Erĩlũayo 40 - AMASAKO ABOYTRTRE WA NYAMUHANGA AWAKAHULAWA MO BIBLIA

Erihanda Ahabũyĩrĩre

¹ Neryo Omwami Mukulu mwabũga na Musa ati,

² Ekiro kyʼerĩtsũka kyʼomukera wʼerĩtsũka mwasyasingika ahʼerĩĩkala hʼeHema yʼerĩhĩndanamo.

³ Kandi mwasyahĩramo erĩsandũkũ lyʼerĩtũlago, kandi wasyasũkũlĩrya erĩsandũkũ eryo omo lukimba lwʼerĩbĩsalyo.

⁴ Neryo wasyaletamo emesa, nʼeritondeka kuyo kwʼebindu byayo, kandi wasyaletamo omutagala wʼetala, nʼerĩakya esyotala syago.

⁵ Kandi wasyateka ekiherero kyʼesyamagetsi busana nʼobukwa embere syʼerĩsandũko lyʼerĩtũlago, nʼerĩhĩra olukimba olũkasũkũlĩraya lʼoko lũkyo lwʼeHema.

⁶ Kandi wasyateka ekiherero kyʼobuhere bwʼerĩokererya embere wʼolũkyo lwʼahʼerĩĩkala lyʼeHema yʼerĩhĩndanamo.

⁷ Kandi wasyateka ekinabiro omo katĩkatĩ kʼeHema yʼerĩhĩndanamo nʼekiherero, nʼerĩsyahĩra mukyo mwʼamagetsi.

⁸ Kandi wasyasingika ekibuga erĩtĩmbyakyo oko mbande syosĩ, nʼerihanika olukimba olũkasũkũlĩraya olũkyo lwʼekibuga.

⁹ Neryo wasyĩmya magũta wʼerĩhakabya, nʼerĩhakabya ahʼerĩĩkala hʼeHema, nʼebyosĩ birimo, kandi wasyahigulaho, nʼebindu byaho byosĩ; hasyabya habũyĩrĩre.

¹⁰ Kandi wasyahakabya ekiherero kyʼobuhere bwʼerĩokererya, nʼebindu byaho byosĩ nʼerihigula ekiherero: nʼekiherero kyasyabya kĩbũyĩrĩre kutsibu.

¹¹ Kandi wasyahakabya ekinabiro nʼendĩna yakyo amagũta, erikihigula.

¹² Kandi wasyaleta Harũnĩ nʼabagala buwe oko lũkyo lwʼeHema yʼerĩhĩndanamo, wasyakosabo omo magetsi.

¹³ Kandi wasyambalya Harũnĩ yʼesyongimba sĩbũyĩrĩre; wasyamũhakabya, nʼerimuhigula, iniatoka erinyikolera omo mũbĩrĩ ngʼomũhererĩ.

¹⁴ Kandi wasyaleta abagala buwe, nʼeriswikabo omo makotĩ;

¹⁵ Kandi wasyahakabyabo, ngoko wahakabaya ĩse wabo, ibatoka erinyikolera omo mũbĩrĩ ngʼabahererĩ; nʼerĩhakabĩbwa lyabo lyasyabya kubo busana nʼobũhererĩ bwa kera na kera omo syondengo syabo syosĩ.

¹⁶ Musa mwakola atya ngʼebyosĩ ebyo Mwami Mukulu amuhana, kwʼakola atya.

¹⁷ Neryo omo mukera wʼerĩtsũka omo mwaka wʼakabiri oko kiro kyʼerĩtsũka kyʼomukera, Ahʼerĩĩkala mohatsimbwa.

¹⁸ Neryo Musa mwahanganĩa eHema, nʼerĩhĩra ebitindo byaho, mwasingika ebisayi byaho, nʼerĩhĩra mwʼemiti yaho, nʼerisingika esyondũyĩ syaho.

¹⁹ Neryo mwasanza eHema endata yʼahʼerĩĩkala nʼerĩhĩra ekĩtũlĩka kyʼeHema endata kuyo; ngoko Mwami Mukulu ahana Musa.

²⁰ Neryo mwĩmya erĩtũlago lyʼebihano mwahĩralyo omwʼĩsandũkũ, kandi mwateka emigamba okwʼĩsandũkũ, kandi mwahĩra ekĩtũmbĩ kyʼeriganyira endata okwʼĩsandũkũ.

²¹ Neryo mwaleta erĩsandũkũ omo hʼerĩĩkala hʼeHema, nʼerisi ngika olukimba olũkasũkũlĩraya nʼerĩsũbũlĩrya erĩsandũkũ lyʼerĩtũlago; ngʼOmwami Mukulu kwʼahana Musa.

²² Kandi mwahĩra emesa omo Hema yʼerĩhĩndanamo, oko luhande lwʼerĩlolya elutambi lwʼendata lwʼahʼerĩĩkala omo Hema eyĩhya wʼolukimba lwʼerĩsũkũlĩrya.

²³ Neryo mwateka amandu go kuyo embere syʼOmwami Mukulu; ngoko Mwami Mukulu ahana Musa.

²⁴ Neryo mwahĩra omutagala wʼetala omo Hema yʼerĩhĩndanamo, ahisiria oko mesa, oko ndambi yʼahʼerĩĩkala omo Hema erĩlolya elutambi lwʼeyĩkwa.

²⁵ Neryo mwakya esyotala embere syʼOmwami Mukulu; ngoko Mwami Mukulu ahana Musa.

²⁶ Kandi mwahĩra ekiherero kyʼesyamagetsi omo Hema yʼerĩhĩndanamo embere syʼolukimba olũkasũkũlĩraya;

²⁷ neryo mwahĩsĩrya kukyo kwʼobukwa bwʼamanũkato awakakumba ndeke; ngoko Mwami Mukulu ahana Musa.

²⁸ Neryo mwahĩra olukimba olũkasũkũlĩraya lʼoko lũkyo lwʼahʼerĩĩkala hʼeHema.

²⁹ Neryo mwateka ekiherero kyʼobuhere bwʼerĩokererya oko lũkyo lwʼahʼerĩĩkala hʼeHema yʼerĩhĩndanamo, kandi mwahereraho obuhere bwʼerĩokererya nʼobuhere bwʼeyĩsyano; ngoko Mwami Mukulu ahana Musa.

³⁰ Neryo mwateka ekinabiro omo katĩkatĩ kʼeHema yʼerĩhĩndanamo nʼekiherero, neryo mwahĩra amagetsi go mukyo, busana nʼerinabiramo.

³¹ Na Musa na Harũnĩ nʼabagala buwe mobanabĩryamo ebyala byabo nʼebisando byabo.

³² Omugulu bingira omo Hema yʼerĩhĩndanamo, nʼomugulu basegera hakũhĩ nʼekiherero, ibakanaba; ngoko Mwami Mukulu ahana Musa.

³³ Neryo mwasingika ekibuga erĩtĩmba ahʼerĩĩkala nʼekiherero, kandi mwasingika olukimba olũkasũkũlĩraya lʼoko lũkyo lwʼekibuga. Neryo Musa mwabuga omũbĩrĩ oyo.

Ekĩtũ kikabya endata oko Hema

³⁴ Neryo ekĩtũ mokyaswika eHema yʼerĩhĩndanamo, nʼolukengerwa lwʼOmwami Mukulu molũsũlya eHema.

³⁵ Neryo Musa mwatatoka eriingira omo Hema yʼerĩhĩndanamo, kusangwa ekĩtũ mokĩkala endata kuyo, nʼolukengerwa lwʼOmwami Mukulu molũsũlya eHema.

³⁶ Neryo omugulu ekĩtũ kyasumbawa erĩlũa endata wʼahʼerĩĩkala hʼeHema, abandu ba Ĩsraelĩ mobahongoka omo syongendo syabo syosĩ;

³⁷ nĩkwa ekĩtũ kyamatindasumbwa, isibendigenda erĩhĩka ekiro kyasyasumbwa.

³⁸ Kusangwa ekĩtũ kyʼOmwami Mukulu kyabya oko hʼerĩĩkala hʼeHema omo musibo, nʼomuliro abyako omo kiro, omo meso wʼekĩtũnga kyosĩ kya Ĩsraelĩ, omo syongendo syabo syosĩ.