Erĩlũayo 24 - AMASAKO ABOYTRTRE WA NYAMUHANGA AWAKAHULAWA MO BIBLIA

Musa akaswahetukira oko Kitwa

¹ Neryo Omwami Mukulu mwabũga na Musa ati, Wase endata ahali Omwami Mukulu, uwe, na Harũnĩ, na Nadabũ, na Abĩhũ, nʼabakulu ba Ĩsraelĩ makũmĩ alinda, erĩramya imune hali.

² Musa ĩyowene asyasegera hakũhĩ nʼOmwami Mukulu; nĩkwa ibo sibendisyasegera hakũhĩ; kutse abandu sibendisyahetuka haguma naye.

³ Na Musa mwasa mwabwira bandu ebĩnywa byosĩ byʼOmwami Mukulu nʼebilayiro byosĩ; nʼabandu bosĩ mobasũbĩrya nʼomulenge muguma, bati, Ebĩnywa byosĩ ebyo Mwami Mukulu abĩrĩbũga, twasyakolabyo.

⁴ Neryo Musa mwasaka ebĩnywa byosĩ byʼOmwami Mukulu. Neryo mwabuka omo ngyakya-ngyakya, neryo mwahĩmba ekiherero eyĩkwa oko kitwa, haguma nʼesyondũyĩ erĩkũmĩ nʼesĩbĩrĩ, ngʼebihanda erĩkũmĩ nʼebibiri bya Ĩsraelĩ.

⁵ Neryo mwatuma abalwana ba Ĩsraelĩ, abahera amahere wʼerĩokererya, nʼerihera amahere wʼobuholo awʼesyonde oko Mwami Mukulu.

⁶ Na Musa mwĩmya ekihande kyʼomusasi, mwahĩrago oko matũba; nʼekihande kyʼomusasi mwatsatsangago oko kiherero.

⁷ Neryo mwĩmya ekitabu kyʼendagano mwasomerakyo emuliro wʼabandu; nabo mobabũga bati, Ebyosĩ ebyo Mwami Mukulu amabũga twasyakolabyo, nʼerikengabyo.

⁸ Neryo Musa mwĩmya omusasi, mwatsatsangago oko bandu, mwabũga ati, Lebaya, omusasi wʼendagane eyo Mwami Mukulu abirikola haguma nenyũ busana nʼebĩnywa byosĩ ebĩ.

⁹ Neryo Musa, na Harũnĩ, na Nadabũ, na Abĩhũ, nʼabakulu makũmĩ alinda ba Ĩsraelĩ mobahetukira endata;

¹⁰ mobalangira Nyamuhanga wa Ĩsraelĩ; nʼeyĩkwa oko bisando biwe mohabya nga habĩrĩkokotĩbwa erĩbwe lya Safĩrĩ, erĩkakangabasanaya ngʼobũtũkũ.

¹¹ Kandi mwatahĩra ebyala biwe oko bakulu ba Ĩsraelĩ; mobasamalira Nyamuhanga, kandi mobalya mobapũlya.

¹² Neryo Omwami Mukulu mwabũga na Musa ati, Ũnyegaye endata eno oko kitwa, ubyeho; nage ngandikuha ebisayi byʼamabwe haguma nʼemigambo, nʼebihano, ebyo nabirisaka, iwatoka erĩkangĩrĩryabyo.

¹³ Neryo Musa mwahangana na Yosũa omugombe wuwe; na Musa mwahetukira oko kitwa kya Nyamuhanga.

¹⁴ Neryo mwabũga nʼabakulu ati, Mutulindirire hano, erĩhĩka aho twasyaswabahĩkĩrako; neryo, lebaya, Harũnĩ na Hũrĩ bane haguma nenyũ; nʼoyuwite omwatsi ĩnĩahĩka kubo.

¹⁵ Neryo Musa mwahetukira oko kitwa, nʼekĩtũ mokyaswika ekitwa.

¹⁶ Nʼolukengerwa lʼOmwami Mukulu molwĩkala oko kitwa kyʼeSĩnaĩ, nʼekĩtũ mokyaswikakyo ebiro ndatu; nʼekiro kyʼebirinda Omwami Mukulu mwabirikira Musa erĩlũa omo kĩtũ.

¹⁷ Nʼeriminyikala lyʼolukengerwa lʼOmwami Mukulu molyabya ngʼomuliro owakahĩsaya oko singi yʼekitwa omo meso wʼabana ba Ĩsraelĩ.

¹⁸ Neryo Musa mwingira omo katĩkatĩ kʼekĩtũ, akahetukira oko kitwa; kandi Musa mwabya oko kitwa ebiro makũmĩ ani, nʼemisibo makũmĩ ani (40).