Erĩlũayo 37 - AMASAKO ABOYTRTRE WA NYAMUHANGA AWAKAHULAWA MO BIBLIA

Erĩsandũkũ nʼamakerũbĩ

¹ Na Besalelĩ mwabatsa erĩsandũkũ eryo omo muti wʼomũshĩta; obuli bwalyo bwabya metere nguma na sentĩmetere ĩkũmĩ nʼĩtanu (1.15 m), nʼobugali bwalyo bwabya sentĩmetere makũmĩ ndatu nʼomwenda (69 cm), obuli bwalyo bwʼendata bwabya sentĩmetere makũmĩ ndatu nʼomwenda (69 cm).

² Neryo mwabambĩrya kulyo kwʼesyamagetsi esĩkangĩre omwisi nʼendata, kandi mwatĩmbya kulyo kwʼakakĩra kʼesyamagetsi.

³ Neryo mwahesa busana nalyo esyombũka ĩnĩ syʼesyamagetsi, omo mihimbi yalyo ĩnĩ; esyombũka ĩbĩrĩ oko luhande luguma lwalyo nʼesyombũka ĩbĩrĩ oko lundi luhande lwalyo.

⁴ Kandi mwakokotya emigamba yʼomuti wʼomũshĩta, mwabambĩrya kuyo kwʼesyamagetsi.

⁵ Neryo mwahĩra emigamba eyo omo syombũka oko syombande syʼerĩsandũko, busana nʼeriheka erĩsandũko.

⁶ Kandi mwakokotya ekĩtũmbĩ kyʼeriganyira omo syamagetsi esĩkangĩre; obuli bwakyo bwabya metere nguma na sentĩmetere ĩkũmĩ nʼĩtanu (1.15 m), nʼobugali bwakyo bwabya sentĩmetere makũmĩ ndatu nʼomwenda (69).

⁷ Kandi mwakokotya amakerũbĩ abiri omo syamagetsi; mwakokotyago omo mũbĩrĩ wʼobuhese oko syondũlĩ syʼekĩtũmbĩ kyʼeriganyira;

⁸ ekerũbĩ nguma oko ndũlĩ nguma, nʼekerũbĩ nguma oko yindi ndũlĩ; mwahesa ekĩtũmbĩ kyʼeriganyira nʼamakerũbĩ mo kitswe kiguma-guma oko syondũlĩ ĩbĩrĩ syakyo.

⁹ Kandi amakerũbĩ iniakasanza ebĩpũpa byago endata, eriswika ekĩtũmbĩ kyʼeriganyira omo bĩpũpa byago, amũsũ wago iniakatungererana; amũsũ wʼamakerũbĩ ĩnĩalolĩĩre oko kĩtũmbĩ kyʼeriganyira.

Emesa

¹⁰ Kandi mwakokotya emesa omo muti wʼomũshĩta; obuli bwayo bwabya sentĩmetere makũmĩ mwenda nʼĩbĩrĩ (92), nʼobugali bwayo bwabya sentĩmetere makũmĩ ani na ndatu (46), nʼobuli bwayo bwʼendata bwabya sentĩmetere makũmĩ ndatu nʼomwenda (69 cm).

¹¹ Neryo mwabambĩrya kuyo kwʼesyamagetsi esĩkangĩre, kandi mwakokoterya kuyo kwʼakakĩra kʼesyamagetsi erĩtĩmba kuyo.

¹² Kandi mwakokoterya kuyo kwʼomutano wʼobuli bwʼekiganza kiguma erĩtĩmba kuyo, kandi mwakokotya akakĩra kʼesyamagetsi busana nʼomutano wayo erĩtĩmba kuyo.

¹³ Kandi mwaheserayo esyombũka ĩnĩ syʼesyamagetsi, neryo mwahĩra esyombũka esyo omo nũnga ĩnĩ esyabya oko mihimbi ĩnĩ yayo.

¹⁴ Esyombũka esyo syabya hakũhĩ nʼendambi yayo omo myanya yʼemigamba busana nʼeriheka emesa.

¹⁵ Kandi mwakokotya emigamba omo muti wʼomũshĩta, mwabambĩrya kuyo kwʼesyamagetsi, busana nʼeriheka emesa.

¹⁶ Nʼakandi mwakokotya omo syamagetsi esĩkangĩre ebindu ebyabya oko mesa, ebisayi byayo, nʼemyũko yayo, nʼebibindi byayo, nʼehirega hyayo, hyʼerĩũtũlĩra.

Omutagala wʼetala

¹⁷ Kandi mwakokotya omutagala wʼetala omo syamagetsi esĩkangĩre; mwakokotya omutagala wʼetala omo mũbĩrĩ wʼobuhese, endĩna yago, nʼomũbĩmba wago; esyondehĩ syago, nʼemitwe yago, nʼomusanga wago, ebyosĩ byabya kigumaguma.

¹⁸ Neryo mohabya emitahi ndatu eyĩkalũa omo nganga syago; emitahi ĩsatu yʼomutagala wʼetala ĩyĩkalũa oko luhande luguma lwago, nʼemitahi ĩsatu yʼomutagala wʼetala ĩyĩkalũa oko lundi luhande lwago;

¹⁹ esyondehĩ ĩsatu syayirawa ngʼomusanga wʼendozĩ omo mutahi muguma, omutwe nʼomusanga; nʼesyondehĩ ĩsatu esĩkokotĩbwe ngʼomusanga wʼendozĩ omo gundi mutahi, omutwe nʼomusanga; bitya busana nʼemitahi ndatu eyĩkalũa omo mutagala wʼetala.

²⁰ Nʼomo mutagala wʼetala mwabya esyondehĩ ĩnĩ esĩkokotĩbwe ngʼomusanga wʼendozĩ, emitwe yasyo, nʼemisanga yasyo;

²¹ eyĩkwa wʼemitahi ĩbĩrĩ omutwe muguma wʼekitswe kiguma-guma nakyo, nʼeyĩkwa oko mitahi ĩbĩrĩ omutwe muguma wʼekitswe kiguma-guma nakyo, nʼeyĩkwa oko mitahi ĩbĩrĩ omutwe muguma wʼekitswe kiguma-guma nakyo, busana nʼemitahi ndatu ekĩkalũa muyo.

²² Emitwe yayo nʼemitahi yakyo byabya byʼekitswe kiguma-guma nakyo; ekyosĩ kyabya kyʼomũbĩrĩ muguma wʼerihesa omo syamagetsi esĩkangĩre.

²³ Neryo mwakokotya esyotala syakyo, sirinda, nʼebĩkahũmberaya byasyo nʼebibindi byʼerĩbũ byasyo, ebyʼesyamagetsi esĩkangĩre.

²⁴ Mwakokotyayo omo talanta nguma yʼesyamagetsi esĩkangĩre nʼebindu byosĩ byago.

Ekiherero kyʼobukwa

²⁵ Kandi mwakokotya ekiherero kyʼobukwa omo muti wʼomũshĩta; obuli bwakyo bwabya sentĩmetere makũmĩ ani na ndatu (46), nʼobugali bwakyo bwabya sentĩmetere makũmĩ ani na ndatu (46), habya halingirirene; nʼobuli bwakyo endata bwabya sentĩmetere makũmĩ mwenda nʼĩbĩrĩ (92 cm); amahembe wakyo abya wʼekitswe kiguma nakyo.

²⁶ Kandi mwaswika kukyo kwʼesyamagetsi esĩkangĩre, endata kukyo, nʼomo nganga syakyo oko mbande syosĩ, nʼamahembe wakyo; kandi mwakokoterya kukyo kwʼakakĩra kʼesyamagetsi erĩtĩmba oko mbande syosĩ.

²⁷ Neryo mwakokoterya kukyo kwʼesyombũka ĩbĩrĩ syʼesyamagetsi eyĩkwa oko kakĩra kakyo, oko syonganga syakyo ĩbĩrĩ, oko syombande ĩbĩrĩ syakyo busana nʼemyanya yʼemigamba yʼerihekakyo.

²⁸ Neryo mwakokotya emigamba yʼomuti wʼomũshĩta, mwabambĩryayo kwʼesyamagetsi.

²⁹ Kandi mwakokotya amagũta abũyĩrĩre wʼerĩhakabya, nʼobukwa obowene bwʼamanũkato awakakumba ndeke, omo menge wʼomwengĩ wʼamanũkato.