Erĩlũayo 31 - AMASAKO ABOYTRTRE WA NYAMUHANGA AWAKAHULAWA MO BIBLIA

Erĩhĩra abanyima-nyima oko mũbĩrĩ oyo

¹ Neryo Omwami Mukulu mwabũga na Musa ati,

² Samalira, namabirikira omo lĩna liwe Besalelĩ mugala wa Ũrĩ, omugala wa Hũrĩ, owʼekihanda kya Yũda;

³ namamũsũlya nʼOmũlĩmũ wa Nyamuhanga, omo menge, nʼomwʼiminya, nʼomo bowĩka, nʼomo mĩsĩndo yosĩ yʼerikola,

⁴ erikola emĩbĩrĩ yʼobunyimanyima, nʼerikola omo syamagetsi, nʼomo syʼebĩtsĩpa, nʼomo mulinga,

⁵ nʼeribatsa amabwe busana nʼerisingikago, nʼeribatsa ebisayi, nʼerikola omo mĩsĩndo yosĩ yʼobũkengeregetanĩa.

⁶ Kandi ĩngye nabĩrĩhĩra haguma na Besalelĩ ye Aholĩabũ, mugala wa Ahĩsamakĩ, owʼekihanda kya Danĩ. Kandi nabĩrĩhĩra obunyima-nyima omo mitima yʼabandu bosĩ abawite amenge, batoke erikola ebyosĩ ebyo nabirikuhana.

⁷ EHema yʼerĩhĩndanamo, nʼerĩsandũko lyʼerĩtũlago, nʼekĩtũmbĩ kyʼeriganyira ekiri endata kulyo, nʼebindu byosĩ byʼeHema,

⁸ nʼemesa nʼesyonyungu syayo, nʼomutagala wʼetala haguma nʼesyonyungu syago syosĩ, nʼekiherero kyʼobukwa,

⁹ nʼekiherero kyʼobuhere bwʼerĩokererya haguma nʼesyonyungu syakyo syosĩ, nʼekinabiro nʼendĩna yakyo,

¹⁰ nʼesyongimba sĩlũkĩre ndeke-ndeke, nʼesyongimba sĩbũyĩrĩre sya Harũnĩ omũhererĩ, nʼesyongimba syʼabagala buwe, erikola omũbĩrĩ wʼobũhererĩ.

¹¹ Nʼamagũta wʼerĩhakabya, nʼobukwa bwʼamanũkato agowene busana nʼahabũyĩrĩre; ngʼebyosĩ nabirikuhana ko basyakola batya.

Omwatsi wʼeSabato

¹² Neryo Omwami Mukulu mwabũga na Musa, ati,

¹³ Kandi Ubwire abana ba Ĩsraelĩ uti, Kwenene mwasyateya esyo Sabato syage; kusangwa ni kiminyikalo omo katĩkatĩ kage nenyũ omo syondengo syenyũ syosĩ; imwatoka eriminya ko ndi Mwami Mukulu oyukabahigula.

¹⁴ Neryo mwasyateya eSabato; kusangwa ĩbũyĩrĩre ũkwʼĩnywe; obuli mundu oyũkatsandayayo, kwenene asyĩtwa; kandi obuli mundu oyukakola mũbĩrĩ wahi muyo, omundu oyo asyahigwa erĩlũa omo katĩkatĩ kʼabandu buwe.

¹⁵ Ebiro ndatu omũbĩrĩ asyakolwa, nĩkwa oko kiro kyʼakalinda ni Sabato yʼeriluhuka lyʼekwenene, ekĩbũyĩrĩre oko Mwami Mukulu; Omundundi oyukakola omũbĩrĩ wahi omo kiro kyʼeSabato kwenene asyĩtwa.

¹⁶ Busana nʼekyo, abandu ba Ĩsraelĩ basyateya eSabato, nʼerikenga eSabato omo syondengo syenyũ syosĩ, ni ndagane ya kera na kera.

¹⁷ Ni kiminyikalo omo katĩkatĩ kage nʼabandu ba Ĩsraelĩ kera na kera; kusangwa Omwami Mukulu mwahangika olubula nʼekihugo omo biro ndatu, neryo oko kiro kyʼebirinda mwaluhuka mwatekana.

Musa akahabawa ebisayi bibiri byʼerĩtũlago

¹⁸ Neryo abere abibuga erĩkanĩa naye oko kitwa kyʼeSĩnaĩ, Nyamuhanga mwaha Musa ebisayi bibiri byʼerĩtũlago, ebisayi byʼamabwe, ebĩsakĩre omo munwe wa Nyamuhanga.