Erĩlũayo 34 - AMASAKO ABOYTRTRE WA NYAMUHANGA AWAKAHULAWA MO BIBLIA

Ebisayi bibiri byʼamabwe ebihyabihya

¹ Neryo Omwami Mukulu mwabwira Musa ati, Uyibatsire ebisayi bibiri byʼamabwe ngʼebyʼerĩmbere; nage ngandisaka oko bisayi ebyo kwʼebĩnywa ebyabya oko bisayi byʼembere, ebyo watulanga.

² Ũsĩke omo ngyakya, uhetukire omo ngyakya oko kitwa kyʼeSĩnaĩ, ũyĩkangaye embere syage oko singi yʼekitwa.

³ Sihabye mundu oyukasyahetuka haguma nawe; kutse Sihabye mundu nʼomuke oyukalolawako omo kitwa kyosĩ, kutse ebĩhyo byʼesyombũlĩ, kutse ebihangulo byʼesyonde sibirire ebiti hakũhĩ nʼekitwa ekyo.

⁴ Neryo Musa mwabatsa ebisayi bibiri byʼamabwe nʼebyʼerĩmbere, neryo Musa mwatsinduka omo karo-karo, mwahetukira oko kitwa kyʼeSĩnaĩ, ngoko Mwami Mukulu amuhana, kandi mwĩmya ebisayi byʼamabwe omo byala biwe.

⁵ Neryo Omwami Mukulu mwakĩma omo kĩtũ, mwahangana haguma naye aho, mwahula erĩna lyʼOmwami Mukulu.

⁶ Neryo Omwami Mukulu mwalaba embere siwe, mwatũlago, ati, Omwami Mukulu, Omwami Mukulu Nyamuhanga oyo woswĩre nʼeriganyira nʼowʼolukogo, sĩangũhĩre, okwʼihitana, oyo woswĩre nʼobwenge bwʼolwanzo nʼomwatsi wʼekwenene;

⁷ oyukabikira obwenge bwʼolwanzo oko bandu maelfu, oyukabuyira obubi, nʼamalolo, nʼebibi; oyutendisyabya butasuyira ababi, erĩhĩra ebibi byʼabĩse oko bana, nʼoko bitsikulu babo, erĩhĩka oko lulengo lwʼakasatu nʼolwʼakani.

⁸ Neryo Musa mwanguha, mũnamya omutwe wuwe oko kitaka, neryo mwaramya.

⁹ Neryo mwabũga ati, Lino namabana olukogo omo meso wawe, Uwe, Omwami Mukulu, ngakusaba, nyiti, Uleke Omwami Mukulu alabe omo katĩkatĩ ketu; nʼomo bane bandu bʼebĩkya bĩkalĩre; kandi utubuyire amalolo wetu nʼebibi byetu, kandi ũtwĩmaye mo mwandu wawe.

Mũyĩtegaye oko sanamu

¹⁰ Neryo Nyamuhanga mwabũga ati, Lebaya; ngandĩhĩra erilagana. Nasyayira ebitiko-tiko embere syʼabandu bawe bosĩ, ebite byatakolwa omo kihugo kyosĩ, kutse omo kihanda nʼekiguma; nʼabandu bosĩ aho bĩkere basyalangira omũbĩrĩ wʼOmwami Mukulu; kusangwa ni kindu kyʼerĩũbahya ekyo ngandikola nawe.

¹¹ Ũtegaye ekyo ngakuhana mũnabwĩre; samalira, ngahiga embere syawe Omũamorĩ, nʼOmukanana, nʼOmũhĩtĩ, nʼOmũperĩzĩ, nʼOmũhĩvĩ, nʼOmũyebũsĩ.

¹² Ũyĩtegaye, susakane nʼesyondũlanĩ syʼekihugo kyʼeyo ukaya, bakasyabya kitego omo katĩkatĩ kenyũ.

¹³ Nĩkwa, mwasyasambula ebiherero byabo, nʼerĩtsũtsanga esyondũyĩ syabo, mwasyatemera ahisi esisumba syabo sya Asera,

¹⁴ Kusangwa sũsyeramaya eyindi nyamuhanga; kusangwa Omwami Mukulu, erĩna liwe yo Bũha, ni Nyamuhanga wʼobũha.

¹⁵ Ukasyasakana nʼesyondũlanĩ syʼekihugo, nʼeriyira oburagane nʼesyonyamuhanga syabo, nʼeriherera esyonyamuhanga syabo, nʼomundu iniakubirikira nawe iwalya oko buhere buwe;

¹⁶ nʼakandi ĩwahĩkĩrya abali babo bʼabagala bawe, nʼabana-bato bawe ibaragana nʼesyonyamuhanga syabo, kandi iwaleka abana benyũ erianza esyonyamuhanga syabo.

¹⁷ Susyeyiyirira esyonyamuhanga syʼerĩnũnĩa.

¹⁸ Wasyateya ekiro kikulu kyʼobundu Bute mo Kĩhamya. Wasyalya obundu obute mo kĩhamya oko biro birinda, ngoko nakuhana, oko mugulu ahĩrawa oko mukera wa Abĩbũ; kusangwa omo mukera wa Abĩbũ momwalũa eMĩsĩrĩ.

¹⁹ Ebyosĩ ebĩkatsũka eributwa ni byage; nʼamatungo wawe gosĩ wʼobulume, ehimbere hyʼesyonde nʼehyʼesyombũlĩ.

²⁰ Nʼakambere kʼepunda wasyatongolyako omo kyana kyʼembũlĩ, kutse wamagana erĩtongolyako, wasyanyola ebĩkya byako. Ehimbere hyosĩ hyʼabagala bawe wasyahĩtongolya. Omundu siahulukire embere syage yo buyira.

²¹ Wasyakola omũbĩrĩ omo biro ndatu, nĩkwa omo kiro kyʼebirinda wasyaluhuka; oko mugulu wʼeririma, nʼoko mugulu wʼerigesa wasyaluhuka.

²² Wasyateya ekiro kikulu kyʼAmayenga, ebĩgũma ebĩkatsũka eriera byʼengano, nʼekiro kikulu kyʼErigesa oko ndũlĩ yʼomwaka.

²³ Engendo ĩsatu oko mwaka abalume bawe bosĩ basyahuluka embere syʼOmukama Iye Omwami Mukulu, Nyamuhanga wa Ĩsraelĩ.

²⁴ Kusangwa nasyagusa ebihanda byʼeyĩhya embere syawe, nʼeritomekera emitano yawe; kutse sihali oyo wasyarumwa oko kihugo kyawe omugulu ukahetuka erihuluka embere syʼOmwami Mukulu Nyamuhanga wenyũ engendo ĩsatu omo mwaka.

²⁵ Susyehera omusasi wʼobuhere bwage haguma nʼobundu obuli mwʼekĩhamya; kutse obuhere bwʼekiro kikulu kyʼErikiruka isibwasakako erĩhĩka oko ngyakya.

²⁶ Ebĩkatsũka erihululwa wasyaletabyo omo nyũmba yʼOmwami Mukulu Nyamuhanga wawe. Sũsyehũka ekyana kyʼembene omo masabũ wʼenyĩnya wakyo.

²⁷ Neryo Omwami Mukulu mwabũga na Musa ati, Usake ebĩnywa ebĩ; kusangwa omo bĩnywa ebĩ, nabiriyira endagano haguma nawe na haguma na Ĩsraelĩ.

²⁸ Neryo Musa abyaho haguma nʼOmwami Mukulu emisibo makũmĩ ani nʼebiro makũmĩ ani; kandi mwatalya kalyo, kutse erĩpũlya magetsi. Kandi Omwami Mukulu mwasaka oko bisayi ebĩnywa byʼerilagana, amahano ĩkũmĩ.

Obũsũ bwa Musa bũkakangabasanaya

²⁹ Neryo, omugulu Musa andagala oko kitwa kyʼeSĩnaĩ, kandi ebisayi, bibiri byʼerĩtũlago ibine omo byala biwe, omugulu akĩma erĩlũa oko kitwa, Musa mwataminya esyongoba syʼobũsũ buwe ko syakangabasenĩe busana nʼerĩkanĩa na Nyamuhanga.

³⁰ Nʼomugulu Harũnĩ nʼabandu bosĩ ba Ĩsraelĩ balangira Musa, mobalangira, esyongoba syʼobũsũ buwe sĩkakangabasanĩa; neryo mobũbaha erisegera hakũhĩ naye.

³¹ Neryo Musa mwabirikira kubo; na Harũnĩ nʼabatabalĩ bosĩ bʼendeko mobamusubako, kandi Musa mwabũga nabo.

³² Nʼenyũma wʼaho abandu bosĩ ba Ĩsraelĩ mobasegera hakũhĩ; neryo Musa mwahanabo erikola ebyosĩ ebyo Mwami Mukulu amubwira oko kitwa kyʼeSĩnaĩ.

³³ Neryo Musa abere abibuga erĩkanĩa nabo, mwahĩra akakimba oko bũsũ buwe.

³⁴ Nĩkwa omugulu Musa ingira embere syʼOmwami Mukulu erĩkanĩa naye, Musa mwalũsya akakimba ako, erĩhĩka aho alũĩraho; neryo omugulu alũayo, mwabũga nʼabandu ba Ĩsraelĩ ebyo alyahanawa.

³⁵ Abandu ba Ĩsraelĩ mobasamalira obũsũ bwa Musa, kwʼengoba yʼobũsũ buwe ĩkangabasenĩe; neryo Musa mwahĩra akakimba kʼoko bũsũ buwe, erĩhĩka aho ingirira erĩkanĩa na Nyamuhanga.