukulu mwanyihulikirira oko mugulu oyo nibya; Omwami Mukulu mwatanza erĩbaherya.

¹¹ Kandi Omwami Mukulu mwabũga nage, ati, Hangana, Uhongoke embere syʼabandu; abingira erĩsĩgalya ekihugo ekyo nalahĩrĩraya abotata-kulu wabo eriha kyobo.

¹² Na lino, Israelĩ, Omwami Mukulu Nyamuhanga wawe akakusonda kokyĩ kwehĩ? Rye nʼeriubaha Omwami Mukulu Nyamuhanga wawe, erirendera omo nzira siwe syosĩ, nʼerimwanza, nʼerikolera Omwami Mukulu Nyamuhanga wawe nʼomutima wawe gosĩ, nʼekĩrĩmũ kyawe kyosĩ,

¹³ erĩteya ebihano byʼOmwami Mukulu, nʼemigambo yiwe, ebyo ngabahana mũnabwĩre busana nʼerĩũwana lyawe.

¹⁴ Mũlebaye, olubula nʼobũtũkũ bwʼendata kutsibu, ekihugo nʼebyosĩ ko birimo ni byʼOmwami Mukulu nyamuhanga wawe.

¹⁵ Nĩkwa Omwami Mukulu mwatsemera abotata-kulu wawe erianzabo, kandi mwayisoga ĩnywe bana babo enyũma kubo, kwilaba ebihanda byosĩ, ko kine kitya mũnabwĩre.

¹⁶ Neryo mũbanaye engoba yʼomutima wenyũ, kandi simuswebya nʼengoto itegonda.

¹⁷ Kusangwa Omwami Mukulu Nyamuhanga wenyũ, iye ni Nyamuhanga wʼesyonyamuhanga, nʼOmwami Mukulu wʼabakama, yo mukulu, ye mbangĩ, na Nyamuhanga wʼeriswekera, oyuteyira obutaga, kutse erĩĩmya ekyũtũlĩro.

¹⁸ Akatwa enzwere itunganene, eyʼengũbĩ nʼeyʼomũkwakalĩ, kandi akakangaya olwanzo luwe busana nʼowʼehandi erimuha kalyo nʼebyʼeriambala.

¹⁹ Neryo ũkangaye olwanzo lwawe busana nʼowʼehandi, kusangwa nenyũ mwabya abʼehandi omo kihugo kyʼeMĩsĩrĩ.

²⁰ Wasyubaha Omwami Mukulu Nyamuhanga wawe; wasyamukolera ĩyowene; kandi wasyamumakirirako, kandi, wasyayisema omo lĩna liwe.

²¹ Iye nipipa lyawe, kandi iye ni Nyamuhanga wawe, oyo wabirikukolera emyatsi minene-minene nʼeyʼeriswekera; ebyo ameso wawe ayilangirira.

²² Abotata-kulu wawe mobakĩmĩra eMĩsĩrĩ abandu makũmĩ alinda; na lino Omwami Mukulu Nyamuhanga wawe abĩrĩkũlĩngĩrĩranĩa nʼesyongũnũnũ syʼomo kyanya omo bungi.