Erĩlũayo 32 - AMASAKO ABOYTRTRE WA NYAMUHANGA AWAKAHULAWA MO BIBLIA

Harũnĩ akahesera Abaĩsraelĩ ekyana kyʼende kyʼesyamagetsi

¹ Neryo omugulu abandu balangira ngoko Musa amamala yo ndambĩ eritindakĩma oko kitwa, abandu mobayĩhĩndanĩa ahali Harũnĩ, mobamubwira bati, Ego, tũkokoteraye esyonyamuhanga, esikandisyatubera embere; kusangwa Musa oyo watũlũsaya omo kihugo kyʼeMĩsĩrĩ Sĩtwasĩ ngʼabere yʼati.

² Neryo Harũnĩ, mwabũga, nabo ati, Mũtsũtsange esyombũka syʼesyamagetsi esiri omo matwĩ wʼabakalĩ benyũ nʼawʼabagala benyũ, nʼawʼabali benyũ, munyireteresyo.

³ Neryo abandu bosĩ mobatwa esyombũka syʼesyamagetsi esyabya omo matwĩ wabo, mobaleterasyo Harũnĩ.

⁴ Naye mwĩmyasyo omo byala byabo, mwakokotyasyo omo ngarwe, mwayirasyo ngʼekyana kyʼende akahesayo; neryo mobabũga bati, Esĩ ni nyamuhanga syawe, uwe Ĩsraelĩ, esyabalũsaya omo kihugo kyʼeMĩsĩrĩ.

⁵ Nʼomugulu Harũnĩ alangirayo, mwahĩmba ekiherero embere syayo; kandi Harũnĩ mwalayira, ati, Omo ngakya kyasyabya kiro kikulu busana nʼOmwami Mukulu.

⁶ Neryo mobabuka omo ngyakya-ngyakya, mobahera amahere wʼerĩokererya, mobaleta amahere wʼobuholo; nʼabandu mobĩkala ahisi busana nʼerirya nʼerĩpũlya, kandi mobahangana nʼerisata.

Erihitana lya Nyamuhanga

⁷ Neryo Omwami Mukulu mwabũga na Musa ati, Ũkĩme, ugende; kusangwa abandu bawe abo walũsaya omo kihugo kyʼeMĩsĩrĩ, babĩrĩyĩtsandya;

⁸ babiribinduka lũba erĩlũa omo nzira eyo nahanabo; babiriyikolera ekyana kyʼende ekikahesawa, babĩrĩramyakyo, kandi babirihererakyo, bati, Uwe Ĩsraelĩ, oyũ ni nyamuhanga wawe, oyo wakũlũsaya omo kihugo kyʼeMĩsĩrĩ.

⁹ Neryo Omwami Mukulu mwabũga na Musa ati, Namalangira abandu aba, neryo lebaya, ni bandu bʼebĩkya bĩkalĩre;

¹⁰ neryo lino unyireke, erihitana lyage lyake kubo, inatoka erĩtogotyabo; nawe nasyakuyira mo kihanda kinene.

¹¹ Neryo Musa mwalakira Omwami Mukulu Nyamuhanga wuwe ati, Uwe Mwami Mukulu, busana nakĩ erihitana lyawe likaka oko bandu bawe, abo walũsaya omo kihugo kyʼeMĩsĩrĩ omo maka manene nʼomo byala byʼakagala kwehĩ?

¹² Busana nakĩ Abanya Mĩsĩrĩ bangabũga bati, Alũsaya bʼeno omo menge erĩĩtĩrabo oko bitwa, nʼerĩtogotyabo erĩlũa omo kihugo kwehĩ? Uleke erihitana lyawe lĩkalĩre, ubinduke oko kibi ekĩ oko bandu bawe.

¹³ Wibuke Abrahamũ, Ĩsaka, na Ĩsraelĩ, abagombe bawe, abo walahĩrĩrayako busana nawe, nʼerĩbũga nabo, uti, Nasyakanyĩrĩrya olubuto lwenyũ ngʼesyongũnũnũ syʼelubula, nʼekihugo kyosĩ ekyo nabiriahula nasyahakyo abana benyũ, basyalyakyo mo mwandu wa kera na kera.

¹⁴ Neryo Omwami Mukulu mwabinduka oko kibi ekyo abũga ati asyakola oko bandu buwe.

Erihitana lya Musa

¹⁵ Neryo Musa mwabinduka, mwakĩma oko kitwa, ĩnĩahekĩre ebisayi bibiri byʼerĩtũlago omo byala biwe; ebisayi ebyo byabya bĩsakĩre oko mbande syosĩ ĩbĩrĩ; ĩbĩsakĩre oko lundi luhande nʼoko lundi.

¹⁶ Ebisayi ebyo byabya mũbĩrĩ wa Nyamuhanga, erisaka lyabya ʼisaka lya Nyamuhanga, erigewa oko bisayi.

¹⁷ Kandi omugulu Yosũa owa olukanda lwʼabandu ababya bakabũya olukanda, mwabũga na Musa ati, Hali lukanda ngʼolwʼamalwa omo kilaliriro.

¹⁸ Nĩkwa mwabũga ati, Ebyo ngowa si mulenge wʼobogo bwʼerĩsĩngana, kutse mulenge wʼobogo busana nʼerĩsĩngwa; nĩkwa ngowa omulenge wʼerĩĩmba.

¹⁹ Nʼakandi omugulu Musa ahĩka hakũhĩ nʼekilaliriro, mwalangira olwana lwʼende nʼamasata; neryo erihitana lya Musa molyaka, neryo mwagusa ebisayi ebyabya omo byala biwe, mwatulangirabyo eyĩkwa oko kitwa.

²⁰ Neryo mwĩmya olwana lwʼende olo bakokotaya, mokyalo oko muliro, mwaswalo mwʼĩbũ, neryo mwalagalĩryalyo omo magetsi, neryo mwanywĩsyalo abandu ba Ĩsraelĩ.

²¹ Neryo Musa mwabũga na Harũnĩ, ati, Abandu aba mobakukolerekĩ, kyaleka iwaleterabo erĩlolo lingaha kwehĩ?

²² Neryo Harũnĩ mwabũga ati, Suleke erihitana lyʼomukama wage likaka; ũnasĩ abandu aba, ngoko babĩrĩyĩhĩra oko bibi.

²³ Kusangwa banyibwira bati, Ũtũkokoteraye esyonyamuhanga, esikatubera embere; kusangwa Musa oyo watũlũsaya omo kihugo kyʼeMĩsĩrĩ, Sĩtwasĩ ngʼabere yʼati.

²⁴ Neryo monabwirabo nyiti, Oyuli nʼesyamagetsi, atwesyo; neryo mobambasyo nage monagusasyo omo muliro, neryo mosyalũamo ekyana kyʼende ekĩ.

Erisuyira abandu

²⁵ Neryo omugulu Musa alangira bandu ko balimugenda batya-batya kusangwa Harũnĩ iniabirirekabo litya-litya busana nʼerĩsekererya omo katĩkatĩ kʼesyonzĩgũ syabo,

²⁶ neryo Musa mwahangana oko lũkyo lwʼekilaliriro, ati, Oyuli oko luhande lʼOmwami Mukulu, ase kwĩngye. Nʼabagala bosĩ ba Lawĩ mobayĩhĩndanĩa ukwʼiye.

²⁷ Neryo mwabũga nabo ati, Omwami Mukulu Nyamuhanga wa Ĩsraelĩ, ati, Obuli mundu ayibohere omũyalĩ wuwe oko ndungu yiwe, alabe eyĩ nʼeyĩ erĩlũa oko lũkyo erĩhĩka oko lũkyo omo kilaliriro kyosĩ, obuli mundu ĩte mugala wabo, nʼobuli mundu mũlĩkyabo, nʼobuli mundu omwĩra wuwe.

²⁸ Nʼabagala ba Lawĩ mobakola batya ngʼekĩnywa kya Musa; nʼekiro ekyo mohawa bandu nga elfu ĩsatu (3,000).

²⁹ Neryo Musa mwabũga ati, Mũnabwĩre, muyihigule oko Mwami Mukulu, kusangwa obuli mundu abirilwa nʼomugala wuwe, nʼomugala wabo; Omwami Mukulu atoke eribatsumula mũnabwĩre.

Erisabira Abaĩsraelĩ

³⁰ Neryo engyakya wʼaho, Musa mwabũga nʼabandu ati, Mwabĩrĩhalya erĩlolo lĩnene; na lino ngahetukira ahali Omwami Mukulu; kwamũhwa nasyayira embanulo busana nʼebibi byenyũ.

³¹ Neryo Musa mwasuba eyiri Omwami Mukulu, mwabũga ati, Ĩyo-o, abandu aba babĩrĩhalya erĩlolo ĩnene, babiriyiyirira esyonyamuhanga syʼesyamagetsi.

³² Nĩkwa lino wamasonda ubuyire erĩlolo lyabo; bite bitya, ngakusaba, unyisangule, erĩlũa omo kitabu ekyo wabirisaka.

³³ Neryo Omwami Mukulu mwabũga na Musa ati, Oyo wabĩrĩnyĩhalyako, yo nasyasangula erĩlũa omo kitabu kyage.

³⁴ Na lino ugende, usondole abandu bʼaho nabirikubwira. Lebaya, omũlaĩka wage akandigenda embere syawe; nĩkwa oko kiro kyʼerisuyira, nasyasuyirabo busana nʼebibi byabo.

³⁵ Neryo Omwami Mukulu mwaswĩrya abandu, busana nʼebyo bakola nʼolwana lwʼende, olo Harũnĩ ahesa.