Erĩlũayo 39 - AMASAKO ABOYTRTRE WA NYAMUHANGA AWAKAHULAWA MO BIBLIA

Esyongimba syʼabahererĩ

¹ Mobakokotya esyongimba esĩlũkĩre ndeke-ndeke omo rangĩ yʼakanĩkĩ nʼeyʼamabono, nʼeyʼengula, busana nʼerikolera ahabũyĩrĩre, kandi mobakokotya esyongimba sĩbũyĩrĩre busana na Harũnĩ ngoko Mwami Mukulu ahana Musa.

² Kandi mwakokotya eefodĩ yʼesyamagetsi omo ngohe yʼerangĩ yʼakanĩkĩ, nʼerangĩ yʼolubono, nʼeyʼengula, nʼeyʼekisohe ekyowene ekĩlũkĩre ndeke.

³ Neryo mobahesa esyamagetsi mo bibambali ebyangũhĩrĩre, neryo mobatũabyo mo ngohe, erilukabyo mo ngohe yʼerangĩ yʼakanĩkĩ, nʼerangĩ yʼolubono, nʼerangĩ yʼengula, nʼekisohe kyowene, omũbĩrĩ wʼabanyima-nyima.

⁴ Mobakokotya ebihande byʼebitigo, ebĩhĩndene haguma; oko ndũlĩ syayo ĩbĩrĩ moyahĩndanĩbwa haguma.

⁵ Nʼomulemba owalũkĩre nʼamenge, owabya kuyo, busana nʼerĩwatĩkyayo, abya wʼekitswe kiguma nga milukire miguma yayo; yʼesyamagetsi, nʼeyʼengohe yʼerangĩ yʼakanĩkĩ, nʼerangĩ yʼolubono, nʼerangĩ yʼengula, nʼekisohe ekyowene ekĩlũkĩre ndeke; ngoko Mwami Mukulu ahana Musa.

⁶ Kandi mobabatsa amabwe wʼeshohamũ, awasesĩre omo kitindo kyʼesyamagetsi, eribatswa omwʼibatswa lyʼekĩmĩnyĩsyo, ngʼamena wʼabana ba Ĩsraelĩ.

⁷ Neryo mwahĩrago oko bihande byʼebitigo byʼeefodĩ, abye mabwe wʼeryĩbũkya busana nʼabana ba Ĩsraelĩ; ngoko Mwani Mukulu ahana Musa.

Ekyuma kyʼekĩkũba

⁸ Kandi mwakokotya ekyuma kyʼekĩkũba, omũbĩrĩ wʼomunyima-nyima, ngʼomũbĩrĩ wʼeefodĩ; wʼengohe yʼesyamagetsi, nʼeyʼerangĩ yʼakanĩkĩ, nʼeyʼerangĩ yʼolubono, nʼeyʼengula, nʼekisohe kyowene ekĩlũkĩre ndeke.

⁹ Kyabya kiringirirene; mobakokotya ekyuma ekyo kyʼekĩkũba kyo kabiri erĩrĩngakyo; obuli bwakyo bwabya ekiganza kiguma, nʼobugali bwakyo ekiganza kiguma, omugulu kĩrĩngĩre kabiri.

¹⁰ Kandi mobasosa mukyo mwʼamabwe emilondo ĩnĩ. Omulondo wʼerĩtsũka abya wʼesadĩyo, topasĩo, na sũmarato;

¹¹ omulondo wʼakabiri; zamarĩdĩ safĩro, na alamasĩ;

¹² omulondo wʼakasatu, hĩakĩnto, akatĩ, na amathĩsto.

¹³ Omulondo wʼakani, zabarajadĩ, na shohamũ, na yaspĩ; mobyabohwa omo bĩbohĩ byʼesyamagetsi omo migenyo yago.

¹⁴ Nʼamabwe ayo abya ngʼamena wʼabagala ba Ĩsraelĩ, erĩkũmĩ nʼababiri, ngʼamena wabo; ngʼeribatsa lyʼekĩmĩnyĩsyo, obuli kiguma ngʼerĩna liwe, busana nʼebihanda ĩkũmĩ na bibiri.

¹⁵ Nʼoko kyuma kyʼekĩkũba mobakokotya amahulula, ngʼebĩhohĩ byʼomũbĩrĩ wʼerilukwa lyʼesyamagetsi esĩkangĩre.

¹⁶ Kandi mobakokotya ebikono bibiri byʼesyamagetsi, nʼesyombũka ĩbĩrĩ syʼesyamagetsi, mobahĩra esyombũka ĩbĩrĩ syʼoko ndũlĩ ĩbĩrĩ syʼekyuma kyʼekĩkũba.

¹⁷ Mobahĩra amahulula abiri wʼesyamagetsi awalũkĩre omo mbũka ĩbĩrĩ oko ndũlĩ syʼekyuma kyʼekĩkũba.

¹⁸ Esindi ndũlĩ ĩbĩrĩ syʼamahulula abiri awalũkĩre, mobahĩrasyo oko bĩhambĩ bibiri, mobahĩrabyo oko bihande byʼebitigo byʼeefodĩ, oko luhande lwʼembere.

¹⁹ Mobakokotya esyombũka ĩbĩrĩ syʼesyamagetsi, mobahĩrasyo oko syondũlĩ ĩbĩrĩ syʼekyuma kyʼekĩkũba, oko mũsĩke wakyo owabya oko luhande lwʼeefodĩ omwisi.

²⁰ Kandi mobakokotya esyombũka ĩbĩrĩ syʼesyamagetsi, mobahĩrasyo oko bihande bibiri byʼekitigo kyʼeefodĩ eyĩkwa wayo, oko luhande lwʼembere, hakũhĩ nʼaho bibohene, endata oko mulemba wʼeefodĩ owalũkĩre nʼamenge.

²¹ Neryo mobaboha ekyuma kyʼekĩkũba omo mbũka syakyo oko syombũka syʼeefodĩ omo kakoba kʼengohe yʼerangĩ yʼakanĩkĩ, ikyatoka eribya oko mulemba owʼeefodĩ owalũkĩre nʼamenge, ekyuma kyʼekĩkũba ikitatoka erimatukala oko efodĩ; ngoko Mwami Mukulu ahana Musa.

Ekanzu nʼesyongimba syʼabahererĩ

²² Kandi mwalanda ekanzu yʼeefodĩ omo mũbĩrĩ wʼeriluka, eyosĩ omo rangĩ yʼakanĩkĩ;

²³ ekyũna kyʼebĩkya byʼekanzu omo katĩkatĩ kayo, kyabya ngʼekyũna kyʼebĩkya byʼekanzu yʼekyuma, haguma nʼomutsotso owatĩmbĩre oko kyũna, silusatike.

²⁴ Kandi mobahĩra oko masekũ wʼekanzu amakomamanga omo ngohe yʼerangĩ yʼakanĩkĩ, nʼerangĩ yʼolubono, nʼeyʼengula, nʼeyʼekĩtanĩ ekyabirilukwa.

²⁵ Kandi mobahesa esyonzoga syʼesyamagetsi esĩkangĩre, kandi mobahĩra esyonzoga esyo omo katĩkatĩ kʼamakomamanga oko masekũ wʼekanzu erĩtĩmbyasyo kuyo, omo katĩkatĩ kʼamakomamanga;

²⁶ enzoga nʼerĩkomamanga, enzoga nʼerĩkomamanga, oko masekũ wʼekanzu erĩtĩmba kuyo, busana nʼomũbĩrĩ; ngoko Mwami Mukulu ahana Musa.

²⁷ Kandi mobalanda amakotĩ wʼekisohe ekyowene ngʼomũbĩrĩ wʼeriluka busana na Harũnĩ, na busana nʼabagala buwe,

²⁸ nʼembĩta yʼekisohe ekyowene, nʼotũkĩra towene twʼekisohe kibuya, nʼehipitula hyʼekisohe kibuya ekĩlũkĩre ndeke,

²⁹ nʼomukoba wʼekisohe kibuya ekĩlũkĩre ndeke, omo rangĩ yʼakanĩkĩ, nʼerangĩ yʼolubono nʼeyʼengula, omũbĩrĩ wʼomũlũkĩ; ngoko Mwami Mukulu ahana Musa.

Ekisayi kyʼesyamagetsi

³⁰ Kandi mobahesa ekisayi kyʼakakĩra kabũyĩrĩre kʼesyamagetsi esĩkangĩre, kandi mwasaka kuko kwʼamasako, ngʼeribatswa lyʼekĩmĩnyĩsyo kiti, Omũbũyĩrĩre oko Mwami Mukulu.

³¹ Kandi mobakũndĩka kuko kwʼakakimba kʼerangĩ yʼakanĩkĩ, erĩkũndĩkako oko mbĩta kwʼendata; ngoko Mwani Mukulu ahana Musa.

Musa akayĩtegereraya omũbĩrĩ

³² Neryo litya omũbĩrĩ gosĩ mwahwa owʼahʼerĩĩkala hʼeHema yʼerĩhĩndanamo; nʼabana ba Ĩsraelĩ mobakola ebyosĩ ngoko Mwami Mukulu ahana Musa; mobakolabyo batya.

³³ Kandi mobaletera Musa ahʼerĩĩkala, hʼeHema, nʼebindu byayo byosĩ, ebĩbohĩ byayo, ebisayi byayo, nʼemiti yayo, nʼesyondũyĩ syayo, nʼebitindo byayo;

³⁴ ekĩtũlĩka kyʼesyongobĩ syʼesyombangale, esĩnĩre omo ngula, nʼekĩtũlĩka kyʼesyongobĩ syʼesyopombolo, nʼolukimba olũkasũkũlĩraya;

³⁵ erĩsandũkũ lyʼerĩtũlago, nʼemigamba yalyo, nʼekĩtũmbĩ kyʼeriganyira;

³⁶ nʼemesa, nʼebindu byayo byosĩ, nʼamandu wʼerĩkanganĩa;

³⁷ nʼomutagala wʼetala owakangĩre, nʼesyotala syago; esyotala esyʼeritondeka aho wasyo, nʼebindu byosĩ byasyo, nʼamagũta busana nʼetala.

³⁸ Nʼekiherero kyʼesyamagetsi, nʼamagũta wʼerĩhakabya nʼobukwa obukakumba ndeke, nʼolukimba olũkasũkũlĩraya busana nʼolũkyo lwʼeHema;

³⁹ ekiherero kyʼomulinga, nʼakayungiro kʼerĩbũ kʼomulinga, nʼemigamba yaho, nʼebindu byakyo byosĩ, ekinabiro nʼendĩna yakyo;

⁴⁰ esĩlerembĩre busana nʼekibuga, esyondũyĩ syasyo, nʼebitindo byasyo, nʼolukimba olũkasũkũlĩraya busana nʼolũkyo lwʼekibuga, ebikoba byasyo, nʼesyongondo syabyo, nʼebindu byosĩ byʼomũbĩrĩ wʼahabũyĩrĩre, busana nʼeHema yʼerĩhĩndanamo.

⁴¹ Esyongimba esĩlũkĩre ndeke-ndeke busana nʼerikolera omo habũyĩrĩre, nʼesyongimba sĩbũyĩrĩre busana na Harũnĩ omũhererĩ, nʼesyongimba syʼabagala buwe, erikola ngʼabahererĩ.

⁴² Ngoko Mwami Mukulu ahana Musa, neryo abagala ba Ĩsraelĩ mobakola omũbĩrĩ gosĩ go batya.

⁴³ Kandi Musa mwalebya omũbĩrĩ gosĩ oyo, ibabirikolago; ngoko Mwami Mukulu ahana, ko bakolago batya. Neryo Musa mwatsumulabo.