Erĩlũayo 22 - AMASAKO ABOYTRTRE WA NYAMUHANGA AWAKAHULAWA MO BIBLIA

Ebihano byʼeririha

¹ Omundu amĩba ende, kutse embũlĩ, nʼerikerayo, kutse erĩgũlyayo; inialiha nde ĩtanu oko nde nguma, nʼesyombũlĩ ĩnĩ busana nʼembũlĩ nguma.

² Omũrahĩ amabanika akatula enyũmba akaswĩrĩbwa, akahola, isihendisyabya lubanza lʼomusasi busana naye.

³ Eryuba lyamamusingirirako, sihali lubanza lʼomusasi busana naye; asyaliha; neryo atawitekĩ, asyagũlĩbwa busana nʼobwĩbĩ buwe.

⁴ Ekyo alĩba kyamabanika omo byala biwe kikineho, kutse kyamabya ini nde, kutse punda, kutse mbũlĩ; asyaliha ngendo ĩbĩrĩ.

⁵ Omundu amabĩhya omwʼirima kutse omwʼirima lyʼebĩnyũ, akahangula enyama yiwe, nayo ĩkabĩhya omwʼirima lyʼogundi mundu; asyaliha oko byowene byʼeririma liwe, nʼebyowene ndeke byʼeririma liwe lyʼebĩnyũ.

⁶ Omuliro amabutuka, akahĩka nʼerĩhĩsya amahwa, neryo emiganda yʼengano ikahya, kutse engano ĩtagesĩre, kutse eririma likakirira; oyo wakaya omuliro kwenene asyaliha.

⁷ Omundu amaha mũlĩkyabo yʼebĩtsĩpa kutse ebindi bindu erimubikirabyo, neryo bĩkĩbwa omo nyũmba yʼomundu oyo; omũrahĩ amabanika, asyaliha ngendo ĩbĩrĩ.

⁸ Omũrahĩ amatendibanika, neryo Omwenye nyũmba asyahĩka embere syʼabatswerĩ, erĩrebya nga sĩalĩtahĩra ebyala biwe oko bindu bya mũlĩkyabo.

⁹ Kusangwa obuli mwatsi wʼerĩhalya, kyamabya busana nʼende, kutse punda, kutse mbũlĩ, kutse olukimba, kutse busana nʼekĩndũkĩ ekitere, ekyo mundu angahula ati, Kino ni kyo, omwatsi wʼababiri abo asyahĩka embere syʼabatswerĩ; nʼoyo abatswerĩ basyatswera asyaliha mũlĩkyabo engendo ĩbĩrĩ.

¹⁰ Omundu amaha mũlĩkyabo, epunda, kutse ende, kutse embũlĩ, kutse nyamakĩ, erĩmũlĩsĩryayo; neryo ikahola, kutse ikahutala, kutse ikahera, omundu isialitalangira;

¹¹ erĩlahĩrya oko Mwami Mukulu lyasyabya omo katĩkatĩ kabo ababiri, nga mwatĩmya oko bindu bya mũlĩkyabo; nʼomwenyebyo asyalĩgalyo, neryo siendisyaliha.

¹² Nĩkwa byamĩbwa ukwʼiye, asyaliha mwenyebyo.

¹³ Nĩkwa kyamatulangwa nʼenyama, inialetakyo busana nʼeritũlago; siendisyaliha ekiryatulangawa.

¹⁴ Kandi omundu amayibweka ekindu kyahi uku mũlĩkyabo, nakyo kikahutala, kutse kikahola, omwenyekyo isialiho, kwenene asyalihakyo.

¹⁵ Nĩkwa omwenyekyo amabyaho nakyo isiendisyalihakyo; kyamabya ini kindu kyʼeririhwa, mokyasa omo bũgũlĩ bwakyo.

¹⁶ Omundu amaragana nʼomwanamuto oyũtatahĩbwe, akakesya naye, asyamũtahya, abye mũkalĩ wuwe.

¹⁷ Ĩse wuwe amagana erimuhaye, asyaliha esyofranka ngʼenzwere yʼabambesa abakatahĩbawa.

¹⁸ Susyereka omũkũmũ-kali eribyaho.

¹⁹ Obuli mundu oyũkakesaya nʼenyama asyĩtwa.

²⁰ Nʼoyukaherera eyindi nyamuhanga, ate yo Mwami Mukulu ĩyowene, asyaherĩbwa kũndũ.

²¹ Simusyekola omubunga yo nabi, kutse erĩmwagalya; kusangwa nenyũ mwabya babunga omo kihugo kyʼeMĩsĩrĩ.

²² Sĩmũsyegalaya omũkwakalĩ, kutse engũbĩ.

²³ Wamagalyabo omo mwatsi wahi, nabo bakanyilakira, kwenene nasyowa erilaka lyabo;

²⁴ erihitana lyage lyasyakarama, kandi nasyabĩta omo mũyalĩ; nʼabakalĩ benyũ basyabya bakwakalĩ, nʼabana benyũ basyabya ngũbĩ.

²⁵ Wamabweka esyʼebĩtsĩpa oko muguma gʼoko bandu bage abali haguma nawe nĩkwa ini mwera, siwendisyabya ngʼoyũkandĩsyamũlũsya ko kindi; kutse siwendisyamutswa endũndĩ.

²⁶ Wamĩmya olukimba lwa mũlĩkyenyũ mo muwato, ĩwamũsũbũlĩryalo eryuba isiriri ryalenga;

²⁷ kusangwa ni kyʼeriyiswika kiwe ĩkyokyene; ni lukimba luwe busana nʼomubiri wuwe; asyayiswikakĩ kwehĩ? Neryo omugulu asyanyilakira, nasyowa; kusangwa indi wʼeriganyira.

²⁸ Susyetsuma Nyamuhanga, kutse eritakira omũtabalĩ wʼabandu benyũ.

²⁹ Susyerindirira eriha oko byo uliagesa, nʼoko bĩnyũ ukakama. Wasyamba akambere kʼabagala bawe.

³⁰ Ukole utya nʼesyonde syawe, nʼesyombũlĩ syawe; ekyana kyasyabya na nyĩnya wakyo ebiro birinda; nʼoko kiro kyʼomunani wasyambakyo.

³¹ Kandi mwasyabya bandu babũyĩrĩre busana nage, busana nʼekyo Simusyerya enyama eyiryatulangawa nʼenyama yʼomolĩ; imwagusayo oko mbwa.