Erĩlũayo 3 - AMASAKO ABOYTRTRE WA NYAMUHANGA AWAKAHULAWA MO BIBLIA

Nyamuhanga akabirikira Musa omo kisaka kikaka

¹ Nĩkwa Musa abya akalĩsya ekĩhyo kya Yetero ĩse-byala wuwe, omũhererĩ wʼeMĩdĩanĩ; neryo Musa mwasondolakyo enyũma wʼembwarara, mwahĩka oko kitwa kya Nyamuhanga, kwʼeHorebũ.

² Nʼomũlaĩka wʼOmwami Mukulu mwamuhulukira omo kisaka ekikaka mʼomuliro; naye mwalangira, neryo, talebaya ekisaka kikaka mʼomuliro, kandi ekisaka mokitakirira.

³ Na Musa mwabũga ati, Natakeba lino, nyĩrebaye omwatsi munene oyũ nga nĩkĩ kikaleka ekisaka ikitakirira.

⁴ Neryo omugulu Omwami Mukulu alebaya ko Musa amakeba erĩrebya, Nyamuhanga mwamubirikira omo kisaka, ati, Musa, Musa. Naye mwasũbĩrya ati, Nandi hano.

⁵ Neryo Nyamuhanga mwabũga ati, Susegere hano. Lũsaya esyongendero syawe oko bisando byawe, kusangwa aho guhangene ni kitaka kĩbũyĩrĩre.

⁶ Kandi mwabũga ati, Ĩngye indi Nyamuhanga wa tata wawe, Nyamuhanga wa Abrahamũ, Nyamuhanga wa Ĩsaka, na Nyamuhanga wa Yakobo. Neryo Musa mwabĩsa ũbũsũ buwe; kusangwa mubaha erilola uku Nyamuhanga.

⁷ Neryo Omwami Mukulu mwabũga ati, Kwenene nabirilangira amalĩge wʼabandu bage abali eMĩsĩrĩ, nabĩrĩowa ekiriro kyabo busana nʼabĩmanĩrĩ babo; kusangwa nyĩnasĩ amaligo wabo.

⁸ Nage nabĩrĩkĩma erĩlamyabo omo byala byʼAbanya Mĩsĩrĩ, erĩlũsyabo omo kihugo ekyo, erĩhĩka omo kihugo kyowene kinene, omo kihugo ekyoswĩre mwʼamasabũ nʼobuki; ahali Omunya Kanana, nʼOmũhĩtĩ, nʼOmũamorĩ, nʼOmũperĩzĩ, nʼOmũhĩvĩ, nʼOmũyebũsĩ.

⁹ Na lino talebaya, ekiriro kyʼabana ba Ĩsraelĩ kyamabĩmbĩkako; kandi nabirilangira erinuba eryo Abanya Mĩsĩrĩ bakabanũbayamo.

¹⁰ Na lino Wase ngandikutuma ewa Farao, iwatoka erĩlũsya abandu bage abana ba Ĩsraelĩ erĩlũa eMĩsĩrĩ.

¹¹ Neryo Musa mwabũga na Nyamuhanga ati, Ĩngyendi uti nangaya ewa Farao, uti nangalũsya abana ba Ĩsraelĩ bʼeMĩsĩrĩ kwehĩ?

¹² Neryo Nyamuhanga mwabũga ati, Kwenene nasyabya haguma nawe; nʼekĩ kyasyabya kiminyikalo ukʼuwe, ngoko nabirikutuma: Wasyabya wabĩlũsya abandu omo Mĩsĩrĩ wasyaramya Nyamuhanga oko kitwa ekĩ.

¹³ Na Musa mwabwira Nyamuhanga ati, Lebaya, omugulu nasyahĩka oko bana ba Ĩsraelĩ nʼeribwirabo nyiti, Nyamuhanga wʼabotata wenyũ amanyituma kwĩnywe nabo basyambũlya bati, Erĩna liwe yondi kwehĩ? Nage nasyabwira bokĩ kwehĩ?

¹⁴ Nyamuhanga mwabwira Musa ati, NYINE OYŨ NYINE; naye mwabũga ati, Wasyabũga utya nʼabana ba Ĩsraelĩ uti, NYINE yulianyituma ũkwʼĩnywe.

¹⁵ Kandi Nyamuhanga mwabũga na Musa ati, Wasyabũga nʼabana ba Ĩsraelĩ uti, Omwami Mukulu, Nyamuhanga wʼabotata wenyũ, Nyamuhanga wa Abrahamũ, Nyamuhanga wa Ĩsaka, na Nyamuhanga wa Yakobo, amanyituma kwĩnywe; nʼerĩ rye rĩna lyage erĩhĩka kera na kera, erĩ rye rĩna lyʼeryibukwa lyage oko ndengo nʼesyondengo.

¹⁶ Ugende, ũhĩndanaye abakulu bʼAbaĩsraelĩ, ubwirebo uti, Omwami Mukulu Nyamuhanga wʼabotata wenyũ, Nyamuhanga wa Abrahamũ, Ĩsaka, na Yakobo, mwambulukirako ati, Nabiribalũngũlĩra kwenene nʼerilangira ebyo bakabakolera eMĩsĩrĩ.

¹⁷ Kandi nabĩrĩbũga nyiti, Nasyabalũsya omo maligo wʼeMĩsĩrĩ erĩhĩka oko kihugo kyʼOmunya Kanana, nʼOmũhĩtĩ, nʼOmũamorĩ, nʼOmũperĩzĩ, nʼOmũhĩvĩ, nʼOmũyebũsĩ, erĩhĩka omo kihugo ekyoswĩre mwʼamasabũ, nʼobuki.

¹⁸ Nabo basyowa omulenge wawe, nawe wasyahĩka, uwe, nʼabakulu ba Ĩsraelĩ, oko mwami wʼeMĩsĩrĩ, neryo mwasyabũga naye muti, Omwami Mukulu Nyamuhanga wʼAbaebrania, mwahĩndana netu; na lino tũkakũbũlaya utuleke tugende olugendo lwʼebiro bisatu omo mbwarara itwatoka eriherera Omwami Mukulu Nyamuhanga wetu.

¹⁹ Nage nyĩnasĩ ngoko mwami wʼeMĩsĩrĩ atendĩsyabalĩgĩra erigenda, iyihi, kutse bite ibye byala byʼamaka.

²⁰ Nage nasyasumba ebyala byage, nʼerĩswĩrya eMĩsĩrĩ omo bitiko-tiko byage ebyo nasyakola omo katĩkatĩ kayo nʼenyũma wʼaho basyabalĩgĩra erigenda.

²¹ Nage nasyaha abandu aba erĩsĩmwa omo meso wʼAbanya Mĩsĩrĩ; neryo omugulu mwasyagenda simwendisyagenda busa.

²² Nĩkwa obuli mũkalĩ asyabũlya mũlĩkyabo, nʼoko yukabungira omo nyũmba yiwe, ebindu byʼekĩtsĩpa nʼebindu byʼesyamagetsi, nʼemyenda; neryo mwasyambalyabyo abagala benyũ nʼabali benyũ; neryo mwasyahũnga oko Banya Mĩsĩrĩ.