Erĩlũayo 25 - AMASAKO ABOYTRTRE WA NYAMUHANGA AWAKAHULAWA MO BIBLIA

Ehema ĩbũyĩrĩre

¹ Neryo Omwami Mukulu mwabũga na Musa, ati,

² Ubwire abana ba Ĩsraelĩ, banyiretere erĩhĩtya lyʼobuhere; mwasyĩmya obuhere bwage oko buli mundu omo mutima wuwe.

³ Kandi obũ ni buhere obo mwasyĩmya kubo; esyamagetsi, nʼesyʼebĩtsĩpa, nʼemiringa,

⁴ nʼesyongohe syʼerangĩ yʼakanĩkĩ, nʼesyʼerangĩ yʼamabono, nʼesyʼerangĩ yʼengula, nʼekĩtanĩ kĩbũyahĩre, nʼobweya bwʼembene,

⁵ nʼesyongobĩ syʼesyombangale esĩhakabĩrye engula, nʼengobĩ yʼepombolo, nʼemiti yʼemĩshĩta,

⁶ nʼamagũta busana nʼetala, nʼamanũkato busana nʼamagũta wʼerĩhakabya, na busana nʼobukwa,

⁷ nʼamabwe wʼeshohamũ, nʼamabwe wʼerĩhĩrwamo, busana nʼeefodĩ, na busana nʼekyuma kyʼekĩkũba.

⁸ Kandi banyĩkokoteraye ahabũyĩrĩre, inabana erĩĩkala omo katĩkatĩ kabo.

⁹ Ngʼebyosĩ ngakũkangaya ekĩsosekanĩo kyʼeHema, nʼekĩsosekanĩo kyʼebindu byayo byosĩ, ko mwasyayirabyo mutya.

¹⁰ Kandi basyabatsa erĩsandũko lyʼomuti wʼomũshĩta; obuli bwalyo bwasyabya metere nguma nʼembindi, nʼobugali embindi yʼemetere, nʼobuli bwalyo bwʼerĩlolya endata embindi yʼemetere.

¹¹ Kandi wasyabambĩryalyo nʼesyamagetsi nyibuya, wasyabambĩryalyo omwisi nʼehĩhya, kandi wasyalabya omulera wʼesyamagetsi erĩtĩmbyago oko mbande syosĩ.

¹² Kandi wasyahesa esyombuka syʼesyamagetsi ĩnĩ busana nalyo, nʼerĩhĩrasyo omo mihimbi ĩnĩ yalyo; esyombũka ĩbĩrĩ syasyabya oko luhande luguma lwalyo, nʼesyombũka ĩbĩrĩ oko lundi luhande lwalyo.

¹³ Kandi wasyabatsa emigamba yʼomũshĩta, nʼerĩbambĩryayo omo syamagetsi.

¹⁴ Neryo Wasyahĩra emigamba eyo omo syombũka oko mbande syʼerĩsandũko, busana nʼeriheka erĩsandũko.

¹⁵ Emigamba yasyabya omo syombũka syʼerĩsandũko; siyendĩsyalũsĩbwamo.

¹⁶ Neryo Wasyahĩra omwʼĩsandũko erĩtũlago eryo nasyakuha.

¹⁷ Kandi wasyahesa ekĩlũmbĩ kyʼeriganyira kyʼomo syamagetsi nyibuya; obuli bwakyo (bwasyabya) metere nguma nʼembindi, nʼobugali bwakyo embindi yʼemetere.

¹⁸ Kandi wasyahesa amakerũbĩ abiri wʼesyamagetsi; wasyakokotyago omo buhese oko syondũlĩ ĩbĩrĩ syʼekĩtũmbĩ kyʼeriganyira.

¹⁹ Ũkokoteraye ekerũbĩ nguma oko ndũlĩ nguma, nʼekerũbĩ nguma oko yindi ndũlĩ yakyo; omo kitswe kiguma haguma nʼekĩtũmbĩ kyʼeriganyira wasyakokotya amakerũbĩ oko syondũlĩ ĩbĩrĩ syakyo.

²⁰ Nʼamakerũbĩ asyasũkũlĩrya ebĩpũpa byago endata, eriswika ekĩtũmbĩ kyʼeriganyira nʼebĩpũpa byago, nʼamũsũ wago akasamalirana; amũsũ wʼamakerũbĩ asyalola oko luhande lwʼekĩtũmbĩ kyʼeriganyira.

²¹ Kandi Wasyahĩra ekĩtũmbĩ kyʼeriganyira endata wʼerĩsandũko; nʼomwisi wʼerĩsandũko Wasyahĩra erĩtũlago eryo nasyakuha.

²² Nʼaho nasyahĩndana nawe, kandi nasyakanĩa nawe erĩlũa oko kĩtũmbĩ kyʼeriganyira, erĩlũa omo katĩkatĩ kʼamakerũbĩ abiri awali okwʼisandũko lyʼerĩtũlago, oko myatsi yosĩ nasyakuha omo bihano oko bana ba Ĩsraelĩ.

Emesa yʼobundu bwʼerĩkangya

²³ Nawe wasyabatsa emesa yʼomuti wʼomũshĩta; obuli bwayo bwasyabya 92 cm nʼobugali bwayo 46 cm nʼobuli bwayo erilola endata 69 cm.

²⁴ Kandi wasyabambĩryayo esyamagetsi nyibuya, kandi Wasyahĩra kuyo kwʼomulera wʼesyamagetsi erĩtĩmbyago oko mbande syosĩ.

²⁵ Wasyatĩmbya kuyo, Omutano wʼobuli bwʼebyala biguma; kandi wasyatĩmbya kuyo omulera wʼesyamagetsi oko mutano oko mbande syosĩ.

²⁶ Kandi wasyahesa busana nayo esyombũka ĩnĩ syʼesyamagetsi, nʼerĩhĩra esyombũka syʼomo nũnga ĩnĩ esiri oko mihimbi yayo ĩnĩ.

²⁷ Esyombũka syasyabya hakũhĩ nʼomutano, busana nʼahʼerĩhĩra emigamba yʼeriheka emesa.

²⁸ Kandi wasyabatsa emigamba yʼomo muti wʼomũshĩta, nʼeriswika kuyo kwʼesyamagetsi, emesa iyahekwa nayo.

²⁹ Kandi wasyahesa esyosahanĩ syayo, ehyũko hyayo, nʼesyondehĩ syayo, nʼebibindi byayo, ebĩkũtawamo; wasyahesabyo omo syamagetsi syowene.

³⁰ Kandi ĩwanyĩhĩrĩra obundu bwʼerĩkanganĩa oko mesa embere syage ebiro byosĩ.

Omutagala wʼetala wʼesyamagetsi

³¹ Kandi uhese omutagala wʼetala omo syamagetsi esĩkangabasenĩe; wasyahesa omutagala wʼetala, endĩna yago, nʼokugulu kwago; nʼesyondehĩ syago, nʼemitwe yago, nʼomusanga wago, byasyalũa omo kitswe kiguma;

³² kandi hasyabya emitahi ndatu eyĩkalũa omo mũbĩmba wago; emitahi ĩsatu eyʼomutagala wʼetala ĩkalũa omo luhande luguma lwago, nʼemitahi ĩsatu yʼomutagala wʼetala ĩkalũa oko lundi luhande lwago;

³³ esyondehĩ ĩsatu sikayirawa ngʼomusanga wʼelozĩ oko mutahi muguma, omutwe nʼomusanga; nʼesyondehĩ ĩsatu sikayirawa ngʼomusanga wʼelozĩ omo gundi mutahi, omutwe nʼomusanga; neryo busana nʼemitahi ndatu eyĩlũĩre omo mutagala wʼetala;

³⁴ nʼomo mutagala wʼetala esyondehĩ ĩnĩ sikayirawa ngʼomusanga wʼelozĩ, emitwe yago, nʼomusanga wago;

³⁵ omutwe muguma eyĩkwa oko mitahi ĩbĩrĩ omo kitswe kiguma, nʼomutwe muguma eyĩkwa oko mitahi ĩbĩrĩ omo kitswe kiguma, busana nʼemitahi ndatu omo mutagala wʼetala.

³⁶ Emitwe yabyo nʼemitahi yabyo byasyabya byʼekitswe kiguma; ebyosĩ byasyabya omo buhese buguma omo syamagetsi nyibuya.

³⁷ Kandi wasyakokotya esyotala syago sirinda; byasyakya esyotala syago, erĩkolerya embere wago.

³⁸ Nʼebĩkahũmberaya byago, nʼesyosahanĩ syʼebĩkahũmberaya byago, byasyabya byʼesyamagetsi nyibuya.

³⁹ Kyasyakokotĩbwa, haguma nʼebindu byosĩ ebĩ omo talanta yʼesyamagetsi nyibuya.

⁴⁰ Nawe ũyĩtegereraye uyirebyo omo lulengo lwabyo, ngoko wakanganĩbawa omo kitwa.