Erĩlũayo 29 - AMASAKO ABOYTRTRE WA NYAMUHANGA AWAKAHULAWA MO BIBLIA

Erihigulwa lyʼabahererĩ

¹ Omwatsi goyũ ogo wasyakola kubo erihigulabo, erinyikolera omo mũbĩrĩ wʼobũhererĩ; wĩmaye ekyana kyʼende kyʼobulume nʼesyombangale ĩbĩrĩ esite ko bulema,

² nʼobundu obute mo kĩhamya, nʼotutole otute mo kĩhamya otũtũlũngene nʼamagũta, nʼehitole hike-hike ehite mo kĩhamya ehĩhakabĩbwe nʼamagũta, wasyatsumbago omo yĩsyano eyĩnogĩre yʼengano.

³ Wasyahĩrabyo omo kĩbo kiguma, nʼeriretabyo omo kĩbo, haguma nʼekyana kyʼobulume kyʼende nʼesyombangale ĩbĩrĩ.

⁴ Kandi wasyaleta Harũnĩ nʼabagala buwe oko lũkyo lwʼeHema yʼerĩhĩndanamo, iwakosabo omo magetsi.

⁵ Kandi wasyĩmya esyongimba, wasyambalya Harũnĩ erĩkotĩ, nʼekanzu yʼeefodĩ, nʼeefodĩ, nʼobupa, nʼerĩmũkũndĩka omulemba owalũkĩre nʼamenge, owʼeefodĩ;

⁶ kandi Wasyahĩra akakĩra kʼoko mutwe wuwe, nʼerĩhĩra, embĩta ĩbũyĩrĩre oko kakĩra ako.

⁷ Neryo wasyĩmya amagũta wʼerĩhakabya, nʼerĩũtago oko mutwe wuwe, nʼerĩmũhakabya.

⁸ Kandi wasyaleta abagala buwe nʼerĩambalyabo amakotĩ.

⁹ Kandi wasyakũndĩkabo emiremba, Harũnĩ nʼabagala buwe, nʼerĩambalyabo otũkĩra; basyabya nʼomũbĩrĩ wʼobũhererĩ omo mugambo wʼebiro byosĩ; kandi wasyahigula Harũnĩ nʼabagala buwe.

Obuhere bwʼerihigula

¹⁰ Neryo wasyaleta enume yʼende embere syʼeHema yʼerĩhĩndanamo; na Harũnĩ nʼabagala buwe basyahĩra ebyala byabo oko mutwe wʼenume yʼende eyo.

¹¹ Neryo wasyĩtĩra enume yʼende embere syʼOmwami Mukulu, oko lũkyo lwʼeHema yʼerĩhĩndanamo.

¹² Wasyĩmya omusasi wʼenume yʼende, omo munwe wawe, nʼerĩhĩrago oko mahembe wʼekiherero; kandi wasyũta omusasi gosĩ omo ndĩna yʼeiherero.

¹³ Kandi wasyĩmya ebĩsabũ byosĩ ebiri omo nda yayo, nʼendulu eyiri oko bulepe, nʼesyombago ĩbĩrĩ, nʼebĩsabũ ebiri kusyo nʼerĩhĩsĩrĩryabyo oko kiherero.

¹⁴ Nĩkwa esĩswĩ, syʼenume yʼende, nʼekĩhũ kyayo, nʼebise byayo, wasyahĩsĩrĩryabyo ekyaswa kyʼekilaliriro; ni buhere bwʼebibi.

¹⁵ Wasyĩmya embangale nguma nibya; na Harũnĩ nʼabagala buwe basyahĩra ebyala byabo oko mutwe wayo.

¹⁶ Neryo wasyasĩnza embangale, ĩwĩmya omusasi wayo, nʼeritsatsangago oko mbande syosĩ syʼekiherero.

¹⁷ Kandi wasyatsũtsanga embangale mo bitswe-bitswe, nʼerĩerya ebiri omo nda, nʼemihimbi yayo, nʼerĩhĩrabyo haguma nʼebitswe-bitswe byayo, na haguma nʼomutwe wayo.

¹⁸ Kandi wasyokererya embangale yosĩ oko kiherero; ni buhere bwʼerĩokererya busana nʼOmwami Mukulu; ni bumba bowene, obuhere obukayirawa omo muliro busana nʼOmwami Mukulu.

¹⁹ Neryo wasyĩmya eyindi mbangale; na Harũnĩ nʼabagala buwe basyahĩra ebyala byabo oko mutwe wayo.

²⁰ Neryo wasyĩta embangale eyo, nʼerĩĩmya oko musasi wayo, ĩwahĩrago oko mutwemutwe wʼokũtũ kwʼamali kwa Harũnĩ, nʼoko mutwe-mutwe wʼokũtũ kwʼamali kwʼabagala buwe, nʼoko kikumo kyʼoko byala byabo byʼamali, nʼoko lĩno lyʼobulume lyʼekisando kyʼamali kyabo, nʼeritsatsanga omusasi gʼoko mbande syosĩ syʼekiherero.

²¹ Kandi wasyĩmya oko musasi owali oko kiherero, nʼoko magũta wʼerĩhakabya, nʼeritsatsangago uku Harũnĩ, nʼoko syongimba siwe, nʼoko bagala buwe, nʼoko syongimba syʼabagala buwe; naye asyabya ĩnĩahĩwĩre, nʼesyongimba siwe, nʼabagala buwe, nʼesyongimba syʼabagala buwe haguma naye.

²² Nibya wasyĩmya ebĩsabũ byʼembangale, nʼomukira wʼebĩsabũ, nʼebĩsabũ ebikaswika ebiri omo nda, nʼendulu yʼoko bulepe, nʼesyombĩko, ĩbĩrĩ, nʼebĩsabũ ebiri kusyo, nʼekihinga kyʼamali kusangwa ni mbangale yʼerihigulwa,

²³ nʼobundu buguma, nʼakatole kaguma akali mwʼamagũta, nʼakatole kaguma erĩlũa omo kĩbo kyʼobundu obute mo kĩhamya obuli embere syʼOmwami Mukulu;

²⁴ kandi Wasyahĩra agosĩ omo byala bya Harũnĩ, nʼomo byala byʼabagala buwe, neryo wasyahũngyago busana nʼobuhere bwʼerĩhũngya embere syʼOmwami Mukulu.

²⁵ Kandi wasyalũsyabo oko byala byabo, nʼerĩokereryabyo oko kiherero oko buhere bwʼerĩokererya, eribya nʼobumba bowene embere syʼOmwami Mukulu; ni buhere bukayirawa omo muliro busana nʼOmwami Mukulu.

²⁶ Kandi wasyĩmya ekĩkũba kyEmbangale yʼerihigulwa ya Harũnĩ nʼerĩhũngyakyo embere syʼOmwami Mukulu; nakyo kyasyabya kihande kyawe.

²⁷ Neryo wasyahigula ekĩkũba kyʼobuhere bwʼerĩhũnga-hũngya, nʼekihinga kyʼobuhere bwʼerisumba ekĩkahũnga-hũngĩbawa, nʼekikasumbawa ekyʼembangale yʼerihigulwa, oko byabya busana na Harũnĩ, nʼekyo kikabya busana nʼabagala buwe.

²⁸ Neryo byasyabya busana na Harũnĩ nʼabagala buwe ngʼerĩgabo lyabo kera na kera lĩkalũa oko bana ba Ĩsraelĩ; kusangwa ni buhere bwʼerisumba; kandi bwasyabya buhere bwʼerisumba; erĩlũa oko bana ba Ĩsraelĩ oko mahere wabo, wa mahere gʼobuholo, obo ni buhere bwʼerisumba busana nʼOmwami Mukulu.

Esyongimba sĩbũyĩrĩre

²⁹ Nʼesyongimba sĩbũyĩrĩre sya Harũnĩ, syasyabya busana nʼabagala buwe enyũma siwe, erĩhakabĩbwa nʼamagũta musyo, nʼerihigulwa musyo.

³⁰ Omo biro birinda omuguma gʼoko bagala ba Harũnĩ oyo Wasyabya mũhererĩ omo mwanya wuwe asyambalasyo, omugulu akahĩka omo Hema yʼerĩhĩndanamo erikolera omo habũyĩrĩre.

³¹ Nawe wasyĩmya embangale yʼerihigulwa, nʼerĩhũka eyĩswĩ yayo yʼahabũyĩrĩre.

³² Na Harũnĩ nʼabagala buwe basyalya eyĩswĩ yʼembangale, nʼobundu obuli omo kĩbo, oko lũkyo lwʼeHema yʼerĩhĩndanamo.

³³ Neryo basyalya ebindu basanganĩbawamo oko kiro bahanganĩbawa nʼerisololwa lyabo; nĩkwa owʼehandi isialya kubyo, kusangwa bĩbũyĩrĩre.

³⁴ Kandi eyĩswĩ, kutse obundu, byamasaka erĩhĩka omo ngyakya, neryo Wasyalũsya ebĩsakĩrya ebyo omo muliro; sibyangalibwa, kusangwa bĩbũyĩrĩre.

³⁵ Wasyakola utya uku Harũnĩ, nʼoko bagala buwe, ngoko nabirikuhana; wasyahigulabo ebiro birinda.

³⁶ Kandi obuli kiro wasyahera enume yʼende yʼobuhere bwʼerĩlũsya ebibi busana nʼembanulo; nawe wasyerĩa ekiherero omugulu ukahamulirakyo; kandi wasyahakabyakyo amagũta, erihigulakyo.

³⁷ Ebiro birinda wasyaliha embanulo busana nʼekiherero, nʼerihigulakyo; nʼekiherero kyasyabya ahabũyĩrĩre kutsibu; ekindu kyahi ekĩkasyatũla oko kiherero kyasyabya kĩbũyĩrĩre.

Obuhere bwʼobuli kiro

³⁸ Nĩkwa ekyo wasyaherera oko kiherero kyekĩ; ebyana bibiri byʼembũlĩ ebyʼomwaka muguma, obuli kiro ebiro byosĩ.

³⁹ Ekyana kiguma kyʼembũlĩ wasyaherakyo omo ngyakya-ngyakya; nʼekindi kyana wasyaherakyo omwʼĩgolo-golo.

⁴⁰ Nʼakandi hasyabya haguma nʼekyana kyʼembũlĩ ekiguma kyʼomwʼĩkũmĩ ekitiri kyʼeyĩsyano yʼenzelele eyĩtũlũngene nʼekitswe kiguma kyʼakani kyʼetsũpa yʼamagũta awengĩre; nʼekitswe kiguma kyʼakani kyʼetsũpa yʼebĩnyũ busana nʼobuhere bwʼerĩpũlya.

⁴¹ Kandi wasyahera ekindi kyana kyʼembũlĩ omwʼĩgolo-golo, wasyakolakyo utya ngʼobuhere bwʼeyĩsyano obwʼengyakya-ngyakya, kandi ngʼobuhere bwʼerĩpũlya bwabo, busana nʼerikumba ndeke, obuhere obukayirawa omo muliro busana nʼOmwami Mukulu.

⁴² Bwasyabya buhere bwʼerĩokererya ebiro byosĩ omo syondengo syenyũ syosĩ oko lũkyo lwʼeHema yʼerĩhĩndanamo embere syʼOmwami Mukulu, aho ho nasyahĩndana nenyũ, erĩbũgĩra nawe aho.

⁴³ Naho nasyahĩndana nʼabana ba Ĩsraelĩ; nʼeHema yasyahigulwa nʼolukengerwa lwage.

⁴⁴ Nage nasyahigula eHema yʼerĩhĩndanamo nʼekiherero; nasyahigula Harũnĩ nʼabagala buwe erinyikolera omo mũbĩrĩ wʼobũhererĩ.

⁴⁵ Kandi nasyĩkala omo katĩkatĩ kʼabana ba Ĩsraelĩ, nasyabya Nyamuhanga wabo.

⁴⁶ Nabo basyaminya ko nyiri Mwami Mukulu Nyamuhanga wabo, oyo walũsayabo omo kihugo kyʼeMĩsĩrĩ, inatoka erĩĩkala omo katĩkatĩ kabo. Indi Mwami Mukulu, Nyamuhanga wabo.