Erĩlũayo 36 - AMASAKO ABOYTRTRE WA NYAMUHANGA AWAKAHULAWA MO BIBLIA

Erĩkokotya ebindu byʼahabũyĩrĩre

¹ Neryo Besalelĩ na Aholĩabũ basyakola, nʼobuli mundu munyimanyima, oyo Mwami Mukulu abĩrĩhĩra kwʼamenge nʼobunyima-nyima, aminye ngoko angakola omũbĩrĩ gosĩ busana nʼobwĩmanĩrĩ bwʼahabũyĩrĩre, ngʼebyosĩ ebyo Mwami Mukulu ahana.

² Neryo Musa mwabirikira Besalelĩ na Aholĩabũ, nʼobuli mundu wʼobunyimanyima, oyo Nyamuhanga abĩrĩhĩra kwʼobunyima-nyima, nʼobuli mundu oyo mutima wuwe abirimuha omũhwa eriya oko mũbĩrĩ nʼerikolago.

³ Neryo mobangirira uku Musa olũsũnzo losĩ olo bandu ba Ĩsraelĩ baleta busana nʼomũbĩrĩ wʼerĩhĩmba ahabũyĩrĩre. Mobamuletera kandi olũsũnzo ngoko balĩayĩtsũtsa obuli ngyakya.

⁴ Nʼabandu bosĩ bʼamenge abakola omũbĩrĩ wʼahabũyĩrĩre, obuli mundu mwalũa oko mũbĩrĩ wuwe owabya akakola.

⁵ Neryo mobabũga na Musa bati, Abandu bamaleta bingi kwilaba ebitolere oko bũhĩmbe, obo Mwami Mukulu ahana ati tukole.

⁶ Neryo Musa mwahana, nʼerilayira omo kilaliriro kyosĩ, ati, Omulume kutse omũkalĩ balete bingaho busana nʼolũsũnzo lwʼahabũyĩrĩre. Neryo abandu mobakakĩrĩbwa erireta olundi lũsũnzo.

⁷ Kusangwa ebindu babya nabyo mobyatolera busana nʼomũbĩrĩ gosĩ wʼerikolaho, kandi mobyakanya.

⁸ Nʼabandu bosĩ bʼomutima wʼobunyima-nyima omo katĩkatĩ kabo abakola omũbĩrĩ; mobakokotya eHema mwʼesyongimba esĩkasũkũlĩraya ĩkũmĩ; Besalelĩ akokotayabyo omo kĩtanĩ ekĩlũkĩre ndeke, nʼerangĩ yʼakanĩkĩ, nʼerangĩ yʼolubono, nʼerangĩ yʼengula, haguma nʼamakerũbĩ, omũbĩrĩ wʼomundu wʼobunyima-nyima.

⁹ Obuli bwʼobuli lukimba olũkasũkũlĩraya bwabya metere ĩkũmĩ nʼĩbĩrĩ na sentĩmetere makũmĩ munani nʼomunani (12.88), nʼobugali bwʼobuli lukimba olũkasũkũlĩraya emetere nguma na sentĩmetere makũmĩ munani nʼĩnĩ (1.84 m); esyongimba esĩkasũkũlĩraya syosĩ syabya lulengero luguma.

¹⁰ Esyongimba esĩkasũkũlĩraya ĩtanu mosyakũndĩkanĩbwa olundi oko lundi; nʼesindi ĩtanu mosyakũndĩkanĩbwa haguma olundi oko lundi.

¹¹ Neryo mwayira ebisu byʼerangĩ yʼakanĩkĩ oko mũsĩke wʼolukimba olũkasũkũlĩraya luguma erĩtsũka oko mutsotso aho lũkũndĩkenĩe; mwayira atya oko mũsĩke wʼolukimba olũkasũkũlĩraya olwabya oko ndũlĩ ahakũndĩkenĩe hʼakabiri.

¹² Neryo mwakola ebisu makũmĩ atanu omo lukimba olũkasũkũlĩraya luguma, nʼebisu makũmĩ atanu oko mũsĩke wʼolukimba olũkasũkũlĩraya ahakũndĩkenĩe hʼakabiri; ebisu byabya bisamalirene.

¹³ Kandi mwakokotya ebĩbohĩ makũmĩ atanu byʼesyamagetsi, mwakũndĩkanĩa esyongimba esĩkasũkũlĩraya, oluguma oko lundi omo bĩbohĩ ebyo; litya eHema moyabya nguma-guma.

¹⁴ Kandi mwakokotya esyongimba esĩkasũkũlĩraya omo bweya bwʼembene eribya hema endata oko Hema nene; mwakokotya esyongimba esĩkasũkũlĩraya ĩkũmĩ nʼoluguma.

¹⁵ Obuli bwʼobuli lukimba olũkasũkũlĩraya bwabya metere ĩkũmĩ nʼĩsatu (13) na sentĩmetere makũmĩ munani (13.80), nʼobugali bwʼobuli lukimba olũkasũkũlĩraya bwabya metere nguma na sentĩmetere makũmĩ munani nʼĩnĩ (1.84). Esyongimba esĩkasũkũlĩraya erĩkũmĩ nʼoluguma syabya syʼolulengero luguma.

¹⁶ Neryo mwakũndĩkanĩa esyongimba esĩkasũkũlĩraya ĩtanu aho wasyo, nʼesyongimba esĩkasũkũlĩraya endatu aho wasyo.

¹⁷ Kandi mwakokotya ebisu makũmĩ atanu oko mũsĩke wʼolukimba olũkasũkũlĩraya olwabya oko luhande lwʼeyĩhya aho sĩkũndĩkenĩe, kandi mwakokotya ebisu makũmĩ atanu oko mũsĩke wʼolukimba olũkasũkũlĩraya olwabya eyĩhya ahakũndĩkenĩe ahʼakabiri.

¹⁸ Kandi mwakokotya ebĩbohĩ makũmĩ atanu byʼomulinga erĩkũndĩka eHema yo haguma, iyatoka eribya nguma.

¹⁹ Kandi mwakokotya ekĩtũlĩka busana nʼeHema omo syongobĩ syʼesyombangale esĩnĩre omo ngula, nʼekĩtũlĩka kyʼengobĩ yʼepombolo endata.

Ebisayi byʼahabũyĩrĩre

²⁰ Neryo mwakokotya ebisayi busana nʼahabũyĩrĩre, ebyʼomuti wʼomũshĩta, ebĩsĩngĩkĩre.

²¹ Obuli bwʼekisayi bwabya metere ĩnĩ na sentĩmetere makũmĩ ndatu (4.60), nʼobugali bʼobuli kisayi bwabya sentĩmetere makũmĩ ndatu na mwenda (69 cm).

²² Obuli kisayi ekiwite esyondimi ĩbĩrĩ esikasosawa haguma; mwakola atya busana nʼebisayi byosĩ byʼeHema.

²³ Kandi mwakokotya ebisayi busana nʼeHema; ebisayi makũmĩ abiri busana nʼoluhande lwʼelutambi lwʼeyĩkwa.

²⁴ Kandi mwakokotya ebitindo byʼekĩtsĩpa makũmĩ ani omo ndĩna yʼebisayi makũmĩ abiri; nʼebitindo bibiri, nʼebitindo byʼeyĩkwa wʼekindi kisayi busana nʼesyondimi syakyo ĩbĩrĩ.

²⁵ Nʼoko luhande lwʼakabiri lwʼeHema oko luhande lwʼelutambi lwʼendata, mwakokotya ebisayi makũmĩ abiri,

²⁶ nʼebitindo byabyo amakũmĩ ani byʼekĩtsĩpa; ebitindo bibiri omo ndĩna yʼekisayi kiguma, nʼebitindo bibiri omo ndĩna yʼekindi kisayi.

²⁷ Kandi busana nʼoluhande lwʼenyũma lwʼeHema erĩlolya eyĩkwa mwakokotya ebisayi ndatu.

²⁸ Kandi mwakokotya ebisayi bibiri busana nʼesyonũnga syʼahʼerĩĩkala oko luhande lwʼenyũma.

²⁹ Kandi byabya ngendo ĩbĩrĩ eyĩkwa; na litya mobyabya kiguma-guma erĩhĩka endata oko mbũka nguma; mwayira atya oko bibiri omo syonũnga ĩbĩrĩ.

³⁰ Kandi mohabya ebisayi munani, nʼebitindo byabyo byʼekĩtsĩpa, ebitindo ĩkũmĩ nʼendatu; ebitindo bibiri eyĩkwa oko buli kisayi.

³¹ Kandi mwakokotya esyongomo syʼomuti wʼomũshĩta; ĩtanu busana nʼebisayi byʼoluhande luguma lwʼeHema,

³² nʼesindi ngomo ĩtanu busana nʼebisayi byʼolundi luhande lwʼahʼerĩĩkala, nʼesindi ngomo ĩtanu busana nʼebisayi byʼahʼerĩĩkala oko luhande lwʼenyũma erĩlolya eyĩkwa.

³³ Kandi mwakokotya engomo yʼomo katĩkatĩ eritwangana omo katĩkatĩ kʼebisayi erĩlũa oko ndũlĩ nguma erĩhĩka oko yindi ndũlĩ.

³⁴ Neryo ebisayi ebyo mwaswika kubyo kwʼesyamagetsi, mwakokotya esyombũka syabyo syʼesyamagetsi busana nʼeribamba esyongomo esyo, kandi mwabambĩrya oko syongomo kwʼesyamagetsi.

Olukimba olũkasũkũlĩraya nʼesyondũyĩ syalo

³⁵ Neryo mwakokotya olukimba olũkasũkũlĩraya omo ngohe yʼerangĩ yʼakanĩkĩ, nʼomo rangĩ yʼolubono, nʼeyʼengula, nʼekisohe ekĩlũkĩre ndeke; mwakokotya haguma nʼamakerũbĩ omũbĩrĩ wʼomundu munyima-nyima.

³⁶ Kandi mwakokotya busana nalo esyondũyĩ syʼomuti wʼomũshĩta, nʼerĩbambĩrya kusyo kwʼesyamagetsi; nʼesyombaniko syasyo syabya syʼesyamagetsi; neryo mwaheserasyo ebitindo bini byʼekĩtsĩpa.

³⁷ Neryo mwakokotya olukimba olũkasũkũlĩraya busana nʼolũkyo lwʼeHema, olwʼerangĩ yʼakanĩkĩ ngʼerangĩ yʼolubono, nʼerangĩ yʼengula, nʼekisohe ekĩlũkĩre ndeke, omũbĩrĩ wʼomũlũkĩ;

³⁸ kandi mwakokotya esyondũyĩ ĩtanu syalo haguma nʼesyombaniko syalo; kandi mwabambira emitwe yalo nʼebĩhambĩrĩrĩ byasyo omo syamagetsi; nĩkwa ebitindo byasyo bitanu byabya byʼomulinga.